ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 6 ຕຸລານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ ແລະທ່ານກິມເຈິງອຸນ ປະທານພັກແຮງງານ ປະທານຄະນະກຳມະການວຽກງານແຫ່ງລັດ ສ ປ ປ ເກົາຫຼີໄດ້ສົ່ງສານອວຍພອນເຊິ່ງກັນແລະກັນເນື່ອງໃນໂອກາດຈີນ-ສ ປ ປ ເກົາຫຼີສ້າງສາຍພົວພັນທາງການທູດຄົບຮອບ 70 ປີ.
ໃນສານອວຍພອນ, ທ່ານສີຈິ້ນຜິງກ່າວວ່າ: ເນື່ອງໃນໂອກາດ ສ ປ ຈີນແລະ ສ ປ ປ ເກົາຫຼີສ້າງສາຍພົວພັນທາງການທູດຄົບຮອບ 70 ປີ, ຂ້າພະເຈົ້າຂໍຕາງໜ້າພັກກອມມູນິດຈີນ ລັດຖະບານ ແລະປະຊາຊົນຈີນ, ສົ່ງຄວາມອວຍພອນຢ່າງສຸດອົກສຸດໃຈມາຍັງທ່ານ ແລະຜ່ານຈາກທ່ານໄປຍັງພັກແຮງງານ ລັດຖະບານ ແລະປະຊາຊົນ ສ ປ ປ ເກົາຫຼີ.
ທ່ານສີຈິ້ນຜິງກ່າວວ່າ: ເມື່ອ 70 ປີກ່ອນ, ຈີນ-ສ ປ ປ ເກົາຫຼີໄດ້ສ້າງສາຍພົວພັນທາງການທູດຢ່າງເປັນທາງການ, ນີ້ມີຄວາມໝາຍສຳຄັນທີ່ຂີດແບ່ງຍຸກສະໄໝໃນປະຫວັດການພົວພັນລະຫວ່າງສອງພັກແລະສອງລັດ. ໃນ 70 ປີທີ່ຜ່ານມາ, ພາຍໃຕ້ຄວາມເອົາໃຈໃສ່ຂອງຜູ້ນຳສອງພັກສອງລັດທຸກຮຸ້ນແລະຄວາມພະຍາຍາມຮ່ວມຂອງສອງຝ່າຍ, ມິດຕະພາບອັນເປັນມູນເຊື້ອລະຫວ່າງຈີນ-ສ ປ ປ ເກົາຫຼີໄດ້ທົນການທົດສອບຈາກການປ່ຽນແປງຂອງສະຖານະການສາກົນແລະການປ່ຽນແປງຂອງຍຸກສະໄໝ, ຂະຫຍາຍຕົວກ້າວໄປໜ້າຢ່າງບໍ່ຢຸດຢັ້ງ, ມີຄວາມເຂັ້ມແຂງຂຶ້ນຄຽງຄູ່ກັບການເວລາທີ່ຜ່ານໄປ ແລະໄດ້ຊາບຊຶ້ມເຂົ້າເຖິງຈິດໃຈຂອງປະຊາຊົນ. ການໄປມາຫາສູ່ກັນແລະການຮ່ວມມືໃນທຸກຂົງເຂດລະຫວ່າງສອງປະເທດໄດ້ເກີດມີໝາກຜົນອັນອຸດົມສົມບູນ ເຊິ່ງບໍ່ພຽງແຕ່ໄດ້ຊຸກຍູ້ພາລະກິດສັງຄົມນິຍົມຂອງສອງປະເທດໃຫ້ຈະເລີນກ້າວໄປໜ້າເທົ່ານັ້ນ, ຍັງໄດ້ເສີມຂະຫຍາຍບົດບາດທີ່ສຳຄັນແລະຕັ້ງໜ້າຕໍ່ການປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
