ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ມັງກອນນີ້, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ຈັດງານລ້ຽງຕ້ອນຮັບບຸນກຸດຈີນ 2020 ຢູ່ຫໍຮັບແຂກເມືອງຕຽວຢວີໄທທີ່ນະຄອນຫຼວງປັກກິ່ງ. ເອກອັກຄະລັດຖະທູດຂອງແຕ່ລະປະເທດປະຈຳຈີນ ກໍຄືຜູ້ຕາງໜ້າອົງການຈັດຕັ້ງສາກົນປະຈຳຈີນ ພ້ອມດ້ວຍຄູ່ສົມລົດ ແລະເຈົ້າໜ້າທີ່ອົງການທີ່ກ່ຽວຂ້ອງຂອງຈີນປະມານ 400 ທ່ານໄດ້ເຂົ້າຮ່ວມງານດັ່ງກ່າວ.
ທ່ານຫວາງຢີ້ກ່າວວ່າ: ປີ 2019 ແມ່ນປີທີ່ປະຊາຊົນທົ່ວປະເທດຈີນໄດ້ສະເຫຼີມສະຫຼອງຫຼາຍເຫດການສຳຄັນ ແລະເປັນປີສືບທອດພາລະກິດອັນເກົ່າພັດທະນາອັນໃໝ່. ໃນປີ 2019, ວຽກງານການຕ່າງປະເທດຈີນໄດ້ກ້າວໄປໜ້າຢ່າງເດັດດ່ຽວໂດຍບໍ່ຢ້ານກົວຕໍ່ຟ້າຝົນລົມແດງ. ກະຊວງການຕ່າງປະເທດຈີນໄດ້ລົງເລິກການຮ່ວມມືບົນຈິດໃຈມິດຕະພາບກັບບັນດາປະເທດ, ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ, ຍົກສູງຄັນທຸງລັດທິຫຼາຍຝ່າຍ, ຮັກສາ ແລະປັບປຸງລະບຽບການສາກົນທີ່ປະຕິບັດຢູ່ໃນປັດຈຸບັນນີ້ໃຫ້ສົມບູນຂຶ້ນ, ໄກ່ເກ່ຍບັນຫາຈຸດເຄັ່ງຮ້ອນຕ່າງໆ ແລະປະກອບສ່ວນທີ່ສຳຄັນເຂົ້າໃນການສ້າງສັນຕິພາບ ແລະຄວາມຈະເລີນຮຸ່ງເຮືອງຂອງໂລກ. ໃນປີ 2020, ວຽກງານການຕ່າງປະເທດຂອງຈີນຈະສືບຕໍ່ກ້າວເດີນໄປຕາມເສັ້ນທາງການພັດທະນາໂດຍສັນຕິ ແລະຍົກສູງຄັນທຸງການສ້າງປະຊາຄົມຮ່ວມຊາຕາກຳຂອງມວນມະນຸດຢ່າງເດັດດ່ຽວ, ສືບຕໍ່ເປັນຜູ້ສ້າງສັນຕິພາບຂອງໂລກ, ຜູ້ປະກອບສ່ວນໃນການພັດທະນາຂອງໂລກ ແລະຜູ້ຮັກສາລະບຽບການຂອງສາກົນ.
ທ່ານນາງແຂກ ຊີໂດດາ ຜູ້ຕາງໜ້າບັນດາເອກອັກຄະລັດຖະທູດຕ່າງປະເທດປະຈຳຈີນ, ເອກອັກຄະລັດຖະທູດກຳປູເຈຍປະຈຳຈີນໄດ້ຕາງໜ້າບັນດາທ່ານທູດສົ່ງຄຳອວຍພອນໃຫ້ປະຊາຊົນຈີນຈົ່ງມີແຕ່ຄວາມສຸກ ແລະໂຊກດີໃນບຸນກຸດຈີນ ແລະຊົມເຊີຍໝາກຜົນອັນຍິ່ງໃຫຍ່ຂອງຈີນໃນຂົງເຂດຕ່າງໆ ເຊັ່ນ: ເສດຖະກິດ, ວິທະຍາສາດເຕັກນິກ, ການຫຼຸດຜ່ອນຄວາມທຸກຍາກ ແລະອື່ນໆ ທີ່ຈີນສາມາດເຮັດສຳເລັດແຕ່ສປ ຈີນສະຖາປະນາຂຶ້ນມາເປັນເວລາ 70 ປີຜ່ານມານີ້. ທ່ານນາງກ່າວວ່າ: ວຽກງານການຕ່າງປະເທດທີ່ມີສີສັນພິເສດຂອງຈີນໄດ້ບັນລຸໝາກຜົນອັນໃຫຍ່ຫຼວງ ເຊິ່ງມີຖານະບົດບາດນັບມື້ນັບສູງຂຶ້ນໃນເວທີສາກົນ ແລະມີປະເທດເພື່ອນມິດຫຼາຍກວ່າເກົ່າ. ເຊື່ອໝັ້ນວ່າພາຍໃຕ້ການນຳພາຂອງພັກກອມມູນິດຈີນ, ຈີນຈະບັນລຸຜົນສຳເລັດຫຼາຍກວ່າເກົ່າ ແລະຈະປະກອບສ່ວນເຂົ້າໃນການພັດທະນາຄວາມຈະເລີນຮຸ່ງເຮືອງຮ່ວມກັນຂອງໂລກຫຼາຍກວ່າເກົ່າ.
ຄຳເຫັນ
0