ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫຼັງຈາກອາເມຣິກາໄດ້ປະຕິບັດຄຳສັ່ງໃນການຄຸ້ມຄອງແລະຄວບຄຸມການສົ່ງອອກສູ່ບໍລິສັດຫົວເຫວີຍຂອງຈີນແລ້ວ, ຫວ່າງມໍ່ໆມານີ້, ອາເມຣິກາໄດ້ໃສ່ຮ້າຍປ້າຍສີຕໍ່ເຮືອບິນບໍ່ມີຄົນຂັບທີ່ບໍລິສັດເຕັກໂນໂລຢີ DJI SZ ຈຳກັດຂອງຈີນຜະລິດນັ້ນມີອຸປະກອນດັກຝັງດ້ານຂໍ້ມູນຂ່າວສານທີ່ເຊື່ອງຊ້ອນໄວ້,ພ້ອມທັງຂົ່ມຂູ່ວ່າຈະຈັດເອົາບໍລິສັດຮິກວີເຊີນທີ່ເປັນບໍລິສັດຜະລິດອຸປະກອນກ້ອງວົງຈອນປິດຂອງຈີນເຂົ້າໃນບັນຊີດຳໃນຫຼາຍອາທິດຕໍ່ໜ້າ,ເພື່ອຈຳກັດບໍ່ໃຫ້ບໍລິສັດດັ່ງກ່າວຊື້ເຕັກນິກນຳວິສາຫະກິດອາເມຣິກາ.ໃນຖານະເປັນມະຫາອຳນາດປະເທດດຽວໃນໂລກ, ເຖິງວ່າອາເມຣິກາໄດ້ມີກຳລັງຕົວຈິງທີ່ເຂັ້ມແຂງກວ່າໝູ່ໃນດ້ານວິທະຍາສາດເຕັກນິກ,ການທະຫານແລະເສດຖະກິດກໍ່ຕາມ,ແຕ່ພັດມີນັກການເມືອງບາງຄົນມີໃຈຄໍຄັບແຄບທີ່ສຸດ,ບໍ່ຢາກເຫັນປະເທດອື່ນສະແຫວງຫາການພັດທະນາແລະຄວາມກ້າວໜ້າ,ທັງບໍ່ຢາກເຫັນປະເທດອື່ນລື່ນກາຍຕົນເອງໃນບາງຂົງເຂດ.
ໃນຖານະເປັນຕົວແທນຂອງອຸດສາຫະກຳການຜະລິດທີ່ນຳໜ້າຂອງຈີນ,ບໍລິສັດຫົວເຫວີຍ,ບໍລິສັດ DJI, ບໍລິສັດ CRRC, ບໍລິສັດຮິກວີເຊີນແລະບໍລິສັດອື່ນໆໄດ້ຮັບຄວາມນິຍົມຊົມຊອບຈາກຕະຫຼາດສາກົນຍ້ອນມີຜະລິດຕະພັນແລະເຕັກນິກທີ່ມີຄຸນນະພາບດີແລະລາຄາທີ່ສົມເຫດສົມຜົນ,ທັງມີມາດຖານດ້ານຄວາມປອດໄພທີ່ຜ່ານການກວດກາແລະຮັບຮອງຢ່າງເຄັ່ງຄັດຈາກຫຼາຍປະເທດໃນໂລກເຊິ່ງລວມທັງອາເມຣິກາເອງ.
ຕາມຄວາມເປັນຈິງ, ບໍ່ວ່າບໍລິສັດຫົວເຫວີຍ ຫຼືບໍລິສັດ DJI ກໍຄືນັກການເມືອງບາງຄົນຂອງອາເມຣິກາໂຍນຄວາມຜິດໃຫ້ດ້ວຍຂໍ້ອ້າງ “ໄພຂົ່ມຂູ່ແຫ່ງຊາດທີ່ແຝງຂ້ອຣ” ໂດຍບໍ່ມີຫຼັກຖານແຕ່ປະການໃດ.
ການກະທຳອັນບັງອາດເປີດແປນຂອງນັກການເມືອງອາເມຣິກາໄດ້ເຮັດໃຫ້ຜູ້ເບິ່ງກວ້າງເຫັນໄກຫຼາຍທ່ານຂອງອາເມຣິກາຮູ້ສຶກວ່າບໍ່ເປັນທຳ. ທ່ານແຊກ ນັກເສດຖະສາດທີ່ມີຊື່ສຽງໂດ່ງດັງຂອງອາເມຣິກາໄດ້ກ່າວແບບກົງໄປກົງມາວ່າ: “ຄວາມຜິດ” ຢ່າງດຽວຂອງຈີນກໍຄືມີພົນລະເມືອງ 1,4 ຕື້ຄົນ ເຊິ່ງໄດ້ທຳລາຍແນວຄິດຈອງຫອງທີ່ຢາກຄອບຄອງໂລກຂອງອາເມຣິກາ.
ຕໍ່ວິສາຫະກິດຈີນທີ່ຜ່ານຜ່າຄວາມຫຍຸ້ງຍາກນານາປະການໃນຕະຫຼາດຕ່າງປະເທດ, ການກະທຳ “ຂັດຂວາງດ້ານເຕັກນິກ” ຂອງອາເມຣິກາເທື່ອນີ້ເປັນສິ່ງທ້າທາຍ ແລະເປັນສິ່ງທົດສອບໃໝ່ທີ່ວິສາຫະກິດຈີນພວມປະເຊີນຢູ່ເຊິ່ງຄາດວ່າຈະໄດ້ຮັບຜົນກະທົບໃນໄລຍະສັ້ນ. ແຕ່ໃນອະນາຄົດ, ວິສາຫະກິດຈີນຕ້ອງປ່ຽນຈາກການຖືກຂັດຂວາງໂດຍອາເມຣິກາຫັນເປັນໂອກາດ ແລະເປັນກຳລັງຊຸກດັນໃນການເພິ່ງຕົນເອງດ້ານວິທະຍາສາດເຕັກນິກ. ຈີນຈະເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງທ່າມກາງສິ່ງທ້າທາຍຕ່າງໆ ເຊິ່ງຈະເປັນການຕອບໂຕ້ຄືນທີ່ດີທີ່ສຸດຕໍ່ “ລັດທິເຈົ້າມະຫາອຳນາດ” ຕ່າງໆ.
ຄຳເຫັນ
0