ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເມື່ອບໍ່ດົນມານີ້, ທ່ານເຝິງຢວນຫຼຽງ ອະດີດບັນນາທິການໃຫຍ່ຂອງໜັງສືພິມ “ເດີສະເຕຣດສ໌ທາມສ໌” ຂອງສິງກະໂປ ໄດ້ພິມບົດຄວາມທີ່ພາດຫົວຂໍ້ວ່າ “ການພົວພັນທີ່ແປກປະຫຼາດລະຫວ່າງພາສີ, ຢາປະເພດທີ່ມີສ່ວນຜະສົມຂອງຢາຝິ່ນ ແລະ ຢາຝິ່ນ” ລົງໃນໜັງສືພິມ “ເດີສະເຕຣດສ໌ທາມສ໌” ໂດຍຊີ້ອອກວ່າ: ທ່ານໂດໂນ ທຣຳ ປະທານາທິບໍດີອາເມຣິກາໄດ້ຈັດເອົາວິກິດການໃນການນຳໃຊ້ຢາປະເພດທີ່ມີສ່ວນຜະສົມຂອງຢາຝິ່ນທົ່ວທີບພາຍໃນປະເທດຕົນຕິດພັນກັບບັນຫາການຄ້າລະຫວ່າງສອງກຸ່ມເສດຖະກິດທີ່ໃຫຍ່ທີ່ສຸດໃນໂລກ ເຊິ່ງເປັນເລື່ອງທີ່ເຮັດໃຫ້ເຂົ້າໃຈໄດ້ຍາກ.
ບົດຄວາມລະບຸວ່າ: ໃນຂະນະທີ່ທົ່ວໂລກລ້ວນແຕ່ເຫັນວ່າ ຈີນແລະອາເມຣິກາມີຄວາມຄືບໜ້າເປັນຢ່າງດີໃນການເຈລະຈາການຄ້າຮອບໃໝ່ຫຼ້າສຸດ, ທ່ານໂດໂນ ທຣຳ ພັດໄດ້ປະກາດວ່າອາດຈະຂຶ້ນພາສີຕໍ່ສິນຄ້ານຳເຂົ້າຈາກຈີນໃນມູນຄ່າ 300 ຕື້ໂດລາສະຫະລັດນັບແຕ່ວັນທີ 1 ກັນຍາໜ້ານີ້ເປັນຕົ້ນໄປ ໂດຍຫາເຫດຜົນທີ່ວ່າ “ຈີນບໍ່ໄດ້ສະກັດກັ້ນຢາປະເພດເຟນຕານິນທີ່ໄຫຼເຂົ້າສູ່ອາເມຣິກາ” ຖືວ່າເປັນໜຶ່ງໃນຂໍ້ອ້າງຕ່າງໆຂອງການຂຶ້ນພາສີໃນຄັ້ງນີ້ ແຕ່ໃນຄວາມເປັນຈິງແລ້ວແມ່ນການຫັນປ່ຽນວິກິດການໃນການນຳໃຊ້ຢາປະເພດທີ່ມີສ່ວນຜະສົມຂອງຢາຝິ່ນທົ່ວທີບພາຍໃນປະເທດອາເມຣິກາເອງແລ້ວຍົກລະດັບຂຶ້ນເປັນຄວາມຂັດແຍ້ງດ້ານການຄ້າລະຫວ່າງອາເມຣິກາກັບຈີນ. ການກະທຳດັ່ງກ່າວເປັນເລື່ອງທີ່ເໜືອຈິນຕະນາການ. ຖ້າວ່າການກະທຳແບບນີ້ເປັນຍຸດໂທບາຍດ້ານການເຈລະຈາຂອງເຂົາ ຄັນຊັ້ນ, ຜົນການເຈລະຈາລະຫວ່າງຈີນ-ອາເມຣິກາໃນໄລຍະຜ່ານມາຈົນຮອດປັດຈຸບັນໄດ້ສະແດງໃຫ້ເຫັນວ່າ ເປັນການກະທຳຂອງເຂົາເຊິ່ງບໍ່ອາດບັນລຸຜົນຕາມການຄາດຫວັງໄດ້.
