ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 19 ເມສາ 2016, ທ່ານສີຈິ້ນຜິງເປັນປະທານຈັດກອງປະຊຸມສຳມະນາວຽກງານຄວາມປອດໄພທາງອິນເຕີເນັດແລະເຕັກໂນໂລຊີຂໍ້ມູນຂ່າວສານ ແລະກ່າວຄຳປາໄສທີ່ສຳຄັນໃນກອງປະຊຸມ.
ໃນວັນທີ 19 ເມສາຂອງ 3 ປີກ່ອນ,ທ່ານ ສີຈິ້ນຜິງ ຜູ້ນຳສູງສຸດຂອງຈີນໄດ້ເປັນປະທານຈັດກອງປະຊຸມສຳມະນາວຽກງານການຮັກສາຄວາມປອດໄພທາງອິນເຕີເນັດແລະເຕັກນິກຂໍ້ມູນຂ່າວສານແລະໄດ້ກ່າວຄຳປາໄສທີ່ສຳຄັນ. ໃນກອງປະຊຸມ,ທ່ານ ສີຈິ້ນຜິງ ໄດ້ໃຫ້ທິດຊີ້ນຳທີ່ຈະແຈ້ງແກ່ວຽກງານຊຸກຍູ້ການສ້າງສາປະເທດທີ່ເຂັ້ມແຂງທາງອິນເຕີເນັດ,ຊຸກຍູ້ການພັດທະນາວຽກງານການຮັກສາຄວາມປອດໄພທາງອິນເຕີເນັດແລະເຕັກນິກຂໍ້ມູນຂ່າວສານໂດຍສຸມໃສ່ສະພາບແວດລ້ອມທາງອິນເຕີເນັດ, ເຕັກນິກໃຈກາງແລະບັນຫາທີ່ສຳຄັນອື່ນໆ.
ອິນເຕີເນັດຕ້ອງເສີມຂະຫຍາຍບົດບາດຢ່າງໃຫຍ່ຫຼວງໃນການພັດທະນາໃໝ່ຂອງຈີນ
ທ່ານ ສີຈິ້ນຜິງ ສະເໜີວ່າ:ຕ້ອງເພີ່ມທະວີການກໍ່ສ້າງພື້ນຖານໂຄງລ່າງດ້ານຂໍ້ມູນຂ່າວສານ,ສຸມທຸກຄວາມພະຍາຍາມຊຸກຍູ້ການພັດທະນາແບບ
ເຊື່ອມໂຍງຢ່າງເລິກເຊິ່ງລະຫວ່າງອິນເຕີເນັດແລະພື້ນຖານເສດຖະກິດ,ເສີມຂະຫຍາຍບົດບາດຢ່າງຕັ້ງໜ້າຕໍ່ການຫັນປ່ຽນຮູບການພັດທະນາເສດຖະກິດແລະການດັດສົມໂຄງປະກອບເສດຖະກິດໂດຍຜ່ານການນຳໃຊ້ຂໍ້ມູນຂ່າວສານດ້ານເຕັກນິກ,ທຶນຮອນ,ບຸກຄະລາກອນແລະວັດຖຸອຸປະກອນ.
ການສະແດງຄວາມຄິດເຫັນຂອງປະຊາຊົນສາມາດລົງທາງອິນເຕີເນັດໄດ້
ມາຮອດປັດຈຸບັນ,ຜູ້ຊົມໃຊ້ອິນເຕີເນັດຂອງຈີນໄດ້ມີຈຳນວນເຖິງ 829 ລ້ານຄົນ,ເຂົາເຈົ້າສ່ວນຫຼາຍເອີ້ນຕົນເອງເປັນ “ຄົນທຳມະດາຂັ້ນຮາກຖານ”. ການຈະແກ້ໄຂການພົວພັນລະຫວ່າງລັດຖະບານກັບຂັ້ນຮາກຖານແນວໃດ,ແມ່ນບັນຫາຂອງຜູ້ປົກຄອງຂອງຈີນຮຸ່ນໃໝ່.
ທ່ານ ສີຈິ້ນຜິງ ສະເໜີໃນກອງປະຊຸມຄັ້ງນີ້ວ່າ: ເມື່ອປະຊາຊົນມີເງື່ອນໄຂນຳໃຊ້ອິນເຕີເນັດໄດ້ແລ້ວ,ຄວາມເຫັນຂອງປະຊາຊົນກໍ່ສາມາດລົງອິນເຕີເນັດໄດ້ເຊັ່ນກັນ.
ເຕັກນິກທີ່ສຳຄັນແມ່ນຈຸດຊີ້ຂາດທີ່ໃຫຍ່ທີ່ສຸດຂອງຈີນ
ໃນຖານະເປັນກຸ່ມເສດຖະກິດໃຫຍ່ອັນດັບທີສອງຂອງໂລກ,ຄວາມແຕກໂຕນກັນທີ່ໃຫຍ່ທີ່ສຸດລະຫວ່າງຈີນກັບປະເທດທີ່ມີລະດັບຄວາມກ້າວໜ້າອື່ນໆໃນໂລກກໍ່ແມ່ນເຕັກນິກໃຈກາງຕົ້ນຕໍນີ້ແຫຼະ.
