ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 6 ກຸມພານີ້, “ໜັງສືພິມວຽງຈັນທາມສ” ຂອງລາວໄດ້ລາຍງານວ່າ: ຫ້ອງວ່າການລັດຖະບານລາວໄດ້ອອກແຈ້ງການຕາມຄຳສັ່ງຂອງທ່ານທອງລຸນ ສີສຸລິດ ນາຍົກລັດຖະມົນຕີລາວໃນວັນທີ 5 ກຸມພານີ້ ເຊິ່ງໄດ້ຊີ້ໃຫ້ເຫັນວ່າ: ພາຍຫຼັງຮັບຮູ້ສະພາບການຂອງພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ ແລະວຽກງານປ້ອງກັນພະຍາດຂອງລາວແລ້ວ, ທ່ານທອງລຸນ ສີສຸລິດໄດ້ຮຽກຮ້ອງໃຫ້ກະຊວງອຸດສາຫະກຳ-ການຄ້າ ແລະກະຊວງສາທາລະນະສຸກຂອງລາວຂຶ້ນແຜນການຈັດຊື້ຜ້າປິດປາກ ແລະອຸປະກອນປ້ອງກັນທາງການແພດອື່ນໆຈາກຕະຫຼາດພາຍໃນ ແລະສາກົນຢ່າງທັນການ.
ເຈົ້າໜ້າທີ່ກະຊວງສາທາລະນະສຸກລາວແນະນຳວ່າ: ລັດຖະບານລາວຈະສະໜອງຜ້າປິດປາກໂດຍບໍ່ຕ້ອງເສຍຄ່າໃຫ້ກຸ່ມຄົນທີ່ມີຄວາມສ່ຽງໃນການຕິດພະຍາດ ເຊັ່ນ: ຜູ້ທີ່ເຂົ້າຮ່ວມວຽກງານປ້ອງກັນພະຍາດ. ເນື່ອງຈາກຈີນກຳລັງອອກແຮງຈົນສຸດຄວາມສາມາດໃນການຮັບປະກັນການສະໜອງອຸປະກອນປ້ອງກັນທາງການແພດໃຫ້ພຽງພໍ, ລາວກໍຈະອີງຕາມຄວາມສາມາດຂອງຕົນຈັດສົ່ງຜ້າປິດປາກໃຫ້ແກ່ຈີນ.
ວັນທີ 5 ກຸມພານີ້, ທ່ານທອງລຸນ ສີສຸລິດໄດ້ສະເໜີເປັນພິເສດໃນກອງປະຊຸມພິຈາລະນາສະພາບການຈັດຕັ້ງປະຕິບັດແຜນການພັດທະນາພະລັງງານ ແລະຊັບພະຍາກອນບໍ່ແຮ່ໃນໄລຍະ 5 ປີວ່າ: ປະຊາຊົນບໍ່ຄວນແຕກຕື່ນ, ແຕ່ຄວນໃຊ້ມາດຕະການປ້ອງກັນພະຍາດ, ເຖິງວ່າລາວບໍ່ມີຜູ້ຕິດເຊື້ອ, ແຕ່ລັດຖະບານກໍບໍ່ໄດ້ລະເລີຍຕໍ່ເຫດການດັ່ງກ່າວ, ລັດຖະບານໄດ້ນຳໃຊ້ມາດຕະການປ້ອງກັນພະຍາດຮັບຮູ້ວ່ານະຄອນອູຮັ້ນແຂວງຮູເປີຍຈີນເກີດພະຍາດເປັນຕົ້ນມາ.
ທ່ານທອງລຸນ ສີສຸລິດໄດ້ກ່າວສະແດງຄວາມຊົມເຊີຍຕໍ່ລັດຖະບານຈີນທີ່ໄດ້ນຳໃຊ້ມາດຕະການທີ່ມີປະສິດທິຜົນໃນການປ້ອງກັນ ແລະຄວບຄຸມພະຍາດ ທັງໄດ້ຕີລາຄາສູງຕໍ່ຈີນທີ່ໃຫ້ການຮ່ວມມືທີ່ດີ ແລະແບ່ງປັນຂໍ້ມູນຂ່າວສານຂອງຈີນ, ເຮັດໃຫ້ຝ່າຍລາວ ແລະປະເທດອື່ນໆໃນໂລກສາມາດນຳໃຊ້ມາດຕະການປ້ອງກັນ ແລະສະກັດກັ້ນການແຜ່ລະບາດຂອງພະຍາດໄດ້ຢ່າງທັນການ.
ຄຳເຫັນ
0