ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ແຕ່ວັນທີ 17 ຫາ ວັນທີ 18 ມັງກອນນີ້, ທ່ານສີຈິ້ນຜິງ ປະທານປະເທດຈີນໄດ້ຢ້ຽມຢາມມຽນມາທາງລັດຖະກິດຕາມຄຳເຊີນ. ຫຼັງຈາກສິ້ນສຸດການຢ້ຽມຢາມດັ່ງກ່າວ, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ແຈ້ງສະພາບການຢ້ຽມຢາມຄັ້ງນີ້ຕໍ່ນັກຂ່າວ. ທ່ານຫວາງຢີ້ກ່າວວ່າ, ການຢ້ຽມຢາມຄັ້ງນີ້ເປັນການເຄື່ອນໄຫວການຕ່າງປະເທດກັບປະເທດບ້ານໃກ້ເຮືອນຄຽງທີ່ສຳຄັນຂອງຈີນ, ເຖິງວ່າໄດ້ດຳເນີນໄປເປັນເວລາສັ້ນ, ແຕ່ໄດ້ຮັບຜົນສຳເລັດຢ່າງຫຼວງຫຼາຍ. ທ່ານສີຈິ້ນຜິງໄດ້ເຂົ້າຮ່ວມກິດຈະກຳ 12 ຄັ້ງ, ເປັນສັກຂີພິຍານໃຫ້ແກ່ການຊັນສັນຍາການຮ່ວມມື 29 ສະບັບ, ສອງຝ່າຍຍັງໄດ້ອອກຖະແຫຼງການຮ່ວມ.
ທ່ານຫວາງຢີ້ໃຫ້ສຳພາດຕໍ່ນັກຂ່າວວ່າ, ວົງການຕ່າງໆຂອງມຽນມາໄດ້ຕີລາຄາສູງຕໍ່ການຢ້ຽມຢາມຄັ້ງນີ້, ໂດຍເປັນສຽງດຽວກັນເຫັນວ່າ, ເນື່ອງໃນໂອກາດທີ່ມຽນມາ ແລະ ຈີນສ້າງຕັ້ງສາຍພົວພັນທາງການທູດຄົບຮອບ 70 ປີ, ປະທານປະເທດຈີນໄດ້ເດີນທາງຢ້ຽມຢາມມຽນມາທາງລັດຖະກິດ, ເຊິ່ງສະແດງໃຫ້ເຫັນເຖິງຄວາມຮັກແພງຖານອ້າຍນ້ອງທີ່ເລິກເຊີ່ງລະຫວ່າງຈີນກັບມຽນມາ, ແລະເປັນການເປີດປະຫວັດສາດໜ້າໃໝ່ຂອງມິດຕະພາບອັນເປັນມູນເຊື້ອຂອງສອງປະເທດ. ສື່ມວນຊົນສາກົນກໍມີຄວາມສົນໃຈຢ່າງສູງຕໍ່ການຢ້ຽມຢາມຄັ້ງນີ້, ໂດຍມີຄວາມເຫັນທົ່ວໄປວ່າ, ການເຄື່ອນໄຫວການຕ່າງປະເທດຂອງປະມຸກລັດຈີນໄດ້ຊຸກຍູ້ມິດຕະພາບຖານອ້າຍນ້ອງຈີນ-ມຽນມາໃຫ້ກ້າວເຂົ້າສູ່ຍຸກໃໝ່, ການສ້າງ“ໜຶ່ງແລວໜຶ່ງເສັ້ນທາງ”ໄດ້ຮັບຄວາມຄືບໜ້າທີ່ສຳຄັນ, ຖານະບົດບາດຂອງຈີນນັບມື້ນັບຖືກຍົກສູງຂຶ້ນ.
ໃນການຢ້ຽມຢາມຄັ້ງນີ້, ຜູ້ນຳຈີນ ແລະ ມຽນມາໄດ້ບັນລຸຄວາມເຫັນທີ່ເປັນເອກະພາບກັນທີ່ສຳຄັນອັນໃໝ່ກ່ຽວກັບການຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ. ວົງການພາຍນອກໄດ້ສັງເກດເຫັນວ່າ, ທ່ານປະທານສີຈິ້ນຜິງໄດ້ກ່າວເນັ້ນຫຼາຍເທື່ອໃນເວລາເວົ້າເຖິງການຮ່ວມມືຕົວຈິງລະຫວ່າງຈີນ ແລະ ມຽນມາ ໂດຍກ່າວວ່າ ຈີນບໍ່ເຄີຍດຳເນີນການຮ່ວມມືກັບຕ່າງປະເທດແບບບັງຄັບຈັກເທື່ອ, ໂຄງການຮ່ວມມືຈີນ-ມຽນມາຕ້ອງສ້າງຂຶ້ນເພື່ອຕອບສະໜອງຜົນປະໂຫຍດໃຫ້ແກ່ປະຊາຊົນທ້ອງຖິ່ນຫຼາຍກວ່າເກົ່າ, ເຮັດໃຫ້ປະຊາຊົນມີຄວາມຮູ້ສຶກວ່າໄດ້ຮັບຜົນປະໂຫຍດ ແລະ ມີຄວາມຮູ້ສຶກມີຄວາມສຸກຫຼາຍກວ່າເກົ່າ.
ທ່ານຫວາງຢີ້ກ່າວຕື່ມວ່າ, ໃນໄລຍະຢ້ຽມຢາມຄັ້ງນີ້, ທ່ານປະທານສີຈິ້ນຜິງກ່າວເນັ້ນວ່າ, ຈີນຈະສະໜັບສະໜູນມຽນມາສືບຕໍ່ເດີນຕາມເສັ້ນທາງພັດທະນາທີ່ເລືອກໄວ້ດ້ວຍຕົນເອງ, ສະໜັບສະໜູນມຽນມາປົກປັກຮັກສາສິດຜົນປະໂຫຍດທີ່ເປັນທຳ ແລະ ກຽດສັກສີແຫ່ງຊາດຂອງຕົນໃນເວທີສາກົນ, ຍິນດີເສີມຂະຫຍາຍບົດບາດທີ່ມີລັກສະນະສ້າງສັນໃນການຊຸກຍູ້ຂະບວນການສັນຕິພາບ ແລະ ຄວາມປອງດອງຊາດຂອງມຽນມາບົນພື້ນຖານເຄົາລົບອະທິປະໄຕ ແລະ ຄວາມມຸ້ງມາດປາຖະໜາຂອງມຽນມາ.
ຄຳເຫັນ
0