ທ່ານສີຈິ້ນຜິງເນັ້ນວ່າ: ການທີ່ຮັກສາ ປັບປຸງ ແລະຂະຫຍາຍການພົວພັນຈີນ-ສ ປ ປ ເກົາຫຼີໃຫ້ດີນັ້ນ, ແມ່ນທິດທາງທີ່ໝັ້ນໜຽວບໍ່ປ່ຽນແປງຂອງພັກແລະລັດຈີນຢ່າງສະເໝີຕົ້ນສະເໝີປາຍ. ຂ້າພະເຈົ້າໃຫ້ຄວາມສຳຄັນໃນລະດັບສູງຕໍ່ການຂະຫຍາຍການພົວພັນຈີນ-ສ ປ ປ ເກົາຫຼີ, ທະນຸຖະໜອມຄວາມໄວ້ເນື້ອເຊື່ອໃຈແລະມິດຕະພາບກັບສະຫາຍ. ນັບແຕ່ປີກາຍເປັນຕົ້ນມາ, ຂ້າພະເຈົ້າໄດ້ພົບປະກັບສະຫາຍ 5 ເທື່ອ, ໄດ້ມີຄວາມຮັບຮູ້ທີ່ເປັນເອກະພາບກັນທີ່ສຳຄັນຕ່າງໆ ເຊິ່ງໄດ້ນຳພາການພົວພັນຈີນ-ສ ປ ປ ເກົາຫຼີກ້າວເຂົ້າສູ່ໄລຍະປະຫວັດສາດອັນໃໝ່. ຈີນຍິນດີພະຍາຍາມຮ່ວມກັບ ສ ປ ປ ເກົາຫຼີ, ຖືການສ້າງສາຍພົວພັນທາງການທູດຄົບຮອບ 70 ປີເປັນກາລະໂອກາດ, ຊຸກຍູ້ການພົວພັນຈີນ-ສ ປ ປ ເກົາຫຼີໃຫ້ຂະຫຍາຍຕົວຢ່າງຍາວນານ ປອດໄສ ແລະໜັກແໜ້ນ, ແລະສ້າງຄວາມສຸກໃຫ້ແກ່ສອງປະເທດແລະປະຊາຊົນສອງຊາດເປັນຢ່າງດີກວ່າເກົ່າ.
ໃນສານອວຍພອນ, ທ່ານກິມເຈິງອຸນກ່າວວ່າ: ເນື່ອງໃນໂອກາດ ສ ປ ປ ເກົາຫຼີ-ຈີນສ້າງສາຍພົວພັນທາງການທູດຄົບຮອບ 70 ປີ, ຂ້າພະເຈົ້າຂໍຕາງໜ້າພັກແຮງງານ ລັດຖະບານ ແລະປະຊາຊົນ ສ ປ ປ ເກົາຫຼີ, ສະແດງຄວາມຊົມເຊີຍຢ່າງຈິງໃຈທີ່ສຸດແລະສົ່ງຄວາມອວຍພອນຢ່າງສຸດອົກສຸກໃຈຕໍ່ສະຫາຍ ແລະຜ່ານຈາກສະຫາຍໄປຍັງພັກກອມມູນິດຈີນ ລັດຖະບານແລະປະຊາຊົນຈີນຄົບຖ້ວນໜ້າ.
ທ່ານກິມເຈິງອຸນຍັງກ່າວວ່າ: ການສ້າງສາຍພົວພັນທາງການທູດລະຫວ່າງ ສ ປ ປ ເກົາຫຼີ-ຈີນມີຄວາມໝາຍທີ່ຂີດແບ່ງຍຸກສະໄໝ. ຂ້າພະເຈົ້າຍິນດີຮ່ວມມືກັບສະຫາຍຢ່າງແໜ້ນແຟ້ນ, ປັບປຸງແລະຂະຫຍາຍມິດຕະພາບລະຫວ່າງ ສ ປ ປ ເກົາຫຼີ-ຈີນທີ່ໄດ້ຮັບຄວາມຍ້ອງຍໍສັນລະເສີນຈາກທົ່ວໂລກຕາມຄວາມມຸ້ງມາດປາຖະໜາຮ່ວມຂອງປະຊາຊົນສອງຊາດ, ປົກປັກຮັກສາພາລະກິດສັງຄົມນິຍົມຢ່າງເດັດດ່ຽວໜຽວແໜ້ນດ້ວຍກຳລັງແຫ່ງມິດຕະພາບແລະຄວາມສາມັກຄີ ແລະປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີກໍຄືຂອງໂລກຢ່າງເດັດດ່ຽວໜຽວແໜ້ນ.
ຄຳເຫັນ
0