ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຄະນະກຳມະການບໍລິຫານງານອົງການກອງທຶນເງິນຕາສາກົນ ຫຼື IMF ໄດ້ປະກາດໃນວັນທີ 16 ກໍລະກົດນີ້ຕາມເວລາທ້ອງຖິ່ນວ່າ: ຮັບເຫັນດີຕໍ່ການຮ້ອງຂໍຂໍລາອອກຈາກຕຳແໜ່ງ ຜູ້ອຳນວຍການໃຫຍ່ຂອງທ່ານນາງຄຣິສຕິນ ລາກາດ ແລະ ຈະເລີ່ມປະຕິບັດລະບຽບຄັດເລືອກຜູ້ອຳນວຍການໃຫຍ່ຊຸດຕໍ່ໄປໃນທັນທີ. ໃນໄລຍະສຳຄັນທີ່ IMF ພວມດຳເນີນການກວດກາໂກຕາຄັ້ງທີ 15 ນັ້ນ, ບໍ່ວ່າຈະແມ່ນໃຜຈະເປັນຜູ້ເຂົ້າແທນຕຳແໜ່ງທ່ານນາງຄຣິສຕິນ ລາກາດ ກໍຕາມ ກໍຄວນກ້າວເດີນໄປຕາມກະແສຍຸກສະໄໝ, ຕັ້ງໜ້າຊຸກຍູ້ການປະຕິຮູບໂກຕາແລະການຄຸ້ມຄອງ IMF, ສືບຕໍ່ຍົກສູງສິດປະກອບຄຳເຫັນແລະຄວາມເປັນຕົວແທນຂອງປະເທດທີ່ເປັນຕະຫຼາດຈະເລີນໃໝ່ແລະປະເທດພວມພັດທະນາ ເພື່ອເຮັດໃຫ້ IMF ສາມາດປົກປ້ອງສິ່ງທີ່ຖືກຕ້ອງຕາມກົດໝາຍແລະການມີຜົນບັງຄັບໃຊ້ຂອງຕົນ.
ໃນຖານະເປັນໜຶ່ງໃນມໍລະດົກທີ່ສຳຄັນໃນລະບົບວຸດສ໌ ເບຣດຕັນ ທີ່ມີອາເມຣິກາແລະເອີຣົບເປັນແກນນຳ, IMF ໄດ້ສຸມໃສ່ຊຸກຍູ້ການຮ່ວມມືດ້ານເງິນຕາໃນໂລກ, ສະໜອງທຶນຮອນແລະການຊ່ວຍເຫຼືອ, ປົກປັກຮັກສາສະຖຽນລະພາບດ້ານການເງິນສາກົນ ແລະອື່ນໆ. ຫຼັງກ້າວເຂົ້າສູ່ສະຕະວັດທີ 21, ສະພາບເສດຖະກິດຂອງໂລກໄດ້ມີການປ່ຽນແປງຢ່າງໃຫຍ່ຫຼວງ ດ້ານໜຶ່ງ, ກຸ່ມເສດຖະກິດຈະເລີນໃໝ່ໄດ້ມີການພັດທະນາກ້າວຂຶ້ນຢ່າງວ່ອງໄວ, ມີບົດບາດແລະອິດທິພົນຕໍ່ເສດຖະກິດໂລກນັບມື້ນັບເພີ່ມຂຶ້ນ ແລະ ປະກອບສ່ວນຕໍ່ການເຕີບໂຕຂອງເສດຖະກິດໂລກເພີ່ມຂຶ້ນເລື້ອຍໆ. ນອກຈາກນີ້, ລະບົບການຄຸ້ມຄອງເສດຖະກິດໂລກໃນປັດຈຸບັນພັດມີບົດບາດນັບມື້ນັບອ່ອນແອລົງໃນການຫຼຸດຜ່ອນສະພາບການເສຍຄວາມດຸນດ່ຽງຂອງເສດຖະກິດໂລກ, ຊຸກຍູ້ຂະບວນການການຄ້າຫຼາຍຝ່າຍ, ແກ້ໄຂວິກິດການດ້ານໜີ້ສິນພາກລັດ ແລະອື່ນໆ. ພາຍໃຕ້ເງື່ອນໄຂດັ່ງກ່າວ, ການຊຸກຍູ້ການປະຕິຮູບ IMF, ຍົກສູງການມີສ່ວນຮ່ວມແລະສິດປາກເວົ້າໃນວຽກງານເສດຖະກິດໂລກຂອງຕະຫຼາດຈະເລີນໃໝ່ແລະປະເທດພວມພັດທະນາແມ່ນທ່າອ່ຽງລວມທີ່ຕ້ອງເປັນໄປ.
