ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສູນກາງພັກກອມມູນິດຈີນສົ່ງສານອວຍພອນວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ
ຄະນະບໍລິຫານງານສູນກາງພັກປະຊາຊົນປະຕິວັດລາວ
ທີ່ ນະຄອນຫຼວງວຽງຈັນ
ເນື່ອງໃນໂອກາດວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 65 ປີ, ພວກຂ້າພະເຈົ້າຂໍຕາງໜ້າໃຫ້ພັກກອມມູນິດຈີນ ແລະ ປະຊາຊົນຈີນ ຂໍສົ່ງຄຳອວຍພອນແລະສະແດງຄວາມຊົມເຊີຍຢ່າງສຸດອົກສຸດໃຈ ມາຍັງ ພັກປະຊາຊົນປະຕິວັດລາວ ແລະ ປະຊາຊົນລາວອ້າຍນ້ອງທຸກຖ້ວນໜ້າ.
65 ປີ ທີ່ຜ່ານມາ ພັກປະຊາຊົນປະຕິວັດລາວ ໄດ້ນຳພາປະຊາຊົນລາວ ສາມັກຄີເປັນປຶກແຜ່ນແລະປະສົບຜົນສຳເລັດໃນການຕໍ່ສູ້ປົດປ່ອຍຊາດ ແລະ ຍາດເອົາເອກະລາດມາໃຫ້ປະເທດຊາດ, ບັນລຸໄດ້ໝາກຜົນອັນສະຫງ່າງາມໃນການກໍ່ສ້າງສັງຄົມນິຍົມ ແລະ ການປ່ຽນແປງໃໝ່. ປັດຈຸບັນ ສປປ ລາວ ເປັນປະເທດທີ່ມີສະເຖຍລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດມີການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງດີຂຶ້ນ, ບົດບາດອິດທິພົນຂອງລາວໃນເວທີສາກົນກໍນັບມື້ສູງເດັ່ນຂຶ້ນຢ່າງບໍ່ຢຸດຢັ້ງ. ໃນຖານະທີ່ເປັນມິດສະຫາຍທີ່ແໜ້ນແຟ້ນ ພວກຂ້າພະເຈົ້າມີຄວາມປິຕິຊົມຊື່ນນຳຜົນສຳເລັດຂອງບັນດາສະຫາຍຢ່າງຈິງໃຈ. ພວກຂ້າພະເຈົ້າເຊື່ອໝັ້ນວ່າ ພາຍໃຕ້ການຊີ້ນຳນຳພາຢ່າງເຂັ້ມເເຂງຂອງ ສູນກາງພັກປະຊາຊົນປະຕິວັດລາວ ທີ່ມີ ສະຫາຍເລຂາທິການໃຫຍ່ ບຸນຍັງ ວໍລະຈິດ ເປັນແກ່ນນຳຂອງພັກ ແລະ ປະຊາຊົນລາວ ບັນດາສະຫາຍ ຈະສາມາດປັບປຸງການນໍາພາຂອງພັກ ໃຫ້ສົມບູນ ແລະ ຊຸກຍູ້ພາລະກິດການກໍ່ສ້າງສັງຄົມນິຍົມ ແລະ ພາລະກິດການປ່ຽນແປງໃໝ່ຢ່າງໜັກແໜ້ນ ເພື່ອຕ້ອນຮັບການເປີດກອງປະຊຸມໃຫຍ່ ຄັ້ງທີ XI ຂອງພັກ ດ້ວຍໝາກຜົນທີ່ດີເດັ່ນ.
