ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 27 ມິຖຸນານີ້, ທ່ານສີຈິ້ນຜິງ ປະທານປະເທດຈີນ ຈະເດີນທາງ ເຂົ້າຮ່ວມກອງປະຊຸມສຸດຍອດ G20 ທີ່ຈັດຂຶ້ນຢູ່ໂອຊາກາ ປະເທດຍີ່ປຸ່ນ. ນີ້ແມ່ນທ່ານປະທານສີຈິ້ນຜິງເຂົ້າຮ່ວມຫຼືເປັນປະທານຂອງກອງປະຊຸມສຸດຍອດ G20 ເປັນຄັ້ງທີ 7 ຢ່າງລຽນຕິດ. ໃນກອງປະຊຸມສຸດຍອດທຸກຄັ້ງຜ່ານມາ, ຜູ້ນຳຈີນໄດ້ສະເໜີຄວາມເຫັນຂອງຈີນ, ປະກອບສ່ວນສະຕິປັນຍາຂອງຈີນເພື່ອປັບປຸງການບໍລິຫານເສດຖະກິດໂລກໃຫ້ດີຂຶ້ນ ເຊິ່ງໄດ້ສະແດງໃຫ້ເຫັນວ່າ ຈີນໃຫ້ຄວາມສຳຄັນຢ່າງສູງຕໍ່ການເຂົ້າຮ່ວມໃນການຮ່ວມມືຂອງ G20 ແລະມີຄວາມຮັບຜິດຊອບໃນຖານະປະເທດໃຫຍ່.
ກອງປະຊຸມສຸດຍອດ G20 ຈັດຂຶ້ນຄັ້ງທຳອິດໃນສະພາບຫຍຸ້ງຍາກ. ປີ 2008, ວິກິດການດ້ານການເງິນທີ່ເກີດຂຶ້ນຈາກອາເມຣິກາໄດ້ແຜ່ຂະຫຍາຍໄປທົ່ວໂລກ. ເພື່ອຫຼີກເວັ້ນບໍ່ໃຫ້ວິກິດການຮ້າຍແຮງຂຶ້ນຈົນເຮັດໃຫ້ເສດຖະກິດໂລກຊຸດໂຊມລົງຢ່າງໜັກໜ່ວງ, ຜູ້ນຳກຸ່ມ 20 ປະເທດຈິ່ງໄດ້ປຶກສາຫາລືເຖິງວິທີຮັບມືເປັນຄັ້ງທຳອິດຢູ່ນະຄອນຫຼວງວໍຊິງຕັນຂອງອາເມຣິກາ ຂະນະດຽວກັນ, ປະເທດພວມພັດທະນາແລະກຸ່ມເສດຖະກິດຈະເລີນໃໝ່ໄດ້ເສີມຂະຫຍາຍບົດບາດສຳຄັນ, ກຸ່ມເສດຖະກິດຂອງບັນດາປະເທດສະມາຊິກໄດ້ໃຊ້ມາດຕະການກະຕຸ້ນທາງດ້ານເງິນຕາ, ເປີດກວ້າງການເງິນແລະປະຕິຮູບການຕິດຕາມຄຸ້ມຄອງແລະອື່ນໆໂດຍມີການປະສານງານກັນ ເຊິ່ງສາມາດຄວບຄຸມວິກິດການຢ່າງມີປະສິດທິຜົນແລະສາມາດກອບກູ້ຄວາມເຊື່ອໝັ້ນຂອງຕະຫຼາດ.
10 ປີຜ່ານມາ, ກອງປະຊຸມສຸດຍອດ G20 ໄດ້ຄ່ອຍໆຫັນປ່ຽນຈາກ “ກົນໄກຮັບມືກັບວິກິດການ" ມາເປັນ “ກົນໄກຄຸ້ມຄອງບໍລິຫານເສດຖະກິດໂລກຢ່າງມີປະສິດທິຜົນໃນໄລຍະຍາວ", ແລະກາຍເປັນກົນໄກຫຼາຍຝ່າຍທີ່ສຳຄັນໃນຂົງເຂດເສດຖະກິດສາກົນ. ແຕ່ວ່າ, ເມື່ອຜະເຊີນກັບລັດທິຝ່າຍດຽວ, ລັດທິປົກປ້ອງ ແລະແນວຄິດຝືນໂລກພິວັດທີ່ປະກົດຂຶ້ນ, ໂດຍສະເພາະແມ່ນອາເມລິກາສ້າງຄວາມຂັດແຍ້ງດ້ານການຄ້າແຕ່ຝ່າຍດຽວນັບມື້ຮ້າຍແຮງຂຶ້ນນັ້ນ, ເຮັດໃຫ້ສະມາຊິກ G20 ໄດ້ຮັບຜົນກະທົບໃນລະດັບຕ່າງກັນ, ເຊິ່ງເປັນສິ່ງທ້າທາຍທີ່ກອງປະຊຸມສຸດຍອດ G20ໂອຊາກາຄັ້ງນີ້ຕ້ອງຜະເຊີນນັ້ນ ຍິ່ງສັບສົນແລະເຄັ່ງຕຶງກວ່າເກົ່າ.