ແຕ່ວ່າ, ເບິ່ງຈາກຖານະຂອງກຸ່ມເສດຖະກິດຕ່າງໆໃນສະພາບການເສດຖະກິດໂລກແລ້ວ, ໂກຕາແລະສະພາບການຄຸ້ມຄອງຂອງ IMFຍັງບໍ່ສາມາດສ່ອງແສງໃຫ້ເຫັນເຖິງການປ່ຽນແປງສະຖານະພາບເສດຖະກິດໂລກຢ່າງພາວະວິໄສ. ຕົວຢ່າງວ່າ, GDP ຂອງປະເທດທີ່ມີຕະຫຼາດພັດທະນາໃໝ່ແລະປະເທດທີ່ພວມພັດທະນາໄດ້ກວມເຄິ່ງໜຶ່ງຂອງເສດຖະກິດໂລກແລ້ວ, ໄດ້ກວມອັດຕາການປະກອບສ່ວນຕໍ່ການເຕີບໂຕຫຼາຍກວ່າ 80% ຂອງເສດຖະກິດໂລກ, ອັດຕາສ່ວນຂອງອາເມຣິກາໃນເສດຖະກິດໂລກໄດ້ຫຼຸດລົງເປັນປະມານ 20% ແລ້ວ, ແຕ່ວ່າປັດຈຸບັນອາເມຣິກາຍັງມີສິດປ່ອນບັດຫຼາຍທີ່ສຸດໃນ IMF, ເປັນ 16,52%, ແລະຍັງມີສິດຢັບຢັ້ງແຕ່ບັດດຽວໃນນະໂຍບາຍສຳຄັນ, ປະເທດທີ່ພັດທະນາແລ້ວຍັງມີຖານະນຳພາໃນ IMF.
ສະພາບການດັ່ງກ່າວທີ່ອັດຕາສ່ວນປ່ອນບັດຂອງກຸ່ມເສດຖະກິດຕ່າງໆບໍ່ເໝາະກັບຖານະເສດຖະກິດ, ບໍ່ພຽງແຕ່ໄດ້ທຳລາຍຜົນປະໂຫຍດຂອງປະເທດທີ່ມີຕະຫຼາດພັດທະນາໃໝ່ແລະປະເທດທີ່ພວມພັດທະນາເທົ່ານັ້ນ, ຍັງໄດ້ກະທົບເຖິງຄວາມເປັນຕົວແທນ, ລັກສະນະພາວະວິໄສແລະຊອບດ້ວຍກົດໝາຍຂອງ IMF. ຍ້ອນແນວນີ້, ທ່ານເດວິດ ລິບຕັນ ຮັກສາການຜູ້ອຳນວຍການໃຫຍ່ IMF ກ່າວວ່າ: “ຢາກຮັກສາອິດທິພົນແລະຊັບພະຍາກອນທົ່ວໂລກຂອງ IMF, ຕ້ອງຍົກສູງສິດປະກອບຄຳຄິດຄຳເຫັນຂອງປະເທດທີ່ມີຄວາມສຳຄັນດ້ານເສດຖະກິດຍົກສູງຂຶ້ນແລະກຽມແບກຫາບຄວາມຮັບຜິດຊອບທີ່ກ່ຽວຂ້ອງ.” ມີແຕ່ເຮັດແບບນີ້, IMF ຈຶ່ງຈະສາມາດຮັກສາລັກສະນະພາວະວິໄສແລະຊອບດ້ວຍກົດໝາຍຂອງຕົນ, ແລະຮັບມືກັບວິກິດການຢ່າງມີປະສິດທິຜົນດີຂຶ້ນກວ່າເກົ່າ, ຮັກສາຄວາມໝັ້ນຄົງຂອງການທະນາຄານສາກົນ, ຊຸກຍູ້ໃຫ້ການຄຸ້ມຄອງບໍລິຫານເສດຖະກິດໂລກກ້າວໄປສູ່ທິດທາງທີ່ຍຸຕິທຳກວ່າເກົ່າແລະສົມເຫດສົມຜົນກວ່າເກົ່າ.
ຄຳເຫັນ
0