ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 24 ກຸມພາຜ່ານມາ, ທ່ານບຣູສ ແອວເວີດ ທີ່ປຶກສາຂັ້ນສູງຂອງຜູ້ອຳນວຍການໃຫຍ່ອົງການອະນາໄມໂລກ ໄດ້ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງວ່າ: “ພວກເຮົາຕ້ອງຮັບຮູ້ຄວາມພະຍາຍາມຂອງປະຊາຊົນນະຄອນອູຮັ້ນ ແລະ ໂລກຕ້ອງສະແດງຄວາມຂອບໃຈຕໍ່ປະຊາຊົນນະຄອນອູຮັ້ນ.” ເຊິ່ງເຮັດໃຫ້ຄົນທັງຫຼາຍຊາບຊຶ້ງໃຈທີ່ສຸດ.
ກ່ອນໜ້ານີ້, ຄົນຈີນສ່ວນຫຼາຍອາດຈະຍັງບໍ່ຮູ້ຊື່ຂອງທ່ານບຣູສ ແອວເວີດປານໃດ. ພາຍຫຼັງເກີດການແຜ່ລະບາດຂອງພະຍາດແລ້ວ, ທ່ານເປັນຜູ້ຊ່ຽວຊານດ້ານລະບາດວິທະຍາ ທັງເປັນຫົວໜ້າໜ່ວຍຊ່ຽວຊານປະສົມຂອງອົງການອະນາໄມໂລກ, ຍ້ອນໄດ້ເຂົ້າຮ່ວມການສຳຫຼວດສະພາບການແຜ່ລະບາດຂອງພະຍາດ ແລະກອງປະຊຸມຖະແຫຼງຂ່າວຄັ້ງໜຶ່ງຜ່ານມາ, ຄົນຈີນຈຶ່ງໄດ້ຮູ້ຊື່ຂອງທ່ານ.
ພາຍຫຼັງກັບຄືນສູ່ນະຄອນເຊີແນວຫຼັງກອງປະຊຸມຖະແຫຼງຂ່າວແລ້ວ, ທ່ານໄດ້ເວົ້າໂດຍກົງວ່າ: “ຖ້າຂ້ອຍເອງຕິດພະຍາດ, ຂ້ອຍຈະເລືອກໄປປິ່ນປົວຢູ່ຈີນ.”
ເປັນຫຍັງເພິ່ນມີຄວາມຮູ້ສຶກທີ່ເລິກເຊິ່ງແບບນີ້ຕໍ່ຈີນ? ໃນໄລຍະສຳຫຼວດສະພາບການຢູ່ຈີນ, ເພິ່ນໄດ້ເຫັນຫຍັງແດ່? ວັນທີ 6 ມີນານີ້, ທ່ານໄດ້ໃຫ້ສຳພາດຕໍ່ນັກຂ່າວຈີນຢູ່ສຳນັກງານໃຫຍ່ອົງການອະນາໄມໂລກທີ່ນະຄອນເຊີແນວ ແລະ ໄດ້ມີຄວາມເຫັນກ່ຽວກັບການຮັບມືກັບການແຜ່ລະບາດຂອງພະຍາດຢູ່ຈີນ.
ຕົ້ນເດືອນກຸມພາຜ່ານມາ, ໃນເວລາທ່ານບຣູສ ທີ່ຫາກໍ່ຂີ່ເຮືອບິນໄປເຖິງນະຄອນຫຼວງປັກກິ່ງ, ທ່ານກໍຮູ້ສຶກຊາບຊຶ້ງໃຈທີ່ສຸດຢູ່ສະໜາມບິນ. ຍ້ອນວ່ານະຄອນຫຼວງປັກກິ່ງມີປະຊາກອນ 20 ລ້ານກວ່າຄົນ, ແຕ່ໃນສະໜາມບິນສາກົນນະຄອນຫຼວງປັກກິ່ງທີ່ກວ້າງໃຫຍ່ພັດບໍ່ມີເທົ່າໃດຄົນ, ງຽບເຫງົາເປົ່າປ່ຽວຫຼາຍ. ທ່ານເວົ້າວ່າ: “ນີ້ໄດ້ເຮັດໃຫ້ຂ້າພະເຈົ້າຮູ້ດີເຖິງຄວາມເສຍສະຫຼະຂອງປະຊາຊົນຈີນທີ່ພ້ອມພຽງຮຽງໜ້າກັນ.”