ທ່ານສີຈິ້ນຜິງສະເໜີເປັນພິເສດວ່າ: ວິສາຫະກິດອິນເຕີເນັດແຫ່ງໜຶ່ງ ເຖິງຈະມີຂະໜາດໃຫຍ່ຊ່ຳໃດແລະມີມູນຄ່າທາງຕະຫຼາດສູງຊ່ຳໃດກໍຕາມ, ຖ້າຫາກຊີ້ນສ່ວນອຸປະກອນສຳຄັນທີ່ສຸດຍັງອາໄສການນຳເຂົ້າຈາກຕ່າງປະເທດຢ່າງຫຼວງຫຼາຍ, ຄັນຊັ້ນ,ຂອດສຳຄັນໃນຕ່ອງໂສ້ການສະໜອງກໍຈະຖືກຕົກຢູ່ໃນກຳມືຂອງປະເທດອື່ນ. ສະນັ້ນ, ນັກທຸລະກິດ,ຜູ້ຊ່ຽວຊານ ນັກວິຊາການແລະພະນັກງານຄົ້ນຄວ້າວິທະຍາສາດເຕັກນິກຂອງຈີນຕ້ອງພະຍາຍາມສູ້ຊົນໃນການບັນລຸການບຸກທະລຸສິ່ງສຳຄັນອັນໃໝ່ໃນການຄົ້ນຄວ້າພັດທະນາເຕັກນິກສຳຄັນເພື່ອສ້າງກຽດສັກສີໃຫ້ປະເທດຊາດຕົນ.
ຈີນຕ້ອງປົກປ້ອງຄວາມປອດໄພທາງອິນເຕີເນັດຢ່າງແທ້ຈິງ.
ພື້ນຖານໂຄງລ່າງຂໍ້ມູນຂ່າວສານທີ່ສຳຄັນໃນຂົງເຂດການທະນາຄານ, ພະລັງງານໄຟຟ້າ, ໂທລະຄົມການສື່ສານແລະອື່ນໆເປັນເສັ້ນປະສາດສູນກາງຂອງການເຄື່ອນໄຫວດ້ານເສດຖະກິດສັງຄົມ, ເປັນຈຸດສຳຄັນທີ່ສຸດຂອງຄວາມປອດໄພທາງອິນເຕີເນັດ, ເມື່ອຖືກບຸກໂຈມຕີ ກໍຈະຖືກທຳລາຍແລະໄດ້ຮັບຜົນເສຍຫາຍຢ່າງໜັກໜ່ວງທີ່ສຸດ.
ທ່ານສີຈິ້ນຜິງກ່າວເນັ້ນວ່າ: ຈີນຕ້ອງເລັ່ງລັດກໍ່ສ້າງລະບົບທີ່ສາມາດຮັບປະກັນຄວາມປອດໄພຂອງພື້ນຖານໂຄງລ່າງດ້ານຂໍ້ມູນຂ່າວສານທີ່ສຳຄັນ. ຕ້ອງລົງເລິກຄົ້ນຄວ້າ ແລະປະຕິບັດການປ້ອງກັນແລະປົກປ້ອງຄວາມປອດໄພຂອງພື້ນຖານໂຄງລ່າງດ້ານຂໍ້ມູນຂ່າວສານທີ່ສຳຄັນຂອງຊາດໃຫ້ມີປະສິດທິຜົນ ເພື່ອສ້າງສະພາບຄວາມປອດໄພທາງອິນເຕີເນັດຢ່າງຮອບດ້ານຢູ່ຕະຫຼອດເວລາ.
ວິສາຫະກິດອິນເຕີເນັດຂອງຈີນຕ້ອງມີຄວາມຮັບຜິດຊອບສູງ.
ໃນກອງປະຊຸມຄັ້ງນີ້, ທ່ານສີຈິ້ນຜິງໄດ້ກ່າວເປັນພິເສດກ່ຽວກັບການແຂ່ງຂັນທີ່ບໍ່ມີຜົນດີໃນຕະຫຼາດອິນເຕີເນັດຂອງຈີນ. ທ່ານເນັ້ນວ່າ: ຕ້ອງສ້າງລະບຽບການຕະຫຼາດໃຫ້ເປັນລະບຽບແບບແຜນ, ເລັ່ງລັດຂະບວນການສ້າງກົດໝາຍກ່ຽວກັບອິນເຕີເນັດ, ປັບປຸງມາດຕະການຕິດຕາມຄຸ້ມຄອງອິນເຕີເນັດໃຫ້ສົມບູນຂຶ້ນ. ວິສາຫະກິດເຕີບໃຫຍ່ຂະຫຍາຍຕົວ ຂຶ້ນຫຼາຍເທົ່າໃດ, ກໍຍິ່ງຕ້ອງມີຄວາມຮັບຜິດຊອບຕໍ່ສັງຄົມແລະມີຄວາມຮັບຜິດຊອບທາງຈາລິຍະທຳ. ວິສາຫະກິດອິນເຕີເນັດຕ້ອງສ້າງຜົນປະໂຫຍດໃຫ້ສັງຄົມແລະສ້າງຄວາມຜາສຸກໃຫ້ປະຊາຊົນ.
ຄຳເຫັນ
0