ພັກກອມມູນິດຈີນ ໃຫ້ຄວາມສຳຄັນຢ່າງສູງຕໍ່ການພັດທະນາສາຍພົວພັນ ຈີນ-ລາວ. ໃນເດືອນເມສາ 2019 ທີ່ຜ່ານມາ, ສະຫາຍ ສີ ຈີ້ນຜິງ, ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ ແລະ ສະ ຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ໄດ້ຮ່ວມກັນລົງນາມ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ ເຊີ່ງໄດ້ກາຍເປັນທິດຊີ້ນຳໃຫ້ແກ່ການເສີມຂະຫຍາຍສາຍພົວພັນສອງປະເທດໃນຍຸກສະໄໝໃໝ່ຢ່າງຈະແຈ້ງ. ນັບແຕ່ເກີດມີການລະບາດຂອງເຊື້ອພະຍາດໂຄວິດ-19 ເປັນຕົ້ນມາ, ພັກ-ລັດ ແລະ ປະຊາຊົນລາວທຸກພາກສ່ວນໃນສົງຄົມ ໄດ້ສະແດງຄວາມເຫັນໃຈຕໍ່ຝ່າຍຈີນ ແລະ ໃຫ້ການຊ່ວຍເຫຼືອທັງດ້ານວັດຖຸອຸປະກອນ ແລະເງິນເຊີ່ງໄດ້ສະແດງໃຫ້ເຫັນເຖິງຈິດໃຈແຫ່ງການເປັນຄູ່ຮ່ວມຊາຕາກຳທີ່ຮ່ວມແລະຊ່ວຍເຫຼືອ ເຊີ່ງກັນແລະກັນ.
ພັກກອມມູນິດຈີນຍີນດີຈະຮ່ວມກັບພັກປະຊາຊົນປະຕິວັດລາວ ຈັດຕັ້ງປະຕິບັດຂໍ້ຕົກລົງສຳຄັນຂອງສະຫາຍເລຂາທິການໃຫຍ່ຂອງສອງພັກໃຫ້ດີ, ພ້ອມກັນສົ່ງເສີມການເເລກປ່ຽນດ້ານຍຸດທະສາດ, ເພີ່ມທະວີຄວາມໄວ້ເນື້ອເຊື່ອໃຈກັນທາງດ້ານການເມືອງ, ລົງເລິກການແລກປ່ຽນ ກ່ຽວກັບບົດຮຽນດ້ານການຄຸ້ມຄອງພັກ-ບໍລິຫານລັດ, ເສີມຂະ ຫຍາຍການຮ່ວມມືທີ່ເປັນຮູບປະທຳໃນທຸກຂະແໜງການ ແລະ ຮ່ວມກັນຊຸກຍູ້ການສ້າງຄູ່ຮ່ວມຊາຕາກຳ ຈີນ-ລາວ, ຊຸກຍູ້ພາລະກິດສັງຄົມນິຍົມຂອງສອງປະເທດໃຫ້ມີຄວາມຄືບໜ້າໃໝ່ ແລະ ປະກອບສ່ວນອັນໃໝ່ ແລະ ໃຫຍ່ຫຼວງກວ່າເກົ່າເຂົ້າໃນພາລະກິດແຫ່ງຄວາມກ້າວໜ້າຂອງມວນມະນຸດ.
ຂໍອວຍພອນໃຫ້ພາລະກິດການສ້າງສາສັງຄົມນິຍົມ ແລະ ການປ່ຽນແປງໃໝ່ ທີ່ນຳພາໂດຍພັກປະຊາຊົນປະຕິວັດລາວ ປະສົບຜົນສຳເລັດອັນໃໝ່ ແລະ ໃຫຍ່ຫຼວງຍິ່ງໆຂຶ້ນ.
ຂໍອວຍພອນມິດຕະພາບອັນເປັນມູນເຊື້ອລະຫວ່າງສອງປະເທດ ຈີນ-ລາວ ສືບຕໍ່ເສີມຂະຫຍາຍຕະຫຼອດໃນແຕ່ລະໄລຍະ ແລະ ໝັ້ນຄົງຂະນົງແກ່ນເລື້ອຍໆໄປ.
ຄະນະກຳມະການສູນກາງພັກກອມມູນິດຈີນ
ນະຄອນຫຼວງປັກກິ່ງ, ວັນທີ 22 ມີນາ 2020
ສູນກາງພັກກອມມູນິດຈີນສົ່ງສານອວຍພອນພັກປະຊາຊົນປະຕິວັດລາວສ້າງຕັ້ງຂຶ້ນຄົບຮອບ 65 ປີ
ຄຳເຫັນ
0