ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວ CRI: ເວັບໄຊ oliannews ຂອງອີຕາລີລາຍງານວ່າ: ກຳມະການຊຸດໃໝ່ຂອງຄະນະກຳມາທິການສະຫະພາບເອີຣົບໄດ້ເລີ່ມດຳລົງຕຳແໜ່ງນັບແຕ່ວັນທີ 1 ທັນວານີ້ເປັນຕົ້ນໄປ, ທ່ານນາງອູຊູລາ ຟອນ ເດີ ໄລເຢີ ໄດ້ດຳລົງຕຳແໜ່ງປະທານຄະນະກຳມາທິການສະຫະພາບເອີຣົບຢ່າງເປັນທາງການ, ທ່ານຊາເລັສ ມີເຊວ ອະດີດນາຍົກລັດຖະມົນຕີແບນຊິກໄດ້ດຳລົງຕຳແໜ່ງເປັນປະທານສະພາເອີຣົບ. ວັນທີ 29 ພະຈິກແລ້ວນີ້, ທ່ານຊາເລັສ ມີເຊວເຄີຍກ່າວວ່າ: ຫວັງໃຫ້ສະຫະພາບເອີຣົບເສີມຂະຫຍາຍບົດບາດສຳຄັນໃນໂລກຢ່າງຕັ້ງໜ້າກວ່າເກົ່າ.
ຕາມຂ່າວແຈ້ງວ່າ: ທ່ານນາງອູຊູລາ ຟອນ ເດີ ໄລເຢີ ອາຍຸ 60 ປີດຳລົງຕຳແໜ່ງຕໍ່ຈາກທ່ານເຈນ ຄຼອດ ຈູນເຄີ, ກາຍເປັນປະທານຄະນະກຳມາທິການສະຫະພາບເອີຣົບເພດຍິງຄົນທຳອິດ, ນາງເຄີຍເປັນລັດຖະມົນຕີກະຊວງປ້ອງກັນປະເທດເຢຍລະມັນແຕ່ປີ 2013 ເປັນຕົ້ນມາ, ເປັນສະມາຊິກສະຫະພັນປະຊາທິປະໄຕສາສະໜາຄຼິສຕຽນຂອງເຢຍລະມັນ, ແລະຖືວ່າເປັນເພື່ອນມິດທີ່ໃກ້ຊິດຂອງທ່ານນາງເມີເຄວ ນາຍົກລັດຖະມົນຕີເຢຍລະມັນ.
ທ່ານຊາເລັສ ມີເຊວ ອະດີດນາຍົກລັດຖະມົນຕີແບນຊິກໄດ້ດຳລົງຕຳແໜ່ງປະທານສະພາເອີຣົບຕໍ່ຈາກທ່ານໂດນານດ໌ ທຸສກ໌. ທ່ານຊາເລັສ ມີເຊວກ່າວວ່າ: ຈະສຸມກຳລັງເຂົ້າໃນການຊຸກຍູ້ຄວາມໄວ້ເນື້ອເຊື່ອໃຈກັນແລະເຄົາລົບເຊິ່ງກັນແລະກັນລະຫວ່າງບັນດາປະເທດເອີຣົບ, ຫວັງໃຫ້ສະຫະພາບເອີຣົບສາມາດເສີມຂະຫຍາຍບົດບາດທີ່ຕັ້ງໜ້າກວ່າເກົ່າໃນອະນາຄົດ, ແລະມີສຽງທີ່ເຂັ້ມແຂງກວ່າເກົ່າເພື່ອມີອິດທິພົນຕໍ່ເຫດການຕ່າງໆຂອງໂລກ.
ຫາງສຽງວິເຄາະວ່າ: ໃນ 5 ປີຕໍ່ໜ້າ, ຜູ້ນຳຜູ້ໃໝ່ 2 ທ່ານຂອງສະຫະພາບເອີຣົບດັ່ງກ່າວຈະປະສົບສິ່ງທ້າທາຍຫຼາຍຢ່າງໃນບັນຫາຕ່າງໆເຊັ່ນ: ລັດທິປົກປ້ອງການຄ້າຂອງອາເມລິກາ, ການປ່ຽນແປງຂອງດິນຟ້າອາກາດ, ການຖອນຕົວອອກຈາກສະຫະພາບເອີຣົບຂອງອັງກິດ, ບັນຫາຊາວຍົກຍ້າຍ ແລະອື່ນໆ.
ຄຳເຫັນ
0