ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 8 ເມສານີ້ໃນໂອກາດເຂົ້າຮ່ວມກິດຈະກຳປູກຕົ້ນໄມ້ຂອງນະຄອນຫຼວງປັກກິ່ງ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ເນັ້ນໜັກວ່າ, ຄວນເຊີດຊູມູນເຊື້ອທີ່ດີງາມຂອງຊົນຊາດຈີນໃນການຮັກຕົ້ນໄມ້, ປູກຕົ້ນໄມ້ແລະບົວລະບັດຮັກສາຕົ້ນໄມ້, ລະດົມໃຫ້ທົ່ວປະເທດ, ທົ່ວປວງຊົນແລະທົ່ວສັງຄົມຕ້ອງຮ່ວມແຮງຮ່ວມໃຈກັນເຂົ້າຮ່ວມ. ລົງເລິກການຊຸກຍູ້ການເຄື່ອນໄຫວປູກຕົ້ນໄມ້ເພື່ອໃຫ້ແຜ່ນດິນທົ່ວປະເທດຫັນເປັນສີຂຽວແລະໄດ້ຮັບໝາກຜົນຢ່າງແທ້ຈິງຢ່າງບໍ່ຢຸດຢັ້ງ.
ທ່ານສີຈິ້ນຜິງ ເນັ້ນໜັກວ່າ, ຊົນຊາດຈີນມີມູນເຊື້ອທີ່ດີງາມໃນການທີ່ຮັກຕົ້ນໄມ້, ປູກຕົ້ນໄມ້ແລະບົວລະບັດຮັກສາຕົ້ນໄມ້ມາຕັ້ງແຕ່ບູຮານນະການ. ຫຼາຍຄົນສຸມຟືນຈຶ່ງຈະໄດ້ແປວໄຟທີ່ໄໝ້ສູງຂຶ້ນ, ຫຼາຍຄົນປູກຕົ້ນໄມ້ຈຶ່ງເກີດເປັນມີປ່າ. ຄວນລະດົມໃຫ້ທົ່ວປະເທດ, ທົ່ວປວງຊົນແລະທົ່ວສັງຄົມເຂົ້າຮ່ວມການປູກຕົ້ນໄມ້, ພະນັກງານການນຳທຸກຂັ້ນຄວນເປັນແບບຢ່າງ, ດຳເນີນການປູກຕົ້ນໄມ້ແບບພັນທະຕະຫຼອດໄປ. ຄວນປະຕິບັດທັດສະນະທີ່ພູຂຽວນ້ຳໃສກໍແມ່ນພູເງິນພູຄຳ, ຊຸກຍູ້ໃຫ້ການປູກຕົ້ນໄມ້ເພື່ອຫັນແຜ່ນດິນເປັນສີຂຽວຢ່າງມີຄຸນນະພາບສູງ, ວາງແຜນປັບປຸງລະບົບພູຜາ, ນ້ຳ, ປ່າໄມ້, ດິນນາ, ໜອງແລະທົ່ງຫຍ້າ, ຊຸກຍູ້ກິດຈະກຳປູກຕົ້ນໄມ້ຫັນແຜ່ນດິນເປັນສີຂຽວຂະໜາດໃຫຍ່ທີ່ສອດຄ່ອງສະພາບທ້ອງຖິ່ນ, ຊຸກຍູ້ການກໍ່ສ້າງຕົວເມືອງແລະຊົນນະບົດໃຫ້ເປັນປ່າຢ່າງຕໍ່ເນື່ອງ, ອອກແຮງປັບປຸງສະພາບແວດລ້ອມໃນການດຳລົງຊີວິດຂອງຄົນໃຫ້ດີຂຶ້ນ, ບັນລຸເປົ້າໝາຍໃຫ້ມີຕົ້ນໄມ້ສີຂຽວແລະມີດອກໄມ້ບານໃນທຸກລະດູການ, ພັດທະນາເສດຖະກິດສີຂຽວ, ເພີ່ມທະວີການຄຸ້ມຄອງແລະປົກປ້ອງປ່າໄມ້, ຊຸກຍູ້ໃຫ້ການເຄື່ອນໄຫວປູກຕົ້ນໄມ້ເພື່ອຫັນແຜ່ນດິນເປັນສີຂຽວໄດ້ຮັບໝາກຜົນຢ່າງແທ້ຈິງ.
ຄຳເຫັນ
0