ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 13 ພະຈິກນີ້, ພະນັກງານຂອງອົງການອະນາໄມດ້ານອາຫານແລະສິ່ງແວດລ້ອມ ອຳນາດການປົກຄອງເຂດບໍລິຫານພິເສດຮົງກົງຂອງຈີນ ໄດ້ຖືກພວກກໍ່ຈະລາຈົນແກວ່ງຂອງແຂງໃສ່ຫົວ ແລະ ມື້ລຸນມາ ຄື: ຄືນວັນທີ 14 ກໍຖືກຢືນຢັນວ່າໄດ້ເສຍຊີວິດແລ້ວ ເຊິ່ງເປັນກໍລະນີທຳອິດທີ່ປະຊາຊົນຜູ້ບໍລິສຸດເສຍຊີວິດ ນັບຕັ້ງແຕ່ເກີດເຫດວຸ້ນວາຍຢູ່ຮົງກົງເປັນຕົ້ນມາ ແລະ ກໍແມ່ນໜຶ່ງໃນຄະດີຮຸນແຮງຕ່າງໆທີ່ພວກກໍ່ຈະລາຈົນກໍ່ຂຶ້ນຢູ່ຮົງກົງແລະພາໃຫ້ປະຊາຊົນຜູ້ບໍລິສຸດເສຍຊີວິດ ແລະ ບາດເຈັບ.
ໃນຂະນະທີ່ພວກກໍ່ຈະລາຈົນເຜົາທຳລາຍໂຮງຮຽນມະຫາວິທະຍາໄລ, ບຸກໂຈມຕີປະຊາຊົນຄົນທຳມະດາສາມັນຕາມລຳພັງໃຈ, ແກວ່ງວັດຖຸຕ່າງໆລົງມາຈາກທີ່ສູງ ແລະ ໃຊ້ການກະທຳຮຸນແຮງອື່ນໆເພື່ອສ້າງໄພອັນຕະລາຍຕ່າງໆຢູ່ຮົງກົງໃນຫຼາຍມື້ຜ່ານມານັ້ນ, ສື່ມວນຊົນຕ່າງໆ ຂອງປະເທດຕາເວັນຕົກ ເຊັ່ນ: BBC, CNN, ໜັງສືພິມນິວຢອກທາມສ໌ ແລະອື່ນໆ ໄດ້ຕັດຄຳສັບ “ບໍ່ມີອາວຸດຢູ່ໃນມື” ນັ້ນອອກຈາກບົດລາຍງານຂ່າວຂອງຕົນ ແລະ ເລີ່ມລາຍງານເຫດການຄວາມວຸ້ນວາຍທີ່ພວກກໍ່ຈະລາຈົນກໍ່ຂຶ້ນ.
ແຕ່ນີ້ບໍ່ແມ່ນສື່ມວນຊົນຂອງປະເທດຕາເວັນຕົກເຫຼົ່ານີ້ໄດ້ສຳນຶກເຖິງມະໂນທຳຂອງເຂົາ ແຕ່ຫາກແມ່ນພາຍຫຼັງພວກເຂົາໄດ້ພົບວ່າ ຄຳຂີ້ຕົວະຫຼອກລວງຂອງຕົນທີ່ໄດ້ໂຄສະນາຊວນເຊື່ອໂດຍໃຊ້ສອງມາດຕະຖານແລະປິດຫູປິດຕາໂດຍບໍ່ສົນໃຈຕໍ່ກັບສະພາບຄວາມເປັນຈິງຂອງເຫດການ ບໍ່ສາມາດສືບຕໍ່ຕົ້ມຕົວະຫຼອກລວງໃຜໄດ້ອີກຕໍ່ໄປແລ້ວ ຈຶ່ງຈຳເປັນຕ້ອງຫາທາງຫຼົບລີ້ໃຫ້ກັບຕົນເອງ. ໃນຂະນະດຽວກັນ, ໃນເວລາເຫດການໃຊ້ກຳລັງຮຸນແຮງໄດ້ແຜ່ລາມໄປເກີດຂຶ້ນຢູ່ແອສປາຍ, ຈີເລ ຈົນກະທັ້ງຢູ່ນິວຢອກຂອງອາເມຣິກາເອງນັ້ນ, ນາງເປໂຣຊີ ປະທານສະພາຕ່ຳອາເມຣິກາທີ່ເຄີຍໄດ້ອອກໜ້າອອກຕາປ່າວປະກາດວ່າການເຄື່ອນໄຫວດ້ວຍກຳລັງຮຸນແຮງຢູ່ຮົງກົງແມ່ນ “ພາບທີ່ສວຍງາມ” ນັ້ນ ບັດນີ້ພັດປິດປາກງຽບບໍ່ເວົ້າຫຍັງແມ່ນແຕ່ຄຳດຽວ.
ປັດຈຸບັນນີ້, ເລື່ອງຄວາມເປັນຈິງເປັນທີ່ຈະແຈ້ງທີ່ສຸດແລ້ວນັ້ນແມ່ນຄາບເລືອດຂອງຊາວຮົງກົງຜູ້ບໍລິສຸດ ກໍຄືສະພາບການປັ່ນປ່ວນວຸ້ນວາຍທີ່ເກີດຂຶ້ນຢູ່ຮົງກົງໃນປັດຈຸບັນ ແລະ ການປະສົບຄວາມເສຍຫາຍດ້ານເສດຖະກິດອັນມະຫາສານນັ້ນ, ສື່ມວນຊົນແລະນັກເລງການເມືອງເຫຼົ່ານັ້ນຂອງປະເທດຕາເວັນຕົກທີ່ໄດ້ຫຼອກລວງປິດຫູບັງຕາປະຊາຊົນ, ຍຸຍົງສົ່ງເສີມ, ປຸກປັ່ນຄວາມວຸ້ນວາຍ ຈົນກະທັ້ງແອບສະໜັບສະໜູນພວກກໍ່ຈະລາຈົນຢ່າງລັບໆນັ້ນ ຈະບໍ່ສາມາດລົບລ້າງມົນທິນທີ່ຕົນເຄີຍກໍ່ຂຶ້ນອອກໄປໄດ້ເຖິງວ່າຈະໃຊ້ຄວາມພະຍາຍາມຊ່ຳໃດກໍຕາມ.
ຄຳເຫັນ
0