ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມລັດຖະມົນຕີກະຊວງການຕ່າງປະເທດຈີນ, ຍີ່ປຸ່ນ ແລະ ສ.ເກົາຫຼີຄັ້ງທີ 9 ໄດ້ຈັດຂຶ້ນໃນວັນທີ 21 ສິງຫານີ້ຢູ່ນະຄອນຫຼວງປັກກິ່ງ ໂດຍມີທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນເປັນປະທານ ແລະ ທ່ານຄວງວາຄາງ ລັດຖະມົນຕີກະຊວງການຕ່າງປະເທດ ສ.ເກົາຫຼີ, ທ່ານທາໂຣະ ໂກໂນ ລັດຖະມົນຕີກະຊວງການຕ່າງປະເທດຍີ່ປຸ່ນເຂົ້າຮ່ວມ.
ທ່ານຫວາງຢີ້ ກ່າວວ່າ: ປີນີ້ແມ່ນປີຄົບຮອບ 20 ປີຂອງການຮ່ວມມືລະຫວ່າງຈີນ, ຍີ່ປຸ່ນ ແລະ ສ.ເກົາຫຼີ. ການຮ່ວມມືລະຫວ່າງສາມປະເທດບໍ່ພຽງແຕ່ໄດ້ຊຸກຍູ້ການພັດທະນາຂອງແຕ່ລະປະເທດເທົ່ານັ້ນ ແຕ່ຍັງໄດ້ປະກອບສ່ວນອັນສຳຄັນຕໍ່ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ ກໍຄືຂອງໂລກອີກດ້ວຍ. ສິ່ງບົ່ງບອກຈາກການຮ່ວມມືລະຫວ່າງສາມປະເທດຕະຫຼອດໄລຍະ 20 ປີຜ່ານມານັ້ນ ຄື: ມີພຽງແຕ່ເສີມສ້າງຄວາມໄວ້ເນື້ອເຊື່ອໃຈກັນເລື້ອຍໆ ການຮ່ວມມືລະຫວ່າງສາມຝ່າຍຈຶ່ງມີການພັດທະນາຂຶ້ນເລື້ອຍໆເຊັ່ນກັນ; ມີພຽງແຕ່ເຊື່ອມໂຍງຜົນປະໂຫຍດລະຫວ່າງສາມຝ່າຍໃຫ້ເຂົ້າກັນຢ່າງເລິກເຊິ່ງ ຈຶ່ງເຮັດໃຫ້ການຮ່ວມມືລະຫວ່າງສາມຝ່າຍມີພະລັງຊຸກດັນທີ່ແຂງແຮງ; ມີພຽງແຕ່ແກ້ໄຂຄວາມຂັດແຍ້ງຢ່າງເໝາະສົມ ຈຶ່ງສາມາດຮັບປະກັນສະພາບລວມຂອງການຮ່ວມມືລະຫວ່າງສາມຝ່າຍໄດ້. ສະນັ້ນ, ສາມຝ່າຍຄວນພະຍາຍາມຮ່ວມກັນ ເພື່ອໃຫ້ການຮ່ວມມືລະຫວ່າງສາມຝ່າຍໄດ້ຮັບໝາກຜົນອັນອຸດົມສົມບູນກວ່າເກົ່າໃນໄລຍະ 20 ປີຕໍ່ໜ້ານີ້.
ທ່ານຄວງວາຄາງ ແລະ ທ່ານທາໂຕະ ໂກໂນ ຕ່າງກໍໄດ້ຕີລາຄາຢ່າງສູງຕໍ່ຜົນໄດ້ຮັບໃນການຮ່ວມມືລະຫວ່າງຈີນ, ຍີ່ປຸ່ນ ແລະ ສ.ເກົາຫຼີຕະຫຼອດໄລຍະ 20 ປີຜ່ານມາ, ໄດ້ຢືນຢັນຢ່າງເຕັມສ່ວນຕໍ່ການຮ່ວມມືລະຫວ່າງສາມປະເທດທີ່ມີຄວາມໝາຍສຳຄັນຕໍ່ການຊຸກຍູ້ການພັດທະນາຂອງແຕ່ລະປະເທດ ກໍຄືສັນຕິພາບຂອງພາກພື້ນ ທັງເຫັນດີໃຫ້ສາມປະເທດສືບຕໍ່ຮັກສາສາຍພົວພັນລະຫວ່າງກັນໃຫ້ດີ, ຕັ້ງໜ້າຊຸກຍູ້ການຮ່ວມມືລະຫວ່າງສາມຝ່າຍ, ເລັ່ງລັດການເຈລະຈາ RCEP ແລະ ການເຈະລຈາເຂດການຄ້າເສລີຈີນ, ຍີ່ປຸ່ນ ແລະ ສ.ເກົາຫຼີ ເພື່ອຮ່ວມກັນປົກປ້ອງລັດທິຫຼາຍຝ່າຍແລະການຄ້າເສລີ.
ສາມຝ່າຍໄດ້ແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ແຕ່ລະຝ່າຍໃຫ້ຄວາມສົນໃຈຮ່ວມກັນ ແລະ ໄດ້ແລກປ່ຽນຄວາມເຫັນຢ່າງເຕັມສ່ວນກ່ຽວກັບການກະກຽມກອງປະຊຸມຜູ້ນຳຈີນ, ຍີ່ປຸ່ນ ແລະ ສ.ເກົາຫຼີຄັ້ງທີ 8 ທັງໄດ້ບັນລຸຂໍ້ຕົກລົງສຳຄັນ. ນອກນີ້, ກອງປະຊຸມຄັ້ງນີ້ຍັງໄດ້ຮັບຮອງເອົາເອກກະສານເບື້ອງຕົ້ນວ່າດ້ວຍການຮ່ວມມືຈີນ, ຍີ່ປຸ່ນ ແລະ ສ.ເກົາຫຼີ + X ອີກດ້ວຍ.
ຄຳເຫັນ
0