ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໂດຍຕອບສະໜອງຕາມການເຊື້ອເຊີນຂອງທ່ານໄຊສົມພອນ ພົມວິຫານ ກຳມະການກົມການເມືອງສູນກາງພັກປະຊາຊົນປະຕິວັດລາວ, ປະທານສູນກາງແນວລາວສ້າງຊາດແຫ່ງ ສປປ ລາວ, ທ່ານວ່າງຢາງ ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານສະພາປຶກສາການເມືອງປະຊາຊົນແຫ່ງຊາດຈີນ ໄດ້ເດີນທາງຢ້ຽມຢາມ ສປປ ລາວຢ່າງເປັນທາງການແຕ່ວັນທີ 16-19 ພະຈິກນີ້ ແລະ ໄດ້ເຂົ້າຢ້ຽມຄຳນັບທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ, ທ່ານທອງລຸນ ສີສຸລິດ ນາຍົກລັດຖະມົນຕີລາວ, ທ່ານນາງປານີ ຢາທໍ່ຕູ້ ປະທານສະພາແຫ່ງຊາດລາວ ແລະ ໄດ້ພົບປະກັບທ່ານໄຊສົມພອນ ພົມວິຫານ.
ໃນເວລາເຂົ້າຢ້ຽມຄຳນັບທ່ານບຸນຍັງ ວໍລະຈິດ, ທ່ານວ່າງຢາງ ກ່າວວ່າ: ເດືອນເມສາປີນີ້, ຜູ້ນຳສູງສຸດຂອງສອງພັກ-ລັດໄດ້ຮ່ວມກັນລົງນາມໃນແຜນການດຳເນີນງານການສ້າງປະຊາຄົມຮ່ວມຊາຕາກຳຈີນ-ລາວ ເຊິ່ງເປັນການໃຫ້ທິດຊີ້ນຳທີ່ສຳຄັນ ທັງເປັນສິ່ງອ້າງອີງໃນການພັດທະນາສາຍພົວພັນລະຫວ່າງສອງປະເທດໃນໄລຍະຍາວນານ. ຈີນຍິນດີຮ່ວມກັນກັບລາວເພື່ອເສີມຂະຫຍາຍທິດຊີ້ນຳຂອງການນຳຂັ້ນສູງ, ເພີ່ມທະວີການແລກປ່ຽນທາງຍຸດທະສາດກ່ຽວກັບບັນຫາສຳຄັນໃນການພົວພັນລະຫວ່າງສອງປະເທດ, ຊຸກຍູ້ການເຊື່ອມຈອດກັນລະຫວ່າງຂໍ້ລິເລີ່ມ ໜຶ່ງແລວໜຶ່ງເສັ້ນທາງ” ກັບຍຸດທະສາດ “ຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດ” ຂອງລາວ, ຊຸກຍູ້ການສ້າງແລວທາງເສດຖະກິດຈີນ-ລາວ, ດຳເນີນການແລກປ່ຽນຢ່າງຮອບດ້ານ, ຫຼາຍລະດັບ ແລະ ແບບມີກົນໄກ.
ທ່ານບູນຍັງ ວໍລະຈິດ ກ່າວວ່າ: ລາວ ແລະ ຈີນເປັນເພື່ອນມິດທີ່ສະໜິດສະໜົມ ແລະ ເປັນອ້າຍນ້ອງຮ່ວມຊາຕາກຳ, ລາວຍິນດີຮ່ວມກັບຈີນເພື່ອຈັດຕັ້ງປະຕິວັດແຜນການດຳເນີນງານກ່ຽວກັບການສ້າງປະຊາຄົມຮ່ວມຊາຕາກຳລາວ-ຈີນໃຫ້ດີ, ດຳເນີນການແລກປ່ຽນຢ່າງໃກ້ຊິດໃນການກໍ່ສ້າງພັກແລະການແລກປ່ຽນການຢ້ຽມຢາມລະຫວ່າງພະນັກງານທຸກຂັ້ນ, ສະໜັບສະໜູນກັນໃນບັນຫາສຳຄັນທີ່ເປັນຄວາມກັງວົນຂອງແຕ່ລະປະເທດ, ປະສານງານດ້ານຫຼັກໝັ້ນເຊິ່ງກັນແລະກັນໃນບັນຫາສາກົນແລະພາກພື້ນທີ່ສຳຄັນ, ຊຸກຍູ້ໃຫ້ສາຍພົວພັນລະຫວ່າງສອງປະເທດມີການພັດທະນາຢ່າງຮອບດ້ານແລະມີຄຸນນະພາບສູງກວ່າເກົ່າ.
ໃນເວລາພົບປະກັບທ່ານໄຊສົມພອນ ພົມວິຫານ, ທ່ານວ່າງຢາງ ກ່າວວ່າ: ພາຍໃຕ້ການນຳພາຮ່ວມກັນຂອງຜູ້ນຳສູງສຸດຂອງສອງພັກ-ລັດ, ການພົວພັນລະຫວ່າງຈີນ-ລາວໄດ້ກ້າວເຂົ້າສູ່ຍຸກໃໝ່. ຈີນຍິນດີຮ່ວມກັບລາວເພີ່ມທະວີການໄປມາຫາສູ່ຢ້ຽມຢາມກັນລະຫວ່າງການນຳຂັ້ນສູງ, ລົງເລິກຄວາມໄວ້ເນື້ອເຊື່ອໃຈກັນດ້ານການເມືອງ, ຈັດຕັ້ງປະຕິບັດໂຄງການການຮ່ວມມືດ້ານການພັດທະນາຄວາມສາມາດທາງການຜະລິດແລະໂຄງການເສດຖະກິດການຄ້າທີ່ສຳຄັນໃຫ້ດີ ແລະ ຖືເອົາການຮ່ວມມືກັນດຳເນີນກິດຈະກຳປີທ່ອງທ່ຽວລາວ-ຈີນເປັນໂອກາດ, ເປີດກວ້າງການຮ່ວມມືດ້ານການທ່ອງທ່ຽວ ແລະ ການແລກປ່ຽນກັນດ້ານວັດທະນະທຳໃນຂົງເຂດຕ່າງໆ.
ຄຳເຫັນ
0