ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານນາງ ເມັດເຕີ ເຟຣເດີຣີກເຊັນ ນາຍົກລັດຖະມົນຕີດານມາກ ໄດ້ຈັດກອງປະຊຸມຂ່າວເປັນເວລາສັ້ນໆຢູ່ນະຄອນຫຼວງໂກເປັນຮາກໃນວັນທີ 21 ສິງຫານີ້ ເພື່ອສະແດງ “ຄວາມເສຍດາຍແລະຕົກຕະລຶງ” ຕໍ່ທ່ານ ໂດໂນ ທຣຳ ປະທານາທິບໍດີອາເມຣິກາທີ່ເລື່ອນເວລາຢ້ຽມຢາມປະເທດຕົນ ເຊິ່ງແຕ່ເດີມໄດ້ຕົກລົງວ່າຈະຢ້ຽມຢາມໃນຕົ້ນເດືອນກັນຍາໜ້ານີ້.
ທ່ານນາງ ເຟຣເດີຣີກເຊັນ ກ່າວວ່າ: ຕອນຄ່ຳວັນທີ 20 ສິງຫານີ້, ສະຖານທູດດານມາກປະຈຳອາເມຣິກາ ໄດ້ຮັບແຈ້ງການຈາກທຳນຽບຂາວກ່ຽວກັບການຍົກເລີກແຜນການຢ້ຽມຢາມຂອງທ່ານ ທຣຳ. ແຕ່ທ່ານກ່າວຕື່ມວ່າ, ການທີ່ທ່ານ ທຣຳ ເລື່ອນເວລາຢ້ຽມຢາມນັ້ນ ຈະບໍ່ກະທົບເຖິງການຮ່ວມມືທີ່ດີແລະການສົນທະນາທີ່ມີຢູ່ລະຫວ່າງດານມາກກັບອາເມຣິກາ, ດານມາກຫວັງຢາກສືບຕໍ່ສົນທະນາແລະຮ່ວມມືກັບອາເມຣິກາກ່ຽວກັບໂອກາດແລະສິ່ງທ້າທາຍໃນບໍລິເວນຂົ້ວໂລກເໜືອ.
ຕອນຄ່ຳວັນທີ 20 ສິງຫານີ້, ທ່ານ ທຣຳ ໄດ້ສະແດງຄວາມຄິດເຫັນລົງສື່ສັງຄົມອອນລາຍວ່າ: ຍ້ອນວ່າທ່ານນາງ ເຟຣເດີຣີກເຊັນ ນາຍົກລັດຖະມົນຕີດານມາກໄດ້ກ່າວໃນກ່ອນໜ້ານີ້ບໍ່ດົນວ່າ ທ່ານບໍ່ສົນໃຈຕໍ່ການປຶກສາຫາລືກ່ຽວກັບການຂາຍເກາະກຣີນແລນ, ສະນັ້ນ ຕົນຈະເລື່ອນເວລາການພົບປະລະຫວ່າງສອງຝ່າຍທີ່ແຕ່ເດີມຕົກລົງຈະຈັດຂຶ້ນພາຍໃນ 2 ອາທິດຂ້າງໜ້ານີ້.
ຄຳເຫັນ
0