ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ17 ເມສານີ້, ອົງການສະຖິຕິແຫ່ງຊາດຈີນໄດ້ປະກາດຂໍ້ມູນໂດຍສະແດງໃຫ້ເຫັນວ່າ: ໃນໄຕມາດທີ 1 ຂອງປີ 2020, ຍອດມູນຄ່າ GDP ຂອງຈີນບັນລຸ 20650,4 ຕື້ຢວນ, ເມື່ອຄິດໄລ່ຕາມລາຄາທີ່ສົມທຽບແລ້ວ ໄດ້ຫຼຸດລົງ 6,8% ເມື່ອທຽບໃສ່ໄລຍະດຽວກັນຂອງປີຜ່ານມາ. ຂໍ້ມູນດັ່ງກ່າວຍັງສະແດງໃຫ້ເຫັນວ່າ, ໃນໄຕມາດທີ 1 ຂອງປີນີ້, ຂະແໜງການສຳຄັນ ແລະຜະລິດຕະພັນສຳຄັນທີ່ພົວພັນເຖິງເສດຖະກິດແຫ່ງຊາດ ແລະຊີວິດການເປັນຢູ່ຂອງປະຊາຊົນໄດ້ເຕີບໂຕຢ່າງໜັກແໜ້ນ, ຊີວິດການເປັນຢູ່ຂັ້ນພື້ນຖານຂອງປະຊາຊົນ ມີການຮັບປະກັນໄດ້ເປັນຢ່າງດີໂດຍຕະຫຼອດ. ຄຽງຄູ່ກັບການປ້ອງກັນ ແລະຄວບຄຸມພະຍາດCOVID-19ໄດ້ຮັບປະສິດທິຜົນທີ່ດີຂຶ້ນ, ການຟື້ນຟູການເຮັດວຽກ ແລະການຜະລິດກໍໄດ້ດຳເນີນໄປຕາມຫຼັກວິທະຍາສາດເທື່ອລະກ້າວ, ຈັງຫວະຫຼຸດລົງຂອງຕົວຊີ້ວັດສຳຄັນດ້ານເສດຖະກິດໃນເດືອນມີນາຜ່ານມາໄດ້ຫຼຸດໜ້ອຍລົງຢ່າງພົ້ນເດັ່ນ. ໃນໄຕມາດທີ 1, ມູນຄ່າເພີ່ມຂອງອຸດສາຫະກຳທີ່ມີລາຍຮັບຫຼາຍວ່າ 20 ລ້ານຢວນໄດ້ຫຼຸດລົງ 8,4% ເມື່ອທຽບໃສ່ໄລຍະດຽວກັນຂອງປີຜ່ານມາ, ສະເພາະໃນເດືອນມີນາພຽງແຕ່ໄດ້ຫຼຸດລົງ 1,1% ເມື່ອທຽບກັບໄລຍະດຽວກັນຂອງປີຜ່ານມາ, ແລະ ສາມາດຟື້ນຟູສູ່ລະດັບດຽວກັນກັບປີຜ່ານມາໂດຍພື້ນຖານແລ້ວ. ສິ່ງທີ່ໜ້າສົນໃຈກໍຄື, ເດືອນມີນາປີຜ່ານມາກໍແມ່ນເດືອນໜຶ່ງທີ່ອຸດສາຫະກຳເຕີບໂຕຂຶ້ນຫຼາຍທີ່ສຸດສຳລັບໝົດປີຜ່ານມາ.
ການແຜ່ລະບາດຂອງພະຍາດCOVID-19 ໄດ້ສ້າງຜົນກະທົບຢ່າງຮຸນແຮງຕໍ່ເສດຖະກິດສັງຄົມຈີນໂດຍບໍ່ສາມາດຫຼີກລ່ຽງໄດ້. ແຕ່ພາຍໃຕ້ສະພາບການທີ່ຕ້ານກັບພະຍາດ, ເສດຖະກິດຈີນຍັງສາມາດຮັກສາລະດັບການພັດທະນາໄດ້ຄືແນວນີ້, ສາມາດເວົ້າໄດ້ວ່າ: ນີ້ແມ່ນຜົນງານທີ່ຍາດມາໄດ້ບໍ່ແມ່ນງ່າຍດາຍ.
