ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 10 ກຸມພານີ້, ທ່ານສີຈິ້ນຜິງ ປະທານປະເທດຈີນໄດ້ລົງຊີ້ນຳວຽກງານປ້ອງກັນ ແລະ ຄວບຄຸມພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຢູ່ນະຄອນຫຼວງປັກກິ່ງໂດຍກ່າວເນັ້ນວ່າ, ສະພາບການແຜ່ລະບາດຂອງພະຍາດໃນປັດຈຸບັນຍັງຂ້ຽວຂາດທີ່ສຸດ, ຕ້ອງມີຄວາມໝັ້ນໃຈທີ່ໜຽວແໜ້ນກວ່າເກົ່າ, ມານະຈິດທີ່ເຂັ້ມແຂງກວ່າເກົ່າ ແລະ ມາດຕະການທີ່ເດັດດ່ຽວກວ່າເກົ່າ, ອີງອາໄສປະຊາຊົນຢ່າງໃກ້ຊິດ, ເດັດດ່ຽວສະກັດກັ້ນການແຜ່ລະບາດຂອງພະຍາດ, ເດັດດ່ຽວເອົາຊະນະສົງຄາມປະຊາຊົນຕ້ານການແຜ່ລະບາດຂອງພະຍາດ.
“ຄວາມເຊື່ອຖື, ມານະຈິດ ແລະ ຄວາມໝັ້ນໃຈມີຄວາມສຳຄັນທີ່ສຸດໃນທຸກເວລາ”, ເອົາຊະນະການແຜ່ລະບາດຂອງພະຍາດ, ຈີນມີຄວາມໝັ້ນໃຈເດັດດ່ຽວຈາກຂັ້ນເທິງເຖິງຊັ້ນລຸ່ມ. ຄວາມໝັ້ນໃຈດັ່ງກ່າວໄດ້ມາຈາກທ່າແຮງດ້ານລະບອບການເມືອງຂອງຈີນ. ຄົນທັງຫຼາຍເຫັນວ່າ, ພາຍຫຼັງພະຍາດໄດ້ແຜ່ລະບາດ, ພາຍໃຕ້ການບັນຊາ ແລະ ຈັດວາງຂອງຜູ້ນຳສູງສຸດຈີນ, ພາຍໃຕ້ການຊີ້ນຳນຳພາຢ່າງເປັນເອກະພາບກັນຂອງໜ່ວຍນຳພາວຽກງານຮັບມືກັບການແຜ່ລະບາດຂອງພະຍາດສູນກາງ, ຈີນໄດ້ປຸກລະດົມທົ່ວສັງຄົມ, ໄດ້ເສີມຂະຫຍາຍທ່າແຮງດ້ານລະບອບການເມືອງ ທີ່ຖືຄົນເປັນກົກ ແລະ ສຸມກຳລັງເຮັດພາລະກິດໃຫຍ່ ໂດຍໄດ້ຊຸກຍູ້ການປ້ອງກັນແລະຄວບຄຸມການແຜ່ລະບາດຂອງພະຍາດໄດ້ຮັບປະສິດທິຜົນເທື່ອລະກ້າວ. ນອກນີ້, ມາດຕະການປ້ອງກັນແລະຄວບຄຸມທີ່ຈີນປະຕິບັດໃນໄລຍະຕົ້ນກໍຖືກກັບຫຼັກວິທະຍາສາດ ແລະ ທັນການ ເຊິ່ງໄດ້ເພີ່ມຄວາມໝັ້ນໃຈໃຫ້ຄົນທັງຫຼາຍໃນການເອົາຊະນະການແຜ່ລະບາດຂອງພະຍາດ.
ປັດຈຸບັນ, ການປ້ອງກັນແລະຄວບຄຸມການແຜ່ລະບາດຂອງພະຍາດໄດ້ກ້າວເຂົ້າສູ່ໄລຍະສຳຄັນ, ສະພາບການໃໝ່ ແລະ ບັນຫາໃໝ່ໄດ້ປາກົດຂຶ້ນເລື້ອຍໆ. ມີແຕ່ມີຄວາມຕັດສິນໃຈ ແລະ ມານະຈິດທີ່ເດັດດ່ຽວກວ່າເກົ່າ, ຈິ່ງຈະສາມາດຜ່ານຜ່າຄວາມຫຍຸ້ງຍາກຕ່າງໆນານາໄດ້, ສ້າງກຳລັງຂວາງກັ້ນການແຜ່ລະບາດຂອງພະຍາດ ບົນພື້ນຖານການປ້ອງກັນແລະຄວບຄຸມພະຍາດທີ່ຜ່ານມາ. ວັນທັ 10 ກຸມພານີ້, ກອງນຳໜ້າຂອງໜ່ວຍຊ່ຽວຊານສາກົນຮັບມືກັບເຊື້ອຈຸລະໂລກສາຍພັນໃໝ່ທີ່ນຳພາໂດຍອົງການອະນາໄມໂລກໄດ້ເດີນທາງມາເຖິງປະເທດຈີນແລ້ວ ແລະ ຈະດຳເນີນການຮ່ວມມືກັບເຈົ້າໜ້າທີ່ຝ່າຍຈີນ. ບໍ່ຕ້ອງສົງໄສເລີຍວ່າ, ມາດຕະການດັ່ງກ່າວຈະມີຜົນດີຊ່ວຍໃຫ້ພວກເຮົາຮັບຮູ້ການແຜ່ລະບາດຂອງພະຍາດໄດ້ດີກວ່າເກົ່າ ແລະ ຊ່ວຍທົ່ວໂລກປ້ອງກັນແລະຄວບຄຸມການແຜ່ລະບາດຂອງພະຍາດຮ່ວມກັນ ພ້ອມທັງເພີ່ມຄວາມໝັ້ນໃຈ ແລະ ນ້ຳໃຈສູ້ນຊົນຂອງຈີນ ເພື່ອເອົາຊະນະການແຜ່ລະບາດຂອງພະຍາດ.
ຄຳເຫັນ
0