ໃນໄລຍະສຳຫຼວດສະພາບການແຜ່ລະບາດຂອງພະຍາດ, ທ່ານໄດ້ນຳພາທີມງານໄປນະຄອນຫຼວງປັກກິ່ງ, ແຂວງກວາງຕຸ້ງ, ແຂວງເສສວນ ແລະ ແຫ່ງຕ່າງໆຂອງແຂວງຫູເປີຍ ໄປເບິ່ງໂຮງໝໍ, ໄປພົບປະໂອລົມກັບນັກຄົ້ນຄວ້າວິທະຍາສາດ ເພື່ອຊອກຮູ້ສະພາບການແຜ່ລະບາດຂອງພະຍາດຢູ່ຈີນຈາກດ້ານຕ່າງໆ. ໃນເວລາໃຫ້ສຳພາດ, ທ່ານໄດ້ຍົກເອົາຫຼາຍບົດຮຽນສຳເລັດຜົນຂອງຈີນ ໃນການປ້ອງກັນແລະຄວບຄຸມພະຍາດ COVID-19, ເຊິ່ງທົ່ວໂລກສາມາດຖອດຖອນເອົາບົດຮຽນສຳເລັດຜົນອັນລ້ຳຄ່າເຫຼົ່ານີ້ຂອງຈີນ. ທ່ານກ່າວວ່າ:
ເຮົາຕ້ອງຫາໃຫ້ເຈິຜູ້ເປັນພະຍາດໂດຍໄວ ພ້ອມທັງກັກບໍລິເວນເຂົາເຈົ້າ ແລະຜູ້ທີ່ໄດ້ສຳຜັດກັບເຂົາເຈົ້າຢ່າງໃກ້ຊິດ, ເຮັດແບບນີ້ຈິ່ງຈະສາມາດຕັດຊ່ອງທາງການແຜ່ລະບາດຂອງພະຍາດໄດ້.
ຂະນະດຽວກັນ, ຖ້າຢາກເຮັດໄດ້ໄວແບບນີ້ ຕ້ອງມີການປະສານສົມທົບຈາກປະຊາຊົນ. ມີແຕ່ປະຊາຊົນຮັບຮູ້ເຊື້ອພະຍາດກໍຄືການແຜ່ລະບາດຂອງພະຍາດCOVID-19 ໄດ້ເປັນຢ່າງດີເທົ່ານັ້ນ, ຈິ່ງຈະສາມາດປະຕິບັດມາດຕະການປ້ອງກັນແລະຄວບຄຸມພະຍາດໃຫ້ມີປະສິດທິຜົນໄດ້. ທ່ານເຫັນວ່າ, ລັດຖະບານຈີນໄດ້ເຮັດຫຼາຍວຽກໃນດ້ານນີ້ ເຊິ່ງສາມາດ “ລົບລ້າງອຸປະສັກໃນການດຳເນີນງານປ້ອງກັນແລະຄວບຄຸມພະຍາດ”.
ຕົວຢ່າງຄື: ໄດ້ຊ່ວຍເຫລືອຄ່າປິ່ນປົວໃຫ້ຜູ້ເປັນພະຍາດ, ລັດຖະບານຈີນໃຫ້ຄຳໝັ້ນສັນຍາວ່າ, ນອກຈາກສາມາດຖອນເງິນຄືນໂດຍຜ່ານບັດປະກັນສຸຂະພາບແລ້ວ, ສ່ວນເຫຼືອນັ້ນຈະແມ່ນລັດຖະບານເປັນຜູ້ຮັບຜິດຊອບໝົດ.
ທ່ານກ່າວວ່າ: ໃນໄລຍະຕົ້ນຂອງການແຜ່ລະບາດຂອງພະຍາດ, ລັດຖະບານຈີນໃຫ້ຄຳໝັ້ນສັນຍາວ່າ, ຖ້າ ຜ່ານບັດປະກັນສຸຂະພາບບໍ່ສາມາດຖອນເງິນຄືນໄດ້ທັງໝົດ, ລັດຖະບານກໍຈະໃຊ້ງົບປະມານມາແກ້ໄຂເລື່ອງນີ້. ນີ້ເຮັດໃຫ້ຄົນທັງຫຼາຍຮູ້ດີວ່າ, ຖ້າຜົນການກວດເປັນໝາຍບວກຈະບໍ່ສົ່ງຜົນເຮັດໃຫ້ເຂົາເຈົ້າລົ້ມລະລາຍຫຼືປະສົບກັບບັນຫາດ້ານການເງິນທີ່ໜັກໜ່ວງ. ນີ້ໄດ້ສົ່ງສັນຍານທີ່ຈະແຈ້ງອີກປະການໜຶ່ງຕໍ່ໂລກຕາເວັນຕົກ.
ອີກດ້ານໜຶ່ງ, ນ້ຳໃຈຮັບຜິດຊອບຕໍ່ສັງຄົມທີ່ແຮງກ້າຂອງປະຊາຊົນຈີນ ກໍເຮັດໃຫ້ທ່ານຊາບຊຶ້ງໃຈທີ່ສຸດ. ທ່ານເຫັນວ່າ: ນີ້ແມ່ນພົວພັນຢ່າງແໜ້ນແຟ້ນກັບວັດທະນະທຳບູຮານເກົ່າແກ່ຂອງຈີນທີ່ສືບທອດມາເປັນເວລາຫຼາຍພັນປີ.