ຄວນຕີລາຄາແນວໃດຕໍ່ເສດຖະກິດຈີນໃນປະຈຸບັນ?ທ່ານສີຈິ້ນຜິງ, ປະທານປະເທດຈີນຊີ້ອອກວ່າ: ຍິ່ງແມ່ນໃນໄລຍະນີ້, ຍິ່ງຕ້ອງມີທ່າທີທີ່ ສັດຈະວິພາກຮອບດ້ານ ແລະ ມີວິໄສທັດຍາວໄກເພື່ອວິເຄາະການພັດທະນາຂອງຈີນ, ແລະ ຍິ່ງຕ້ອງຮັກສາ ແລະ ເພີ່ມຄວາມໝັ້ນໃຈ. ຈີນແມ່ນປະເທດໃຫຍ່, ມີຄວາມເຂັ້ມແຂງມີກຳລັງບົ່ມຊ້ອນຫຼາຍ, ມີຫຼາຍຊ່ອງທາງໃນການແກ້ໄຂບັນຫາ. ສະພາບພື້ນຖານທີ່ເສດຖະກິດຈີນພັດທະນາໄປໃນທາງທິດທີ່ດີບໍ່ມີການປ່ຽນແປງ, ການແຜ່ລະບາດຂອງພະຍາດມີແຕ່ສົ່ງຜົນກະທົບໃນໄລຍະສັ້ນເທົ່ານັ້ນ, ແຕ່ກໍສາມາດຄວບຄຸມໄວ້ໄດ້ໂດຍລວມ.
ປີ 2019, GDPທີ່ສະເລ່ຍຕໍ່ຫົວຄົນຂອງຈີນບັນລຸຫຼາຍກວ່າ 10.000 ໂດລາສະຫະລັດ, GDPໄດ້ບັນລຸເກືອບ 100.000ຕື້ຢວນໂດຍທີ່ຍອດປະລິມານເສດຖະກິດເພີ່ມຂຶ້ນຢ່າງບໍ່ຢຸດຢັ້ງ, ຄຸນນະພາບແຫ່ງການພັດທະນາເສດຖະກິດໄດ້ຍົກສູງຂຶ້ນຢ່າງໝັ້ນທ່ຽງ. ພ້ອມກັນນັ້ນ, ຂະແໜງອຸດສຫະກຳການຜະລິດທີ່ມີທຸກປະເພດຢ່າງຄົບຖ້ວນໄດ້ເຮັດໃຫ້ຈີນກາຍເປັນ “ໂຮງງານຂອງໂລກ”, ປະຊາກອນ 1 ຕື້ 400 ລ້ານກວ່າຄົນໄດ້ເຮັດໃຫ້ຈີນກາຍເປັນ “ຕະຫຼາດໃຫຍ່ຂອງໂລກ”.
ການພັດທະນາຂອງຈີນໃນປີນີ້ໄດ້ຜະເຊີນກັບສິ່ງທ້າທາຍຫຼາຍຂຶ້ນ, ບວກກັບຜົນກະທົບຈາກສະພາບພະຍາດຄັ້ງນີ້, ການເຮັດວຽກເພື່ອພັດທະນາເສດຖະກິດສັງຄົມຍິ່ງມີຄວາມຫຍຸ້ງຍາກຫຼາຍ. ທ່ານສີຈິ້ນຜິງຊີ້ອອກວ່າ: ຕ້ອງຮັບຮູ້ຢ່າງຈະແຈ້ງຕໍ່ກັບຄວາມສັບສົນຂອງການປ້ອງກັນແລະຄວບຄຸມພະຍາດແລະສະພາບການພັດທະນາເສດຖະກິດສັງຄົມໃນປັດຈຸບັນ, ເພີ່ມຄວາມຮັບຜິດຊອບແລະຄວາມຮີບດ່ວນໃນການເຮັດວຽກຕ່າງໆໂດຍລວມໃຫ້ດີ. ຕ້ອງຊຸກຍູ້ການຟື້ນຟູການເຮັດວຽກແລະການຜະລິດໃຫ້ຂະຫຍາຍໄປສູ່ຂະແໜງການຕ່າງໆ ຢ່າງແຂງແຮງ, ເປັນລຳດັບແລະວ່ອງໄວຂຶ້ນ, ຕັ້ງໜ້າແກ້ໄຂຄວາມຫຍຸ້ງຍາກແລະສິ່ງກີດຂວາງໃນການຟື້ນຟູການເຮັດວຽກແລະການຜະລິດ, ຊຸກຍູ້ໃຫ້ຕ່ອງໂສ້ອຸດສາຫະກຳຟື້ນຟູການຜະລິດຢ່າງທົ່ວເຖິງ.
