ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ຈີນ ແລະ ອາເມຣິກາໄດ້ເຊັນສັນຍາເສດຖະກິດການຄ້າໄລຍະທີ 1 ຢ່າງເປັນທາງການ, ການເຈລະຈາຂອງສອງປະເທດໄດ້ຮັບໝາກຜົນໃນໄລຍະໜຶ່ງ ເຊິ່ງໄດ້ຮັບການຕີລາຄາຢ່າງສູງຈາກປະຊາຄົມໂລກ. ບຸກຄົນວົງການຕ່າງໆໃນປະຊາຄົມໂລກເຫັນວ່າ, ເຫດການນີ້ໄດ້ສົ່ງສັນຍານທີ່ຕັ້ງໜ້າ ເປັນການເພີ່ມຄວາມໝັ້ນທ່ຽງໃຫ້ແກ່ຕະຫຼາດສາກົນ, ມີຜົນດີຕໍ່ການກະຕຸກຊຸກຍູ້ເສດຖະກິດໂລກ.
ທ່ານເອເລັດ ຮາຣິສ, ຫົວໜ້ານັກເສດຖະສາດອົງການສະຫະປະຊາຊາດກ່າວວ່າ, ການເຊັນສັນຍາເສດຖະກິດການຄ້າລະຫວ່າງຈີນ - ອາເມຣິກາຈະມີຜົນດີຕໍ່ການຫຼຸດຜ່ອນຄວາມບໍ່ແນ່ນອນໃນດ້ານການລົງທຶນ, ແລະເປັນການເລັ່ງລັດຊຸກຍູ້ການເຄື່ອນໄຫວດ້ານການຄ້າທີ່ເຮັດໃຫ້ເສດຖະກິດຟື້ນຄືນ. ທ່ານກ່າວວ່າ, ຫວັງວ່າທ່ວງທ່າໃນລັກສະນະນີ້ຈະມີຄວາມເຂັ້ມແຂງຢ່າງພຽງພໍ, ເພື່ອຫຼຸດຜ່ອນຜົນກະທົບທີ່ເຮັດໃຫ້ເສດຖະກິດໂລກຊຸມໂຊມລົງໃນຫຼາຍປີຜ່ານມາ.
ທ່ານສາສະດາຈານຫຼີຢວນຂອງສະຖາບັນຄົ້ນຄວ້າອາຊີຕາເວັນອອກຂອງມະຫາວິທະຍາໄລດູອິສເບີກ-ເອເຊັນເຢຍລະມັນກ່າວວ່າ, ການເຊັນສັນຍາດັ່ງກ່າວຈະມີຜົນດີຕໍ່ການຮັກສາຄວາມໝັ້ນທ່ຽງຂອງການຄາດຄະເນທາງການຕະຫຼາດ, ສ້າງພະລັງທາງບວກໃຫ້ແກ່ການເຕີບໂຕຂອງເສດຖະກິດໂລກ, ທັງມີຜົນດີຕໍ່ຈີນ ແລະ ອາເມຣິກາໃນການຈັດວາງແຜນການຜະລິດຕາມຕະຫຼາດໂລກຢ່າງສົມເຫດສົມຜົນກວ່າເກົ່າ, ຊຸກຍູ້ໃຫ້ຕ່ອງໂສ້ມູນຄ່າຂອງໂລກກັບຄືນສູ່ສະພາບທີ່ສົມດຸນກັນທີ່ສຸດ.
ທ່ານອູຢວນຈື່, ສະມາຊິກສະພາລັດເທັກຊັສອາເມຣິກາກ່າວວ່າ, ການຮ່ວມມືຈີນ-ອາເມຣິກາເປັນໜຶ່ງໃນສາຍພົວພັນການຮ່ວມມືທີ່ສຳຄັນທີ່ສຸດຂອງໂລກ, ການເຊັນສັນຍາເສດຖະກິດການຄ້າໄລຍະທີ 1 ເປັນບາດກ້າວທີ່ຕັ້ງໜ້າ, ໄດ້ຫຼຸດຜ່ອນບັນຍາກາດທີ່ເຄັ່ງຕຶງຍ້ອນຄວາມຂັດແຍ້ງກັນດ້ານເສດຖະກິດການຄ້າໃນເມື່ອກ່ອນ. ການຮ່ວມມືລະຫວ່າງຈີນ-ອາເມຣິກາມີຜົນດີຕໍ່ເສດຖະກິດຈີນ ແລະ ເສດຖະກິດອາເມຣິກາເຊັ່ນດຽວກັນ.
ຄຳເຫັນ
0