ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 21 ກຸມພານີ້, ຢູ່ນະຄອນຫຼວງວຽງຈັນ, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດ ແຫ່ງ ສປ ຈີນໄດ້ເຂົ້າຢ້ຽມຄຳນັບທ່ານທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.
ທ່ານທອງລຸນ ສີສຸລິດກ່າວວ່າ, ການເດີນທາງຢ້ຽມຢາມ ສປປ ລາວຂອງທ່ານວາງຢີ້ແມ່ນຢູ່ໃນໄລຍະສຳຄັນທີ່ຈີນພວມອອກແຮງຕ້ານກັບການແຜ່ລະບາດຂອງພະຍາດອັກເສບປອດຈາກໄວຣັສໂຄໂລນາສາຍພັນໃໝ່ ເຊິ່ງມີຄວາມໝາຍສຳຄັນຫຼາຍ. ກອງປະຊຸມລັດຖະມົນຕີກະຊວງການຕ່າງປະເທດອາຊຽນ-ຈີນ ສະໄໝພິເສດ ແລະ ກອງປະຊຸມລັດຖະມົນຕີການຕ່າງປະເທດກ່ຽວກັບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 5 ທີ່ຈັດຂຶ້ນໃນມື້ຜ່ານມາ ລ້ວນແຕ່ປະສົບຜົນສຳເລັດທີ່ສຸດ ເຊິ່ງໄດ້ສະແດງໃຫ້ເຫັນເຖິງຄວາມຕັດສິນໃຈຂອງອາຊຽນແລະຈີນ ໃນການຮ່ວມມືກັນ ແລະ ຮ່ວມກັນຜ່ານຜ່າຄວາມຫຍຸ້ງຍາກ, ລາວຮູ້ສຶກເປັນກຽດທີ່ສາມາດປະກອບສ່ວນໃນການຈັດກອງປະຊຸມສອງຄັ້ງດັ່ງກ່າວ. ລາວຂໍສະແດງຄວາມຊົມເຊີຍຢ່າງສູງຕໍ່ຈີນທີ່ໄດ້ສຸມຄວາມພະຍາຍາມອັນໃຫຍ່ຫຼວງ ເພື່ອຕ້ານກັບການແຜ່ລະບາດຂອງພະຍາດ. ລາວຈະຢືນຄຽງບ່າຄຽງໄຫຼ່ກັບຈີນຢ່າງສະເໝີຕົ້ນສະເໝີປາຍ, ຍິນດີໃຫ້ການຊ່ວຍເຫຼືອແກ່ຈີນໃນການຕ້ານກັບການແຜ່ລະບາດຂອງພະຍາດຕາມຄວາມສາມາດຂອງຕົນ. ລາວໄດ້ຂົນຂວາຍການບໍລິຈາກໃນຂອບເຂດທົ່ວປະເທດລາວ, ເຖິງວ່າຈຳນວນເງິນມີບໍ່ຫຼາຍປານໃດກໍຕາມ, ແຕ່ຫາກແມ່ນຄວາມຈິງໃຈຂອງປະຊາຊົນລາວທີ່ມີຕໍ່ອ້າຍນ້ອງປະຊາຊົນຈີນ. ຂ້າພະເຈົ້າກໍໄດ້ແຈ້ງຕໍ່ພົນລະເມືອງລາວທີ່ຢູ່ປະເທດຈີນ, ຕ້ອງມີຄວາມໝັ້ນໃຈອັນເຕັມປ່ຽມຕໍ່ລັດຖະບານຈີນ, ຍິ່ງຢູ່ໃນໄລຍະສຳຄັນ, ຍິ່ງຕ້ອງຮ່ວມຜ່ານຜ່າຄວາມຫຍຸ້ງຍາກກັບສະຫາຍຈີນ. ຂໍຂອບໃຈນຳລັດຖະບານຈີນທີ່ໄດ້ໃຫ້ການເບິ່ງແຍງດູແລຕໍ່ພວກເຂົາເຈົ້າ, ພວກເຂົາເຈົ້າໄດ້ດຳລົງຊີວິດຢູ່ຈີນເປັນຢ່າງດີ ແລະ ມີສຸຂະພາບແຂງແຮງ.
ກ່ອນອື່ນ, ທ່ານວາງຢີ້ໄດ້ສົ່ງຄຳຢື້ຢາມຖາມຂ່າວຂອງການນຳຈີນຢ່າງຈິງໃຈ ເຖິງທ່ານນາຍົກລັດຖະມົນຕີລາວ ແລະ ກ່າວວ່າ, ພາຍຫຼັງເກີດການແຜ່ລະບາດຂອງພະຍາດແລ້ວ, ຝ່າຍລາວໄດ້ສະແດງຄວາມໝັ້ນໃຈ ແລະ ໃຫ້ການສະໜັບສະໜູນຕໍ່ຝ່າຍຈີນຢ່າງທັນການ ພ້ອມທັງເຫັນດີເປັນເຈົ້າພາບຈັດກອງປະຊຸມລັດຖະມົນຕີກະຊວງການຕ່າງປະເທດຈີນ-ອາຊຽນສະໄໝພິເສດ ແລະ ກອງປະຊຸມລັດຖະມົນຕີການຕ່າງປະເທດກ່ຽວກັບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ເຊິ່ງໄດ້ສ່ອງແສງໃຫ້ເຫັນເຖິງຄວາມຮັກແພງຖານອ້າຍນ້ອງທີ່ໝັ້ນຄົງຂະໜົງແກ່ນລະຫວ່າງຈີນ-ລາວ ແລະ ໄດ້ສະທ້ອນເຖິງເນື້ອໃນອັນເລິກເຊິ່ງຂອງຄູ່ຮ່ວມຊາຕາກຳຈີນ-ລາວ ດ້ວຍການກະທຳຕົວຈິງ. ເຊື່ອວ່າ, ກອງປະຊຸມຄັ້ງນີ້ຍ່ອມຈະເພີ່ມທະວີຄວາມສາມັກຄີແລະການຮ່ວມມືລະຫວ່າງຈີນກັບບັນດາປະເທດໃນອາຊຽນຕື່ມອີກ ແລະ ຍົກຄວາມສາມາດຮັບມືກັບເຫດການສຸກເສີນທາງສາທາລະນະສຸກຂອງພາກພື້ນໃຫ້ສູງຂຶ້ນ.
ທ່ານວາງຢີ້ກ່າວຕື່ມວ່າ, ພົນລະເມືອງລາວຍຶດໝັ້ນສືບຕໍ່ດຳລົງຊີວິດຢູ່ຈີນ ເປັນການກະທຳທີ່ໄວ້ເນື້ອເຊື່ອໃຈຕໍ່ຝ່າຍຈີນ, ຂໍໃຫ້ຝ່າຍລາວຈົ່ງໄວ້ວາງໃຈ ແລະ ເຊື່ອໝັ້ນ, ພວກເຮົາຈະເບິ່ງແຍງດູແລອ້າຍເອື້ອຍນ້ອງປະຊາຊົນລາວທີ່ຢູ່ຈີນປານອ້າຍເອື້ອຍນ້ອງຮ່ວມອຸທອນດຽວກັນຂອງຕົນ.
ຄຳເຫັນ
0