ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
7 ໂມງ 17 ນາທີຂອງວັນທີ 12 ກັນຍານີ້ ເວລາປັກກິ່ງ, ທ່ານໂດໂນ ທຣຳ ປະທານາທິບໍດີອາເມຣິກາໄດ້ອອກຖະແຫຼງການວ່າ, ຈະເລື່ອນເວລາຂຶ້ນພາສີຕໍ່ສິນຄ້າຈີນໃນມູນຄ່າ 250 ຕື້ໂດລາທີ່ຈະສົ່ງອອກສູ່ອາເມຣິການັ້ນ ຈາກວັນທີ 1 ຕຸລາເລື່ອນໄປເປັນວັນທີ 15 ຕຸລາ. ກ່ອນໜ້ານີ້ໜຶ່ງມື້, ຝ່າຍຈີນໄດ້ປະກາດບັນຊີລາຍການສິນຄ້າອາເມຣິກາໝວດທຳອິດທີ່ຈະຍົກເວັ້ນການຂຶ້ນພາສີຄັ້ງທຳອິດ, ເພື່ອຜ່ອນຄາຍຜົນກະທົບຈາກຄວາມຂັດແຍ້ງດ້ານເສດຖະກິດການຄ້າທີ່ມີຕໍ່ວິສາຫະກິດຈີນ.
ອີງຕາມເນື້ອໃນການສົນທະນາທາງໂທລະສັບລະຫວ່າງຫົວໜ້າຄະນະເຈລະຈາເສດຖະກິດການຄ້າສອງຝ່າຍຈີນ-ອາເມຮິກາໃນວັນທີ 5 ກັນຍານີ້, ສອງຝ່າຍເຫັນດີຈະຈັດການປຶກສາຫາລືລະດັບສູງດ້ານເສດຖະກິດການຄ້າຈີນ-ອາເມຣິກາຮອບທີ 13 ຢູ່ວໍຊິງຕັນໃນຕົ້ນເດືອນຕຸລາ. ເຈົ້າໜ້າທີ່ອາວຸໂສຂອງສອງຝ່າຍຈະປຶກສາຫາລືຢ່າງຕັ້ງໜ້າໃນກາງເດືອນກັນຍາ, ເພື່ອກະກຽມໃຫ້ການປຶກສາຫາລືລະດັບສູງໄດ້ຮັບຄວາມຄືບໜ້າຕົວຈິງ. ສອງຝ່າຍເປັນເອກະພາບກັນເຫັນວ່າ, ຄວນພະຍາຍາມຮ່ວມກັນ, ໃຊ້ການກະທຳຕົວຈິງ ເພື່ອສ້າງເງື່ອນໄຂທີ່ດີໃຫ້ແກ່ການປຶກສາຫາລືກັນ.
ກ່ອນຈັດການປຶກສາຫາລືຮອບນີ້, ສອງຝ່າຍຕ່າງກໍ່ໄດ້ໃຊ້ມາດຕະການ ເພື່ອສະແດງຄວາມຈິງໃຈຂອງຕົນ ແລະໃຊ້ການກະທຳຕົວຈິງເພື່ອມຸ້ງໄປສູ່ເປົ້າໝາຍອັນດຽວກັນ, ສ້າງເງື່ອນໄຂທີ່ມີຜົນດີໃຫ້ແກ່ການປຶກສາຫາລືໄດ້ມີຄວາມຄືບໜ້າຕົວຈິງ, ເຊິ່ງສອດຄ່ອງກັບຄວາມປາຖະໜາຂອງປະຊາຊົນໂລກ ເຊິ່ງສົມຄວນໄດ້ຮັບການຍ້ອງຍໍແລະຊົມເຊີຍ. ໃນຂະບວນວິວັດແຫ່ງຄວາມຂັດແຍ້ງໃນປີປາຍມານີ້ທີ່ມີທັງການກະທຳທີ່ເປັນປໍລະປັກກັນແລະເຈລະຈາກັນ ໄດ້ສະແດງໃຫ້ເຫັນວ່າ: ສົງຄາມການຄ້າບໍ່ມີຜູ້ໄດ້ຮັບໄຊຊະນະ, ການກະທຳທີ່ຂຶ້ນພາສີຢູ່ເລື້ອຍໆບໍ່ສາມາດແກ້ໄຂບັນຫາໄດ້ຢ່າງແທ້ຈິງ, ມີແຕ່ຍຶດໝັ້ນຄວາມສະເໝີພາບແລະຕ່າງຝ່າຍຕ່າງເຄົາລົບເຊິ່ງກັນແລະກັນ, ດຳເນີນການປຶກສາຫາລືແລະການຮ່ວມມືດ້ວຍທ່າທີສຸຂຸມແລະມີເຫດມີຜົນ, ຈຶ່ງຈະສາມາດແກ້ໄຂຄວາມຂັດແຍ້ງໄດ້, ກໍ່ຄືຄວາມເຫັນຂັດແຍ້ງກັນໄດ້ຢ່າງແທ້ຈິງ.
ຄຳເຫັນ
0