ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຂໍ້ມູນສະຖິຕິຫຼ້າສຸດຈາກອົງການອະນາໄມໂລກຫຼື WHO ສະແດງໃຫ້ເຫັນວ່າ: ນັບມາຮອດເວລາ 18 ໂມງຂອງວັນທີ 24 ມີນານີ້ ຕາມເວລາພາກກາງເອີຣົບ, ໃນທົ່ວໂລກໄດ້ພົບກໍລະນີຕິດເຊື້ອພະຍາດອັກເສບປອດໂຄວິດ-19 ລວມ 3 ແສນ 75 ພັນ 498 ກໍລະນີ, ເສຍຊີວິດ 16362 ກໍລະນີ, ປະຈຸບັນ, ໄດ້ມີ 195 ປະເທດແລະເຂດແຄວ້ນໃນໂລກພົບກໍລະນີຕິດເຊື້ອພະຍາດ. ພາຍໃຕ້ສະພາບການດັ່ງກ່າວ, ປະເທດຕ່າງໆໃນອາຊີພາກັນໃຊ້ມາດຕະການ ເພື່ອສະກັດກັ້ນບໍ່ໃຫ້ພະຍາດແຜ່ລະບາດໃນວົງກວ້າງຢ່າງຕັ້ງໜ້າ.
ຕອນຄ່ຳວັນທີ 24 ມີນານີ້ ຕາມເວລາທ້ອງຖິ່ນ, ທ່ານນາເຣນດຣາ ດາໂມດາດັສ ໂມດີ ນາຍົກລັດຖະມົນຕີອິນເດຍໄດ້ກ່າວຄຳປາໄສຕໍ່ທົ່ວປະເທດ ໂດຍປະກາດວ່າ, ນັບແຕ່ເວລາ 0 ໂມງຂອງວັນທີ 25 ມີນານີ້ເປັນຕົ້ນໄປ, ອິນເດຍຈະປິດປະເທດຢ່າງຮອບດ້ານເປັນເວລາ 21 ມື້. ຖ້າບໍ່ມີວຽກດ່ວນ, ບໍ່ໃຫ້ປະຊາຊົນອອກໄປນອກ, ໂຮງຮຽນ ໂຮງງານ ສະຖານທີ່ເຮັດວຽກ ຮ້ານຄ້າ ຮ້ານອາຫານ ຮ້ານບັນເທີງ ແລະສະຖານທີ່ອື່ນໆໃຫ້ປິດທັງໝົດ, ພາຫະນະສາທາລະນະຕ່າງໆ ເຊັ່ນ: ລົດເມ ລົດໄຟ້ໃຕ້ດິນ ສາຍການບິນ ແລະອື່ນໆກໍຢຸດຕິການບໍລິການຊົ່ວຄາວ, ພຽງແຕ່ຮັກສາພາຫະນະຂົນສົ່ງສ່ວນໜຶ່ງເພື່ອຮັບໃຊ້ພະນັກງານທີ່ປະຕິບັດວຽກງານສຸກເສີນເຊັ່ນແພດໝໍເປັນຕົ້ນ.
ວັນທີ 24 ມີນານີ້ ຕາມເວລາທ້ອງຖິ່ນ, ທ່ານຮາຊັນ ຣູຮານີ ປະທານາທິບໍດີອີຣານກ່າວໃນກອງປະຊຸມສຳນັກງານໃຫຍ່ຕ້ານພະຍາດໂຄວິດ-19 ວ່າ: ຈຳນວນກໍລະນີທີ່ຮັບການປິ່ນປົວແລະເສຍຊີວິດຢູ່ໂຮງໝໍຫຼາຍແຂວງຂອງອີຣານໄດ້ຫຼຸດໜ້ອຍລົງ, ນີ້ສະແດງໃຫ້ເຫັນວ່າ ມາດຕະການທີ່ໃຊ້ໃນປະຈຸບັນມີປະສິດທິຜົນໃນລະດັບໃດໜຶ່ງ. ເພື່ອສືບຕໍ່ຕັດຊ່ອງທາງແຜ່ລະບາດພະຍາດ, ທ່ານຣູຮານີກ່າວເນັ້ນວ່າ: ຄົນທັງຫຼາຍຕ້ອງສືບຕໍ່ຫຼຸດຈົນກວ່າຫຼີກເວັ້ນການອອກເດີນທາງ ຈົນຮອດຍາມພັກປີໃໝ່ໄດ້ສິ້ນສຸດລົງ, ຄືວັນທີ 19 ເມສາ.
ຕອນຮຸ່ງເຊົ້າວັນທີ 25 ມີນານີ້ ຕາມເວລາທ້ອງຖິ່ນ, ກະຊວງສາທາລະນະສຸກກາຕາປະກາດວ່າ: ພາກສ່ວນທີ່ກ່ຽວຂ້ອງຂອງກາຕາໄດ້ຈັບຕົວຜູ້ທີ່ລະເມີດກົດຂໍ້ກຳນົດກ່ຽວກັບການກັກບໍລິເວນຕົນເອງຢູ່ໃນເຮືອນຈຳນວນ 10 ຄົນໃນວັນທີ 24 ມີນານີ້, ຄົນເຫຼົ່ານີ້ຈະຖືກລົງໂທດຕາມກົດໝາຍທີ່ກ່ຽວຂ້ອງ. ໃນ 5 ມື້ຜ່ານມານີ້, ພາກສ່ວນຕ່າງໆຂອງລັດຖະບານກາຕາໄດ້ຈັບຕົວຜູ້ທີ່ລະເມີດກົດຂໍ້ກຳນົດກ່ຽວກັບການກັກບໍລິເວນຕົນເອງຢູ່ໃນເຮືອນລວມ 45 ຄົນແລ້ວ.
ຄຳເຫັນ
0