ທ່ານກ່າວວ່າ: ວັດທະນະທຳຈີນໄດ້ສືບທອດມາເປັນເວລາຫຼາຍພັນປີແລ້ວ, ທັງມີການສືບທອດ, ທັງມີການຜັນຂະຫຍາຍແລະພັດທະນາ. ເປັນເວລາດົນນານມາແລ້ວ, ຄົນຈີນສ່ວນຫຼາຍມີທັດສະນະວ່າ: “ປະຊາຊົນທຳມະດາສາມັນກໍຕ້ອງມີໜ້າທີ່ຮັບຜິດຊອບຕໍ່ຄວາມຈະເລີນຮຸ່ງເຮືອງທາງສັງຄົມ”, ແນວຄິດດັ່ງກ່າວໄດ້ສືບທອດມາເຖິງປັດຈຸບັນ. ນີ້ເປັນປັດຊະຍາຕາເວັນອອກແລະຕ່າງກັບປັດຊະຍາຕາເວັນຕົກຫຼາຍ. ຕາເວັນຕົກນິຍົມຕົວບຸກຄົນຕ້ອງມາກ່ອນ ແລະ ເຂົາເຈົ້າມີແຕ່ມີນ້ຳໃຈຮັບຜິດຊອບຕໍ່ສັງຄົມໃນລະດັບໃດໜຶ່ງເທົ່ານັ້ນ.
ເປັນຫຍັງຈີນຈິ່ງສາມາດຄວບຄຸມການແຜ່ລະບາດຂອງພະຍາດໄດ້. ທ່ານກ່າວວ່າ: ນອກຈາກສາເຫດດ້ານວັດທະນະທຳແລ້ວ, ຈີນຍັງມີບົດຮຽນສຳເລັດຜົນທີ່ສະສົມມາຕັງແຕ່ໄລຍະຕ້ານກັບພະຍາດຊາສ. ບົດຮຽນໃນຄັ້ງນັ້ນເຮັດໃຫ້ຄວາມສາມາດດ້ານສາທາລະນະສຸກຂອງຈີນໄດ້ຮັບການຍົກສູງຂຶ້ນແລະສາມາດປຸກລະດົມກຳລັງແຮງດ້ານຕ່າງໆໄດ້ຢ່າງວ່ອງໄວ. ທ່ານສະຫຼຸບວ່າ:
ພາຍຫຼັງຈີນໄດ້ປະຕິບັດມາດຕະການປ້ອງກັນແລະຄວບຄຸມພະຍາດຢ່າງເຂັ້ມແຂງແລ້ວ, ການແຜ່ລະບາດຂອງພະຍາດ COVID-19 ໄດ້ຖືກຈີນຄວບຄຸມໄວ້ໄດ້ໃນໄລຍະເບື້ອງຕົ້ນ, ແຕ່ພະຍາດດັ່ງກ່າວພັດໄດ້ແຜ່ລະບາດຢູ່ຫຼາຍປະເທດໃນໂລກນັບມື້ນັບຮ້າຍແຮງຂຶ້ນ. ອົງການອະນາໄມໂລກໄດ້ໃຫ້ຄວາມສຳຄັນຢ່າງສູງຕໍ່ເລື່ອງນີ້. ທ່ານບຣູສກໍໄດ້ບັນທຶກເລື້ອງນີ້ເຂົ້າໃນບົດລາຍງານຂອງຕົນມາແຕ່ດົນແລ້ວ: ທົ່ວໂລກຍັງບໍ່ທັນໄດ້ກຽມພ້ອມເທື່ອ, ໂລກຍັງຕ້ອງຖອດຖອນບົດຮຽນນຳຈີນໃຫ້ໄວຂື້ນກວ່າທີ່ເປັນຢູ່.
ໃນຫຼາຍມື້ຜ່ານມາ, ທ່ານບຣູສຍັງໄດ້ແບ່ງປັນຂໍ້ມູນກ່ຽວກັບວິທີປ້ອງກັນພະຍາດຂອງຈີນໃຫ້ອີຣານແລະອີຕາລີຢ່າງເປັນປະຈຳ, ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຈີນທີ່ໄດ້ມີທ່າທີເປີດເຜີຍແລະໂປ່ງໃສໃນບັນຫານີ້ ພ້ອມທັງບອກໂລກໃຫ້ຮູ້ວ່າ: ຈີນຍິນດີແບ່ງປັນບົດຮຽນສຳເລັດຜົນທຸກປະການໃຫ້ແກ່ໂລກ.
ຄຳເຫັນ
0