ຕາມຂໍ້ມູນຈາກອົງການຮ່ວມມືແລະພັດທະນາເສດຖະກິດ (OECD)ສະແດງໃຫ້ເຫັນວ່າ, ໃນໄຕມາດທີໜຶ່ງປີນີ້, ການສົ່ງອອກຂອງປະເທດສະມາຊິກ G20ສ່ວນຫຼາຍຫຼຸດລົງ, ການເຕີບໂຕດ້ານເສດຖະກິດກໍ່ອ່ອນເພຍລົງ, ສ່ວນການສົ່ງອອກຂອງສ.ເກົາຫຼີ, ບຼາຊິນ, ຣັດເຊຍ, ອິນໂດເນເຊຍ, ແລະຍີ່ປຸ່ນແຮ່ງຫຼຸດລົງຢ່າງຫຼວງຫຼາຍເມື່ອທຽບກັບໄລຍະດຽວກັນຂອງປີຜ່ານມາ, ໃນນັ້ນ, ສ.ເກົາຫຼີຫຼຸດລົງຫຼາຍກວ່າໝູ່ເຖິງ 7,1%. ສ.ເກົາຫຼີເປັນປະເທດທີ່ໄດ້ຮັບຜົນກະທົບໄວທີ່ສຸດຕໍ່ກຳລັງກົດດັນດ້ານເສດຖະກິດທົ່ວໂລກ, ຈົນຖືກຂະໜານນາມວ່າເປັນ “ນົກນ້ອຍ”ຂອງເສດຖະກິດໂລກ. ການຫຼຸດລົງທາງດ້ານເສດຖະກິດຂອງສ.ເກົາຫຼີອາດຈະເປັນການສະແດງໃຫ້ເຫັນເຖິງຄວາມສ່ຽງທີ່ເສດຖະກິດໂລກຈະຕົກຢູ່ໃນສະພາບຖອຍຫຼັງຈົນກະທັ້ງເກີດວິກິດການ.ຈີນໄດ້ເສີມຂະຫຍາຍບົດບາດສຳຄັນຕໍ່ການຄວບຄຸມຄວາມກັງວົນດ້ານການເງິນແລະແກ້ໄຂວິກິດການ. ໃນກອງປະຊຸມສຸດຍອດ G20 ທີ່ຈັດຂຶ້ນຢູ່ນະຄອນຫາງໂຈ່ວປີ 2016, ຈີນໄດ້ສະເໜີວິທີແກ້ໄຂເສດຖະກິດໂລກແບບສັງລວມ, ໃນນັ້ນລວມທັງຈຸດຢືນຕ່າງໆເຊັ່ນ: ເພີ່ມທະວີການປະສານງານດ້ານນະໂຍບາຍເສດຖະກິດມະຫາພາກ, ການພັດທະນາດ້ວຍການປະດິດສ້າງໃໝ່, ຂຸດຄົ້ນກຳລັງແຮງດ້ານການເຕີບໂຕເສດຖະກິດ, ປັບປຸງການບໍລິຫານເສດຖະກິດໂລກໃຫ້ສົມບູນຂຶ້ນ, ສ້າງເສດຖະກິດໂລກທີ່ເປີດປະຕູ, ຊຸກຍູ້ການເຕີບໂຕແບບກວມລວມແລະຍືນຍົງແລະອື່ນໆ, ເຊິ່ງໄດ້ສະແດງໃຫ້ເຫັນທ່າທີຂອງຈີນໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ, ແລະໄດ້ຮັບຄວາມຍ້ອງຍໍຊົມເຊີຍຈາກປະຊາຄົມໂລກ.
ພາຍໃຕ້ສະພາບການທີ່ມີຄວາມສ່ຽງແລະຄວາມບໍ່ແນ່ນອນຂອງໂລກເພີ່ມຂຶ້ນ, ທົ່ວໂລກຫວັງວ່າ G20 ຈະສາມາດກາຍເປັນໜ່ວຍງານທີ່ມີຄວາມສາມາດປະຕິບັດຕົວຈິງແຕ່ບໍ່ແມ່ນສົນທະນາກັນຊື່ໆ, ບັນດາຝ່າຍຄວນປະສານງານຫຼັກໝັ້ນຂອງຕົນ, ແກ້ໄຂຄວາມຂັດແຍ້ງກັນຢ່າງເໝາະສົມ, ບັນລຸຄວາມເປັນເອກະພາບກັນ, ເພີ່ມທະວີການຮ່ວມມື, ສ້າງຈຸດພົ້ນເດັ່ນທີ່ປະຈັກຕາໃນສະພາບການທີ່ການເຕີບໂຕຂອງເສດຖະກິດໂລກຫຼຸດລົງ.
ຄຳເຫັນ
0