ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 17 ມັງກອນນີ້, ຢູ່ນະຄອນຫຼວງເນປີດໍປະເທດມຽນມາ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານວິນມິນ ປະທານາທິບໍດີມຽນມາ.
ທ່ານສີຈິ້ນຜິງກ່າວວ່າ: ສອງຝ່າຍຈີນແລະມຽນມາຄວນຖືການສ້າງຕັ້ງສາຍພົວພັນທາງການທູດຈີນ-ມຽນມາຄົບຮອບ 70 ປີເປັນກາລະໂອກາດ, ຮ່ວມກັນສ້າງຄູ່ຮ່ວມຊາຕາກຳຈີນ-ມຽນມາ ແລະ ເປີດສັງກາດໃໝ່ແຫ່ງການພົວພັນລະຫວ່າງສອງປະເທດ.
ຈີນຍິນດີຮ່ວມກັນກັບມຽນມາເສີມຂະຫຍາຍຄວາມຮັກແພງກັນຖານອ້າຍນ້ອງທີ່ເປັນມູນເຊື້ອ, ຮ່ວມກັນວາງແຜນຜັງແຫ່ງການພັດທະນາ ແລະ ເປີດສັງກາດໃໝ່ແຫ່ງກາພົວພັນຈີນ-ມຽນມາ.
ທ່ານສີຈິ້ນຜິງກ່າວເນັ້ນວ່າ: ນັບແຕ່ສະຖາປະນາ ສປ ຈີນຕະຫຼອດໄລຍະ 70 ປີຜ່ານມາ, ພຶດຕິກຳຂອງຈີນທີ່ປະສົບຜົນສຳເລັດອັນໃຫຍ່ຫຼວງດ້ານການພັດທະນາ ໄດ້ພິສູດໃຫ້ເຫັນວ່າ, ປະຊາຊົນຈີນໄດ້ເລືອກເສັ້ນທາງພັດທະນາທີ່ຖືກຕ້ອງ, ພວກເຮົາຈະສືບຕໍ່ເດີນຕາມເສັ້ນທາງຂອງຕົນຢ່າງເດັດດ່ຽວໜຽວແໜ້ນ. ຈີນຈະຍຶດໝັ້ນການພັດທະນາໂດຍສັນຕິ ແລະ ຍຶດໝັ້ນບໍ່ເປັນເຈົ້າອຳນາດຈົນເທົ່າໃດໆ. ສະນັ້ນ, ຂ້າພະເຈົ້າສະເໜີໃຫ້ຊຸກຍູ້ການສ້າງປະຊາຄົມຮ່ວມຊາຕາກຳມວນມະນຸດ, ຫວັງວ່າ, ບັນດາປະເທດໃນບ້ານໜ່ວຍໂລກນີ້ຈະສາມາດຢູ່ຮ່ວມກັນຢ່າງປອງດອງກັນ ແລະ ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ. ການສ້າງປະຊາຄົມຮ່ວມຊາຕາກຳມວນມະນຸດ, ກ່ອນອື່ນຈະເລີ່ມປະຕິບັດຈາກປະເທດໃກ້ຄຽງ, ຍຶດໝັ້ນຢູ່ຮ່ວມກັນຢ່າງປອງດອງກັນກັບປະເທດໃກ້ຄຽງ, ຮ່ວມກັນສ້າງຄວາມສະຫງົບກັບປະເທດໃກ້ຄຽງ ແລະ ຮ່ວມກັນສ້າງຄວາມຮັ່ງມີກັບປະເທດໃກ້ຄຽງ. ຈີນດຳເນີນການຮ່ວມມືກັບຕ່າງປະເທດ, ບໍ່ໄດ້ບັງຄັບຕ່າງປະເທດຈັກເທື່ອ, ບໍ່ໄດ້ແຊກແຊງວຽກງານພາຍໃນຂອງຕ່າງປະເທດຈັກເທື່ອ, ຈີນຄັດຄ້ານການກະທຳແບບຂ້ອຍໄດ້ເຈົ້າເສຍ ແລະ ໄດ້ປຽບແຕ່ຝ່າຍດຽວຕະຫຼອດ. ຈີນຍິນດີຮ່ວມກັນກັບມຽນມາຊຸກຍູ້ການສ້າງໂຄງການຮ່ວມມືທີ່ສຳຄັນ ຄື ແລວທາງເສດຖະກິດຈີນ-ມຽນມາຢ່າງໜັກແໜ້ນ ພາຍໃຕ້ຂອບ “ໜຶ່ງແລວໜຶ່ງເສັ້ນທາງ”, ສ້າງຜົນປະໂຫຍດໃຫ້ແກ່ປະຊາຊົນທ້ອງຖິ່ນໃຫ້ໄດ້ຫຼາຍກວ່າເກົ່າ, ເຮັດໃຫ້ເຂົາເຈົ້າໄດ້ຮັບຜົນປະໂຫຍດຫຼາຍກວ່າເກົ່າ ແລະ ມີຄວາມສຸກຫຼາຍກວ່າເກົ່າ. ນອກນີ້, ຈີນຈະສືບຕໍ່ສະໜັບສະໜູນມຽນມາໃນການປົກປ້ອງສິດແລະຜົນປະໂຫຍດທີ່ຖືກຕ້ອງຕາມກົໝາຍ ແລະ ກຽດສັກສີແຫ່ງຊາດຂອງມຽນມາ ໃນເວທີສາກົນ.
