ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວ CRI: ວັນທີ 3 ທັນວານີ້, ອົງການຮ່ວມມືແລະພັດທະນາເສດຖະກິດໄດ້ເຜີຍແຜ່ບົດລາຍງານການປະເມີນຜົນສາກົນກ່ຽວກັບຄວາມສາມາດຂອງນັກຮຽນອາຍຸ 15 ປີໃນດ້ານການອ່ານ ຄະນິດສາດ ແລະວິທະຍາສາດ ເຊິ່ງສະແດງໃຫ້ເຫັນວ່າ: ໃນຈຳນວນນັກຮຽນເກືອບ 6 ແສນຄົນຈາກ 79 ປະເທດແລະເຂດແຄວ້ນທີ່ໄດ້ເຂົ້າຮ່ວມການປະເມີນ, ນັກຮຽນແຜ່ນດິນໃຫຍ່ຈີນເປັນອັນດັບ 1, ຖັດມາແມ່ນນັກຮຽນສິງກະໂປ ເຂດມາກາວຈີນແລະເຂດຮົງກົງຈີນ.
ບົດລາຍງານຊີ້ໃຫ້ເຫັນວ່າ: ເຕັກນິກດີຈີຕອນໄດ້ປ່ຽນວິຖີຊີວິດນອກໂມງຮຽນຂອງບັນດານັກຮຽນໃນລະດັບສູງ. ເມື່ອທຽບໃສ່ປີ 2009, ນັກຮຽນທີ່ມັກອ່ານໄດ້ຫຼຸດໜ້ອຍລົງ, ແຕ່ໄດ້ໃຊ້ເວລາຫຼາຍກວ່າເກົ່າເຂົ້າເບິ່ງອິນເຕີເນັດ. ສະເລ່ຍແລ້ວ, ຄວາມສາມາດໃນການອ່ານຂອງນັກຮຽນຍິງດີກວ່ານັກຮຽນຊາຍຢ່າງເດັ່ນຊັດ. ໃນດ້ານຄະນິດສາດ, ຄວາມສາມາດກວມລວມຂອງນັກຮຽນຊາຍດີກວ່ານັກຮຽນຍິງໜ້ອຍໜຶ່ງ, ແຕ່ໃນດ້ານວິທະຍາສາດ, ນັກຮຽນຍິງດີກວ່ານັກຮຽນຊາຍ.
ບົດລາຍງານຍັງສະແດງໃຫ້ເຫັນວ່າ: 11 ປະເທດແລະເຂດແຄວ້ນເຊັ່ນ: ອົສຕຼາລີ, ການາດາ, ແດນມາກ ແລະປະເທດອື່ນໆໄດ້ສະໜອງໂອກາດການສຶກສາຢ່າງສະເໝີພາບກວ່າປະເທດອື່ນ, ເຊິ່ງມີຜົນດີຕໍ່ພັດທະນາການຂອງນັກຮຽນ. ແຕ່ຍັງມີປະເທດແລະເຂດແຄວ້ນຈຳນວນບໍ່ໜ້ອຍພວມພະເຊີນໜ້າກັບບັນຫາຕ່າງໆເຊັ່ນ: ຂາດຄູສອນ ພື້ນຖານໂຄງລ່າງດ້ານການສຶກສາບໍ່ສົມບູນ ແລະອື່ນໆ.
ອົງການຮ່ວມມືແລະພັດທະນາເສດຖະກິດທີ່ມີສຳນັກງານໃຫຍ່ຕັ້ງຢູ່ປາຣີຂອງປະເທດຝຣັ່ງໄດ້ເລີ່ມດຳເນີນການປະເມີນ 3 ປີເທື່ອໜຶ່ງນັບແຕ່ປີ 2000 ເປັນຕົ້ນມາ ເຊິ່ງມີຈຸດປະສົງເພື່ອສຳຫຼວດຄວາມສາມາດຂອງນັກຮຽນທີ່ໄດ້ສຳເລັດການສຶກສາຂັ້ນພື້ນຖານໃນ 3 ຫຼັກສູດສຳຄັນຄື: ຄະນິດສາດ, ການອ່ານ, ແລະວິທະຍາສາດ.
ຄຳເຫັນ
0