ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເນື່ອງໃນໂອກາດວັນຫຼຸດຜ່ອນຄວາມທຸກຍາກຄົບຮອບ 6 ປີໃກ້ຈະໝູນວຽນມາເຖິງ, ທ່ານສີຈິ້ນຜິງ ປະທານປະເທດຈີນໄດ້ເນັ້ນໜັກໃຫ້ເອົາຊະນະບັ້ນຮົບຫຼຸດຜ່ອນຄວາມທຸກຍາກ ໂດຍກ່າວວ່າ: ນັບແຕ່ປະເທດຈີນໃໝ່ສະຖາປະນາຂຶ້ນເປັນເວລາ 70 ປີມານີ້, ພັກກອມມູນິດຈີນໄດ້ຍຶດໝັ້ນປະສົງທີ່ຮັບໃຊ້ປະຊາຊົນຢ່າງສຸດໃຈ, ຍຶດໝັ້ນແນວຄິດການພັດທະນາທີ່ຖືປະຊາຊົນເປັນໃຈກາງ, ນຳພາປະຊາຊົນບັນດາເຜົ່າໃນທົ່ວປະເທດດຳເນີນວຽກງານຫຼຸດຜ່ອນຄວາມທຸກຍາກຢ່າງຕໍ່ເນື່ອງ ເຊິ່ງໄດ້ຮັບຜົນສຳເລັດອັນພົ້ນເດັ່ນ. ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ສູນກາງພັກໄດ້ຖືເອົາການຫຼຸດຜ່ອນຄວາມທຸກຍາກເປັນວຽກງານທີ່ສຳຄັນກວ່າເກົ່າ, ສູ້ຊົນຜ່ານຜ່າເພື່ອເອົາຊະນະບັ້ນຮົບຫຼຸດຜ່ອນຄວາມທຸກຍາກ, ທົ່ວພັກແລະທົ່ວປະເທດໄດ້ສາມັກຄີເປັນຈິດໜຶ່ງໃຈດຽວ, ສູ້ຊົນຢ່າງພິລະອາດຫານ ແລະໄດ້ຮັບຄວາມຄືບໜ້າທີ່ໃຫຍ່ຫຼວງແລະສຳຄັນ. ບັນຫາຄວາມທຸກຍາກເດັດຖານສ້າງຄວາມຫຍຸ້ງຍາກໃຫ້ຊົນຊາດຈີນມາເປັນເວລາຫຼາຍພັນປີນັ້ນໃກ້ຈະໄດ້ຮັບການແກ້ໄຂເປັນຄັ້ງປະຫວັດສາດ ເຊິ່ງຈະປະກອບສ່ວນອັນສຳຄັນເຂົ້າໃນພາລະກິດຫຼຸດຜ່ອນຄວາມທຸກຍາກໃນທົ່ວໂລກ.
ທ່ານສີຈິ້ນຜິງຊີ້ອອກວ່າ, ປັດຈຸບັນ, ໃນບັ້ນຮົບຫຼຸດຜ່ອນຄວາມທຸກຍາກມາເຖິງໄລຍະທ້າຍທີ່ສຳຄັນທີ່ຕ້ອງມີຜົນສຳເລັດຮອບດ້ານ. ພາກສ່ວນຕ່າງໆໃນແຕ່ລະທ້ອງຖິ່ນຕ້ອງສຸມໃສ່ເປົ້າໝາຍ, ສືບຕໍ່ສຸມທຸກຄວາມພະຍາຍາມ ເພື່ອແກ້ໄຂບັນຫາຄວາມທຸກຍາກໃຫ້ທີ່ສຸດ, ສຸມກຳລັງເຂົ້າໃນການແກ້ໄຂບັນຫາຈຸດອ່ອນໃນດ້ານການສຶກສາພາກບັງຄັບ, ການປິ່ນປົວພະຍາດຂັ້ນພື້ນຖານ, ທີ່ຢູ່ອາໄສມີນ້ຳດື່ມສະອາດປອດໄພໃຫ້ແກ່ປະຊາຊົນຜູ້ທຸກຍາກ, ຮັບປະກັນໃຫ້ປະຊາຊົນຜູ້ທຸກຍາກຢູ່ຊົນນະບົດສາມາດຫຼຸດພົ້ນອອກຈາກຄວາມທຸກຍາກຢ່າງທົ່ວເຖິງ, ໃຫ້ປະຊາຊົນທົ່ວປະເທດກ້າວເຂົ້າສູ່ສັງຄົມທີ່ອີ່ມໜຳສຳລານພ້ອມກັນ. ຕ້ອງໃຊ້ມາດຕະການທີ່ມີປະສິດທິຜົນ, ປັບປຸງແລະຂະຫຍາຍຜົນສຳເລັດຂອງການຫຼຸດຜ່ອນຄວາມທຸກຍາກ, ຮັບປະກັນໃຫ້ບັ້ນຮົບຫຼຸດຜ່ອນຄວາມທຸກຍາກມີຜົນສຳເລັດທີ່ມີຄຸນນະພາບສູງ.
ຄຳເຫັນ
0