ທ່ານວິນມິນຕາງໜ້າລັດຖະບານແລະປະຊາຊົນທຸກຖ້ວນໜ້າຂອງມຽນມາສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ທ່ານປະທານສີຈິ້ນຜິງຢ້ຽມຢາມມຽນມາທາງລັດຖະກິດ ແລະ ກ່າວວ່າ: ເຊື່ອວ່າ, ການຢ້ຽມຢາມຄັ້ງນີ້ຍ່ອມຈະເປັນການຢ້ຽມຢາມຄັ້ງປະຫວັດສາດ ແລະ ເປັນການເປີດໜ້າໃໝ່ແຫ່ງການພົວພັນຈີນ-ມຽນມາ. ທ່ານວິນມິນສະແດງຄວາມຊົມເຊີຍຕໍ່ຜົນສຳເລັດອັນຍິ່ງໃຫຍ່ຂອງຈີນ ນັບແຕ່ສະຖາປະນາ ສປ ຈີນໃນ 70 ປີມານີ້, ຫວັງວ່າ, ຈີນສາມາດແບ່ງປັນບົດຮຽນການປົກຄອງປະເທດ ແລະ ການຄຸ້ມຄອງລັດຂອງຈີນໃຫ້ປະເທດພວມພັດທະນາ ເຊິ່ງລວມທັງມຽນມາ, ເຊື່ອວ່າ, ບົດຮຽນສຳເລັດຜົນຂອງຈີນຈະສາມາດຊ່ວຍເຫຼືອມຽນມາໃນການພັດທະນາເສດຖະກິດ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ຫຼຸດພົ້ນອອກຈາກຄວາມທຸກຍາກ. ທ່ານກ່າວຕື່ມວ່າ: ມຽນມາສະແດງຄວາມຊົມເຊີຍຕໍ່ຈີນທີ່ໄດ້ເສີມຂະຫຍາຍບົດບາດຢ່າງສ້າງສັນໃນຂະບວນການສັນຕິພາບພາຍໃນປະເທດມຽນມາ. ມຽນມາຍຶດໝັ້ນຫຼັກການປະເທດຈີນດຽວ, ເຄົາລົບທິດທາງ “ປະເທດດຽວສອງລະບອບ” ທີ່ຈີນປະຕິບັດຢູ່ຮົງກົງ ແລະ ມາກາວ ແລະ ມີຈຸດຢືນຢ່າງສະເໝີຕົ້ນສະເໝີປາຍວ່າ, ໄຕ້ຫວັນເປັນດິນແດນພາກສ່ວນໜຶ່ງຂອງຈີນທີ່ຕັດແຍກອອກຈາກກັນບໍ່ໄດ້, ມຽນມາສະໜັບສະໜູນປະຊາຄົມຮ່ວມຊາຕາກຳມວນມະນຸດທີ່ທ່ານປະທານສີຈິ້ນຜິງເປັນຜູ້ລິເລີ່ມ ແລະ ຍິນດີຮ່ວມກັນກັບຈີນສ້າງຄູ່ຮ່ວມຊາຕາກຳມຽນມາ-ຈີນຢ່າງຕັ້ງໜ້າ.
ຄຳເຫັນ
0