ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານສີຈິ້ນຜິງ ປະທານປະເທດຈີນໄດ້ເດີນທາງເຖິງດູຊັນແບດ້ວຍເຮືອບິນພິເສດໃນວັນທີ 14 ມິຖຸນານີ້ ເພື່ອເຂົ້າຮ່ວມກອງປະຊຸມມາດຕະການປະສານງານແລະສ້າງຄວາມໄວ້ເນື້ອເຊື່ອໃຈກັນຂອງອາຊີຄັ້ງທີ 5 ທັງຢ້ຽມຢາມຕັດຊີກີສະຖານທາງລັດຖະກິດ.
ເວລາ 18:00 ໂມງຂອງວັນທີ 14 ມິຖຸນານີ້ຕາມເວລາທ້ອງຖິ່ນ, ທ່ານສີຈິ້ນຜິງ ໄດ້ເດີນທາງເຖິງສະໜາມບິນສາກົນດູຊັນແບດ້ວຍເຮືອບິນພິເສດ ທ່ານ ເອໂມມາລີ ຣາມອນ ປະທານາທິບໍດີຕັດຊີກີສະຖານໄດ້ໄປຕ້ອນຮັບທ່ານສີຈິ້ນຜິງຢູ່ສະໜາມບິນດັ່ງກ່າວ. ທ່ານສີຈິ້ນຜິງ ກ່າວວ່າ: ຈີນແລະຕັດຊີກີສະຖານເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ຄູ່ຮ່ວມມືທີ່ດີ ແລະ ເປັນອ້າຍນ້ອງກັນທີ່ດີ ໃນທຸກເຊັ່ນຄົນ. ນັບແຕ່ສອງປະເທດສ້າງຕັ້ງສາຍພົວພັນທາງການທູດຕະຫຼອດໄລຍະ 27 ປີຜ່ານມາ, ການພົວພັນລະຫວ່າງຈີນ-ຕັດຊີກີສະຖານໄດ້ຮັກສາການພັດທະນາຢ່າງປອດໃສແລະໝັ້ນທ່ຽງ. ປີ 2017, ຂ້າພະເຈົ້າແລະທ່ານປະທານາທິບໍດີຣາມອນໄດ້ຮ່ວມກັນຕົກລົງສ້າງຕັ້ງສາຍພົວພັນຄູ່ຮ່ວມຍຸດທະສາດຮອບດ້ານຈີນ-ຕັດຊີກີສະຖານ ເຊິ່ງເຮັດໃຫ້ການພົວພັນລະຫວ່າງສອງປະເທດໄດ້ເຂົ້າສູ່ໄລຍະໃໝ່ທີ່ມີການພັດທະນາຢ່າງວ່ອງໄວ. ຂະນະທີ່ຂ້າພະເຈົ້າເດີນທາງຢ້ຽມຢາມຕັດຊີກີສະຖານເທື່ອນີ້ກໍເພື່ອຊຸກຍູ້ສາຍພົວພັນລະຫວ່າງສອງປະເທດໃຫ້ພັດທະນາຂຶ້ນສູ່ລະດັບສູງກວ່າເກົ່າ.
ທ່ານສີຈິ້ນຜິງ ກ່າວເນັ້ນວ່າ: ກອງປະຊຸມສຸດຍອດດູຊັນແບມີຄວາມໝາຍສຳຄັນຕໍ່ການພັດທະນາການປະສານງານແລະສ້າງຄວາມໄວ້ເນື້ອເຊື່ອໃຈກັນຂອງອາຊີໃນອະນາຄົດ. ຝ່າຍຕ່າງໆຈະປຶກສາຫາລືຮ່ວມກັນກ່ຽວກັບແຜນການພັດທະນາການປະສານງານແລະສ້າງຄວາມໄວ້ເນື້ອເຊື່ອໃຈກັນຂອງອາຊີ, ກຳນົດທິດທາງຈຸດສຸມຂອງການຮ່ວມມື. ຕັດຊີກີສະຖານໃນຖານະເປັນປະເທດປະທານໝູນວຽນ ໄດ້ກຽມຄວາມພ້ອມຢ່າງຫຼວງຫຼາຍເພື່ອກອງປະຊຸມຄັ້ງນີ້. ເຊື່ອວ່າດ້ວຍຄວາມພະຍາຍາມຂອງບັນດາຝ່າຍ, ກອງປະຊຸມສຸດຍອດຄັ້ງນີ້ຈະໄດ້ຮັບຜົນສຳເລັດຢ່າງເຕັມເມັດເຕັມໜ່ວຍ ແລະ ທຸ່ມເທພະລັງຊີວິດໃໝ່ເພື່ອການພັດທະນາການປະສານງານແລະສ້າງຄວາມໄວ້ເນື້ອເຊື່ອໃຈກັນຂອງອາຊີໃນອະນາຄົດ.
ຄຳເຫັນ
0