ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ທ່ານນາງ ນານຊີ ເປໂລຊີ ປະທານສະພາຕ່ຳອາເມຣິກາ, ທ່ານ ມາໂຄຣ ຣູບີໂອ ສະມາຊິກສະພາສູງ ແລະຜູ້ອື່ນໆໄດ້ປ່າວຂ່າວຢ່າງເປີດເຜີຍວ່າ ຈະຊຸກຍູ້ການພິຈາລະນາເພື່ອຮັບຮອງ “ຮ່າງກົດໝາຍວ່າດ້ວຍສິດທິມະນຸດແລະປະຊາທິປະໄຕຂອງຮົງກົງ” ພາຍຫຼັງເປີດລັດຖະສະພາຄືນໃໝ່. ນີ້ເປັນການສະໜັບສະໜູນການກະທຳຜິດກົດໝາຍຂອງພວກຫົວຮຸນແຮງຢູ່ຮົງກົງ ເຊິ່ງທາດແທ້ແລ້ວແມ່ນເພື່ອບັນຈຸຈຸດປະສົງອັນໂຫດຫ້ຽມທີ່ຄັດຄ້ານຈີນແລະສ້າງຄວາມວຸ້ນວາຍຢູ່ຮົງກົງໂດຍນຳໃຊ້ບັນຫາຮົງກົງເປັນເຄື່ອງມື.
ເຈົ້າໜ້າທີ່ອາວຸໂສແລະອົງການທາງການເຊັ່ນ: ອົງການສືບຂ່າວລັບ CIA ເປັນຕົ້ນຂອງອາເມຣິກາພວມສະໜັບສະໜູນພວກຫົວຮຸນແຮງຢູ່ຮົງກົງ, ເຂົາເຈົ້າບໍ່ພຽງແຕ່ພົບປະແລະໃຫ້ຄຳແນະນຳສັ່ງສອນຕໍ່ພວກແບ່ງແຍກຮົງກົງໃຫ້ເປັນເອກະລາດແລະສະໜັບສະໜູນດ້ານການເງິນເທົ່ານັ້ນ, ຫາກຍັງຕຳໜິຈິຈານຢ່າງຂາດຄວາມຮັບຜິດຊອບກ່ຽວກັບສະຖານະການຢູ່ຮົງກົງເລື້ອຍໆ ທັງຂົ່ມຂູ່ວ່າຈະເອົາບັນຫາຮົງກົງໄປກ່ຽວພັນກັບບັນຫາເສດຖະກິດການຄ້າລະຫວ່າງອາເມຣິກາກັບຈີນອີກດ້ວຍ.
ນັບແຕ່ເດືອນມິຖຸນາປີນີ້ເປັນຕົ້ນມາ, ພວກຫົວຮຸນແຮງຈຳນວນໜຶ່ງຢູ່ຮົງກົງ ໄດ້ຫຼອນໂຈມຕີຕຳຫຼວດ, ທຳຮ້າຍນັກຂ່າວແລະນັກທ່ອງທ່ຽວ, ທຳລາຍຕຶກຫ້ອງການຂອງສະພານິຕິບັນຍັດຮົງກົງພ້ອມດ້ວຍຫ້ອງການປະສານງານຂອງລັດຖະບານກາງປະຈຳຮົງກົງ, ຢຽບຫຍາມທຸງຊາດແລະກາໝາຍຊາດຂອງຈີນແລະກາໝາຍຂອງເຂດບໍລິຫານພິເສດຮົງກົງ, ອັດຕັນປິດກັ້ນການຈະລາຈອນສາທາລະນະ ທັງເຮັດໃຫ້ສະໜາມບິນຮົງກົງເປັນອຳມະພາດ.
ກ່ຽວກັບເລື່ອງນີ້, ທ່ານສເຕຟານ ບາຣອນ ອະດີດບັນນາທິການໃຫຍ່ວາລະສານ “ເສດຖະກິດລາຍສັບປະດາ” ເຢຍລະມັນໄດ້ພິມບົດຄວາມລົງໜັງສືພິມ “ຮັນເດວສະບລາດ” ໂດຍຊີ້ໃຫ້ເຫັນວ່າ: ຖ້າການຈະລາຈົນແບບນີ້ເກີດຂຶ້ນຢູ່ອາເມຣິກາ, ອາດຈະຖືກປາບປາມຕັ້ງແຕ່ຫົວທີ່. ກົງກັນຂ້າມ, ນັກການເມືອງສຳຄັນບາງຄົນຂອງອາເມຣິກພັດໄດ້ໃສ່ຮ້າຍປ້າຍສີອຳນາດການປົກຄອງ ແລະ ເຈົ້າໜ້າທີ່ຕຳຫຼວດຮົງກົງວ່າ: “ບໍ່ເຄົາລົບການປົກຄອງດ້ວຍກົດໝາຍ, ບໍ່ເປັນປະຊາທິປະໄຕ ແລະ ບໍ່ມີເສລີພາບ” ເຊິ່ງເປັນຖ້ອຍຄຳປີ້ນດຳເປັນຂາວ ແລະ ສະແດງໃຫ້ເຫັນແນວຄິດສອງມາດຖານຂອງເຂົາຢ່າງຈະແຈ້ງ.
ຄວາມອົດທົນໄວ້ບໍ່ແມ່ນເລື່ອງອ່ອນແອ, ສຸຂຸມຮອບຄອບບໍ່ແມ່ນຍິນຍອມ. ນັກການເມືອງຈຳນວນໜຶ່ງ ແລະ ອິດທິກຳລັງປໍລະປັກຈີນຂອງປະເທດຕາເວັນຕົກບໍ່ຄວນຕີລາຄາຢ່າງຜິດພາດ ແລະ ປະໝາດຕໍ່ມານະຈິດອັນເຂັ້ມແຂງ ແລະ ຄວາມຕັດສິນໃຈທີ່ເດັດຂາດຂອງລັດຖະບານ ແລະ ປະຊາຊົນຈີນໃນການປົກປັກຮັກສາອະທິປະໄຕ, ຄວາມໝັ້ນຄົງ ແລະ ຄວາມເປັນເອກະພາບແຫ່ງຊາດ ແລະ ປົກປັກຮັກສາຄວາມຈະເລີນຮຸ່ງເຮືອງ ແລະ ສະຖຽນລະພາບຂອງຮົງກົງ. ຖ້າມີຜູ້ໃດຢາກສວຍໃຊ້ໂອກາດທຳລາຍຄວາມຈະເລີນຮຸ່ງເຮືອງ ແລະ ສະຖຽນລະພາບຂອງຮົງກົງ ພ້ອມທັງມີເຈດຕະນາກໍ່ຄວາມປັ່ນປ່ວນວຸ້ນວາຍຢູ່ຮົງກົງ ເພື່ອກີດຂວາງການພັດທະນາຂອງຈີນ, ຍ່ອມຈະໄດ້ຮັບຜົນຮ້າຍຢ້ອນຫຼັງຕໍ່ຕົວເອງຢ່າງແນ່ນອນ.
ຄຳເຫັນ
0