ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພີທີເປີດ“ປີທ່ອງທ່ຽວວັດທະນະທຳຈີນ-ມາເລເຊຍປີ2020”ໄດ້ຈັດຂຶ້ນຢູ່ນະຄອນຫຼວງກົວລາລຳເບີປະເທດມາເລເຊຍໃນວັນທີ 19 ມັງກອນນີ້. ທ່ານລີເຄີ້ສຽງ ນາຍົກລັດຖະມົນຕີຈີນ, ແລະທ່ານມາຮາເທຍ ນາຍົກລັດຖະມົນຕີມາເລເຊຍຕ່າງກໍ່ໄດ້ສົ່ງສານສະແດງຄວາມຊົມເຊີຍຕໍ່ພິທີດັ່ງກ່າວ.
ໃນສານຊົມເຊີຍ, ທ່ານລີເຄີ້ສຽງກ່າວວ່າ, ຈີນແລະມາເລເຊຍເປັນປະເທດບ້ານໃກ້ເຮືອນຄຽງທີ່ມີພຽງທະເລກັ້ນໄວ້, ແຕ່ມີມິດຕະພາບອັນເປັນມູນເຊື້ອນັບເປັນພັນປີ. ໃນສະໄໝລາຊະວົງມິງ, ເຈີ້ງເຫີ ນັກເດີນທະເລຂອງຈີນກໍ່ໄດ້ເດີນທາງໄປມະຫາສະໝຸດປາຊີຟິກຕາເວັນຕົກແລະມະຫສະໝຸດອິນເດຍ 7 ເທື່ອ, ເຄີຍມີ 5 ເທື່ອໄດ້ເດິນທາງໄປເຖິງມາຣາກາ, ໄດ້ສ້າງຄວາມຮັກແພງອັນເລິກເຊິ່ງກັບປະຊາຊົນທ້ອງຖິ່ນ, ກາຍເປັນເລື່ອງອຳມະຕະໃນປະຫວັດສາດການໄປມາຫາສູ່ກັນລະຫວ່າງຈີນ-ມາເລເຊຍ. ໃນຫຼາຍປີມໍ່ໆມານີ້, ຈີນ-ມາເລເຊຍໄດ້ຮັກສາການພັດທະນາການພົວພັນຢ່າງປອດໃສແລະໝັ້ນທ່ຽງ, ສອງປະເທດໄດ້ມີການຮ່ວມມືກັນຢ່າງໃກ້ຊິດໃນການພົວພັນສອງຝ່າຍແລະຫຼາຍຝ່າຍເຊັ່ນຈີນ-ອາຊຽນເປັນຕົ້ນ, ເປັນການຊຸກຍູ້ການພັດທະນາຂອງແຕ່ລະປະເທດ, ໄດ້ເພີ່ມພະລັງແຮງໃຫ້ແກ່ຄວາມຈະເລີນຮຸ່ງເຮືອງແລະຄວາມໝັ້ນຄົງຂອງພາກພື້ນ. ຫວັງວ່າ ສອງຝ່າຍຈະຖືເອົາປີທ່ອງທ່ຽວວັດທະນະທຳເປັນກາລະໂອກາດ, ເປີດກວ້າງການແລກປ່ຽນວັດທະນະນທຳ, ລົງເລິກການຮ່ວມມືດ້ານການທ່ອງທ່ຽວ, ຊຸກຍູ້ການໄປມາຫາສູ່ກັນຂອງປະຊາຊົນ, ເພີ່ມຄວາມເຂົ້າໃຈກັນລະຫວ່າງປະຊາຊົນສອງຊາດ, ສືບຕໍ່ສ້າງຄວາມສາມັກຄີຮັກແພງແລະສົ່ງເສີມມິດຕະພາບລະຫວ່າງສອງປະເທດຢ່າງບໍ່ຢຸດຢັ້ງ, ແລະສ້າງພື້ນຖານດ້ານຈິດໃຈແລະສັງຄົມທີ່ໄດ້ຮັບການສະໜັບສະໜູນຈາກປະຊາຊົນຕື່ມອີກໃຫ້ແກ່ການຂະຫຍາຍສາຍພົວພັນຄູ່ຮ່ວມຍຸດທະສາດຮອບດ້ານຈີນ-ມາເລເຊຍ.
ທ່ານມາຮາເທຍກ່າວວ່າ, ສາຍພົວພັນມາເລເຊຍ-ຈີນມີມູນເຊື້ອມາແຕ່ດົນນານ. ເຊື່ອວ່າ ປີທ່ອງທ່ຽວວັດທະນະທຳຍ່ອມຈະຊຸກຍູ້ໃຫ້ສາຍພົວພັນແລະມິດຕະພາບຂອງສອງປະເທດໄດ້ຮັບຄວາມຄືບໜ້າຄັ້ງໃໝ່. ອວຍພອນໃຫ້ປະຊາຊົນສອງຊາດຈົ່ງມີຄວາມຜາສຸກໃນປີຊວດຕາມຈັນຕະຄະຕິຈີນ, ການພົວພັນແລະການຮ່ວມມືລະຫວ່າງສອງປະເທດຈະສືບຕໍ່ພັດທະນະກ້າວໄປໜ້າຕື່ມອີກ.
ຄຳເຫັນ
0