ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 11 ກັນຍານີ້, ທ່ານມ໋າສຽວກວ່າງ ໂຄສົກຫ້ອງການວຽກງານໄຕ້ຫວັນຂອງລັດຖະບານຈີນ ໄດ້ກ່າວເຕືອນຢ່າງເຄັ່ງຂຶມຕໍ່ເຈົ້າໜ້າທີ່ໄຕ້ຫວັນໃຫ້ຢຸດຕິການເຂົ້າແຊກແຊງວຽກງານຮົງກົງ.
ໃນກອງປະຊຸມຖະແຫຼງຂ່າວຂອງຫ້ອງການວຽກງານໄຕ້ຫວັນໃນວັນດັ່ງກ່າວ, ທ່ານມ໋າສຽວກວ່າງ ກ່າວວ່າ: ເຈົ້າໜ້າທີ່ພັກປະຊາທິປະໄຕກ້າວໜ້າຂອງໄຕ້ຫວັນໄດ້ມີການກະທຳທີ່ອັບປີຕໍ່ສະພາບການທີ່ເກີດຂຶ້ນຢູ່ຮົງກົງ ໂດຍໄດ້ຍຸຍົງສົ່ງເສີມ, ປຸກປັ່ນຄວາມວຸ້ນວາຍ ແລະ ສົມຮູ້ຮ່ວມຄິດກັບອິດທິກຳລັງແບ່ງແຍກຮົງກົງເປັນເອກະລາດ ເພື່ອຢາກສ້າງຄວາມປັ່ນປ່ວນວຸ້ນວາຍຢູ່ຮົງກົງ ແລະ ທຳລາຍຫຼັກການ “ປະເທດດຽວສອງລະບອບ”. ພວກເຂົາໄດ້ຖືໂອກາດໃສ່ຮ້າຍປ້າຍສີຝ່າຍຈີນແຜ່ນດິນໃຫຍ່ຢ່າງບໍ່ຢຸດຢັ້ງ, ປຸກລະດົມພວກປະຊານິຍົມໃນຮົງກົງ, ໂຄສະນາຊວນເຊື່ອເພື່ອສ້າງຄວາມຫວາດກົວຈີນແລະຕໍ່ຕ້ານຈີນ ເພື່ອສ້າງຜົນປະໂຫຍດໃຫ້ຕົນໃນການໂຄສະນາຫາສຽງໃນການເລືອກຕັ້ງໃນອະນາຄົດຢູ່ໄຕ້ຫວັນ. ເມື່ອບໍ່ດົນມານີ້, ພວກເຂົາຍິ່ງບໍ່ຫົວຊາຕໍ່ຄວາມປອດໄພແລະຄວາມຜາສຸກຂອງປະຊາຊົນໄຕ້ຫວັນ, ໂດຍໄດ້ເຊື້ອເຊີນພວກແບ່ງແຍກຮົງກົງໄປຢ້ຽມຢາມໄຕ້ຫວັນຢ່າງບັງອາດ, ເຊິ່ງເປັນການປົກປ້ອງພວກຫົວຮຸນແຮງເຫຼົ່ານີ້ ແລະ ເຮັດໃຫ້ໄຕ້ຫວັນກາຍເປັນ “ແຫຼ່ງຫຼົບລີ້ຂອງກຸ່ມຄົນຮ້າຍ” ເຊິ່ງເປັນການເປີດປະຕູຕໍ່ການກະທຳທີ່ສ້າງຄວາມປັ່ນປ່ວນແລະເປັນໄພອັນຕະລາຍຕໍ່ໄຕ້ຫວັນ.
ທ່ານມ໋າສຽວກວ່າງ ກ່າວຕື່ມວ່າ: ພວກຂ້າພະເຈົ້າເຕືອນອີກຄັ້ງໜຶ່ງໃຫ້ເຈົ້າໜ້າທີ່ພັກປະຊາທິປະໄຕກ້າວໜ້າຂອງໄຕ້ຫວັນຈົ່ງຂັບໄລ່ມືມືດທີ່ແຊກຊຶມເຂົ້າຮົງກົງ, ຢຸດຕິການເຂົ້າແຊກແຊງວຽກງານຮົງກົງ, ຢຸດຕິການຍຸຍົງສົ່ງເສີມແລະປົກປ້ອງພວກຫົວຮຸນແຮງ ແລະ ຢຸດຕິການກະທຳທີ່ທຳລາຍສາຍພົວພັນລະຫວ່າງສອງຝັ່ງຊ່ອງແຄບໄຕ້ຫວັນ.
ຄຳເຫັນ
0