ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
CRI ລາຍງານວ່າ: ເມື່ອບໍ່ດົນມານີ້, ທ່ານເທັນກອກວາຍ ທູດພິເສດສະເພາະວຽກງານພົວພັນກັບຈີນຂອງມາເລເຊຍໃຫ້ສຳພາດຕໍ່ນັກຂ່າວວ່າ: ປີນີ້ເປັນປີຄົບຮອບ 45 ປີຂອງການສ້າງຕັ້ງສາຍພົວພັນທາງການທູດມາເລເຊຍ-ຈີນ, ສາຍພົວພັນມາເລເຊຍ-ຈີນໄດ້ຂະຫຍາຍຕົວມາຮອດໄລຍະທີ່ພັດທະນາດີທີ່ສຸດໃນປະຫວັດສາດ ເຊິ່ງສາມາດຍາດໄດ້ຜົນສຳເລັດທີ່ດີໃນດ້ານການຄ້າ, ການລົງທຶນແລະການແລກປ່ຽນດ້ານວັດທະນະທຳ.
ເມື່ອເວົ້າເຖິງຜົນສຳເລັດທີ່ສອງປະເທດຍາດມາໄດ້ໃນການຮ່ວມມືຫຼາຍຂົງເຂດ ໃນຊຸມປີມໍ່ໆມານີ້, ທ່ານເທັນກອກວາຍກ່າວວ່າ: ການຄ້າມາເລເຊຍ-ຈີນໄດ້ກວມຍອດມູນຄ່າການຄ້າຈີນ-ອາຊຽນຫຼາຍກວ່າ 1 ສ່ວນ 5 ເຊິ່ງສະແດງໃຫ້ເຫັນເຖິງສາຍພົວພັນທີ່ແໜ້ນແຟ້ນເປັນພິເສດລະຫວ່າງມາເລເຊຍ-ຈີນ. ຂະນະທີ່ແຕ່ປີ 2017-2018, ຈີນໄດ້ລົງທຶນໂດຍກົງຢູ່ມາເລເຊຍໄດ້ເພີ່ມຂຶ້ນເຖິງ 410,8%, ເຊິ່ງສະແດງໃຫ້ເຫັນວ່າ ນັກທຸລະກິດຈີນມີຄວາມເຊື່ອມໝັ້ນຢ່າງສູງຕໍ່ສະພາບລວມດ້ານເສດຖະກິດການເມືອງແລະສະພາບການລົງທຶນຂອງມາເລເຊຍ. ໃນດ້ານການແລກປ່ຽນວັດທະນະທຳ, ຈຳນວນນັກທ່ອງທ່ຽວຈີນທີ່ເດີນທາງໄປທ່ຽວມາເລເຊຍໄດ້ເພີ່ມຂຶ້ນຢ່າງຕໍ່ເນື່ອງ ເຊິ່ງໄດ້ເພີ່ມທະວີຄວາມເຂົ້າໃຈກັນ ຕື່ມອີກລະຫວ່າງປະຊາຊົນສອງຊາດ.
ເມື່ອກ່າວເຖິງຂໍ້ລິເລີ່ມ "ໜຶ່ງແລວໜຶ່ງເສັ້ນທາງ"ຂອງຈີນ, ທ່ານເທັນກອກວາຍຢືນຢັນວ່າ: ມາເລເຊຍ-ຈີນຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ເຊິ່ງໄດ້ຊຸກຍູ້ການແລກປ່ຽນແລະຄວາມເຂົ້າໃຈເຊິ່ງກັນແລະກັນລະຫວ່າງປະຊາຊົນໃຫ້ຫຼາຍຂຶ້ນ ທັງສາມາດປັບປຸງພື້ນຖານຄວາມໄວ້ເນື້ອເຊື່ອໃຈກັນລະຫວ່າງສອງປະເທດໃນການຮ່ວມມືດ້ານເສດຖະກິດການຄ້າແລະການທຳຄວາມເຂົ້າໃຈກັນດ້ານນະໂຍບາຍຕ່າງໆລະຫວ່າງສອງປະເທດໃຫ້ເລິກເຊິ່ງກວ່າເກົ່າ.
ຄຳເຫັນ
0