ບົດຄວາມລະບຸຕື່ມວ່າ: ຢູ່ອາເມຣິກາໄດ້ເກີດວິກິດການໃນການນຳໃຊ້ຢາປະເພດທີ່ມີສ່ວນຜະສົມຂອງຢາຝິ່ນ ເຊິ່ງສາເຫດໃນເບື້ອງຕົ້ນຄື: ບໍລິສັດຜະລິດຢາທີ່ກ່ຽວຂ້ອງບໍ່ໄດ້ໃຫ້ຄຳແນະນຳຢ່າງພຽງພໍເພື່ອເຕືອນອາການຕິດຢາປະເພດນີ້, ຊ້ຳບໍ່ໜຳຍັງຮຽກຮ້ອງໃຫ້ແພດໝໍຂາຍຢາປະເພດນີ້ໃຫ້ຫຼາຍຂຶ້ນໃນຂະນະທີ່ອອກໃບສັ່ງຢາໃຫ້ຄົນເຈັບ ແລະ ໃນເວລາເກີດອາການແງ້ນຢາປະເພດທີ່ມີສ່ວນຜະສົມຂອງຢາຝິ່ນ ເຊິ່ງເປັນປາກົດການທີ່ບໍ່ສາມາດປ່ອຍປະລະເລີຍໄດ້ອີກ ສະນັ້ນ, ລັດຖະບານອາເມຣິກາຈຶ່ງເລີ່ມຈຳກັດການນຳໃຊ້ຢາປະເພດນີ້ໃນໃບສັ່ງຢາຂອງແພດ. ຄວາມຈິງແລ້ວ, ການສັງເຄາະຢາເຟນຕານິນກໍບໍ່ເປັນເລື່ອງຍາກ ທະແນມແຕ່ໄດ້ວັດຖຸດິບທີ່ຕ້ອງການໃນການສັງເຄາະ, ເພສັດສະກອນກໍສາມາດສັງເຄາະໃຫ້ເປັນຢາໄດ້ໃນຫ້ອງທົດລອງຂອງໂຮງຮຽນ. ຂະນະທີ່ພາກສ່ວນຕົ້ນຕໍໃນການສັງເຄາະຢາເຟນຕານິນກໍສາມາດຊື້ຈາກຫ້ອງທົດລອງຂະໜາດນ້ອຍເພື່ອການຄ້າໃນນະຄອນແຮມເບີກປະເທດເຢຍລະມັນ ຫຼື ໃນນະຄອນ ໄຮເດຣາເບດປະເທດປາກິສະຖານໄດ້ຢ່າງງ່າຍດາຍ. ຂະນະທີ່ເຟນຕານິນຫໍ່ນ້ອຍໆກໍສາມາດຝາກສົ່ງໄປສູ່ອາເມຣິກາໄດ້ຈາກແຫ່ງຕ່າງໆຂອງໂລກ.
ບົດຄວາມຍັງຊີ້ໃຫ້ເຫັນຕື່ມວ່າ: ອາເມຣິກາປະຖິ້ມຄວາມຮັບຜິດຊອບຕໍ່ວິກິດການໃນການນຳໃຊ້ຢາປະເພດທີ່ມີສ່ວນຜະສົມຂອງຢາຝິ່ນພາຍໃນປະເທດຕົນແລ້ວຫັນເຫຄວາມສົນໃຈສູ່ຈີນ ເຊິ່ງເປັນການກະທຳທີ່ຈອມປອມ. ຈີນໄດ້ເຮັດວຽກຢ່າງຫຼວງຫຼາຍແລະພຽງພໍໃນບັນຫາຢາເຟນຕານິນ, ສ່ວນຄຳຕຳໜິວິຈານຂອງອາເມຣິການັ້ນບໍ່ມີເຫດຜົນແຕ່ຢ່າງໃດເລີຍ.
ຄຳເຫັນ
0