ວິກິດການແລະໂອກາດຈະຄົງຕົວຢູ່ນຳກັນ, ເມື່ອສາມາດຜ່ານຜ່າວິກິດການໄດ້ແລ້ວກໍຈະເຫັນໂອກາດໃໝ່.ຄຽງຄູ່ກັບການແຜ່ລະບາດຂອງເຊື້ອພະຍາດຢ່າງວ່ອງໄວຢູ່ຕ່າງປະເທດ, ການເຄື່ອນໄຫວເສດຖະກິດການຄ້າສາກົນໄດ້ຮັບຜົນກະທົບຢ່າງໜັກໜ່ວງ, ເສດຖະກິດຈີນກໍຜະເຊີນກັບສິ່ງທ້າທາຍໃໝ່, ແຕ່ກໍໄດ້ສ້າງໂອກາດໃໝ່ໃຫ້ແກ່ຈີນເພື່ອເລ່ັງລັດພັດທະນາວິທະຍາສາດເຕັກນິກແລະຊຸກຍູ້ການຍົກລະດັບອຸດສາຫະກຳໃຫ້ສູງຂຶ້ນ.
ບໍລິສັດຄົ້ນຄວ້າພັດທະນາຫຸ່ນຍົນແຫ່ງໜຶ່ງຢູ່ເຂດນິຍົມວິທະຍາສາດເຕັກນິກໃນອະນາຄົດຢູ່ເມືອງຢູຫາງນະຄອນຫາງໂຈ່ວແຂງເຈີ້ຈ່ຽງ, ພາຍໃຕ້ສະພາບການແຜ່ລະບາດຂອງພະຍາດ, ບໍລິສັດນີ້ໄດ້ຕັ້ງໜ້າປະດິດສ້າງໃໝ່ໂດຍໄດ້ຄົ້ນຄວ້າພັດທະນາຫຸ່ນຍົນອັດສະລີຍະຂ້າເຊື້ອ.ຫຸ່ນຍົນຊະນິດນີ້ສາມາດບັນທຸກຢາຂ້າເຊື້ອໄດ້ຫຼາຍສຸດເຖິງ100 ກິໂລ, ເມື່ອທຽບໃສ່ຄົນແລ້ວສາມາດຂົນຢາຂ້າເຊື້ອໄດ້ຫຼາຍກວ່າ ຢ່າງ ຫຼວງຫຼາຍ, ປົກກະຕິກຳມະກອນຂ້າເຊື້ອຄົນໜຶ່ງສາມາດຂົນຢາຂ້າເຊື້ອໄດ້ຫຼາຍສຸດພຽງແຕ່ 40 ກິໂລເທົ່ານັ້ນ. ປັດຈຸບັນ, ບໍລິສັດນີ້ໄດ້ຮັບໃບສັ່ງຈອງຫຸ່ນຍົນຫຼາຍກວ່າ 100 ເຄື່ອງຈາກທັງພາຍໃນແລະຕ່າງປະເທດ.
ໃນເວລາສຳຫຼວດກວດກາວຽກງານຢູ່ແຂວງເຈີ້ຈ່ຽງ, ທ່ານສີຈິ້ນຜິງໄດ້ຊີ້ອອກວ່າ: ຕ້ອງກຳແໜ້ນກາລະໂອກາດທີ່ເກີດຈາກການຫັນເປັນອຸດສາຫະກຳໃຫ້ເປັນດິຈິຕອນແລະຫັນເຕັກນິກດິຈິຕອນໃຫ້ເປັນອຸດສາຫະກຳ, ເລັ່ງລັດການກໍ່ສ້າງພື້ນຖານໂຄງລ່າງແບບໃໝ່ເຊັ່ນ:ເຄືອຂ່າຍອິນເຕີເນັດ 5G, ສູນຂໍ້ມູນຂ່າວສານເປັນຕົ້ນ, ເລັ່ງລັດວາງແຜນພັດທະນາອຸດສາຫະກຳຈະເລີນໃໝ່ແລະອຸດສາຫະກຳອະນາຄົດທີ່ມີຄວາມໝາຍດ້ານຍຸດທະສາດເຊັ່ນ:ເສດຖະກິດດິຈິຕອນ, ອຸດສາຫະກຳການຮັກສາສຸຂະພາບແລະ ກ່ຽວຂ້ອງກັບຊີວິດ, ວັດສະດຸໃໝ່ແລະອື່ນໆ, ອອກແຮງຊຸກຍູ້ການປະດິດສ້າງດ້ານວິທະຍາສາດເຕັກນິກ, ສຸມກຳລັງເຂົ້າໃນການພັດທະນາໃນຈຸດເຕີບໂຕໃໝ່ໃຫ້ເຂັ້ມແຂງແລະກາຍເປັນກຳລັງແຮງໃໝ່ໃນການຂັບເຄື່ອນການພັດທະນາ.
ການເຕີບໃຫຍ່ຂະຫຍາຍຕົວແລະບຸກບືນກ້າວຂຶ້ນຈາກຄວາມຫຍຸ້ງຍາກລຳບາກ. ຂໍພຽງແຕ່ພວກເຮົາຫັນແຮງກົດດັນໃຫ້ເປັນແຮງຊຸກດັນ, ຮູ້ຈັກຫັນວິກິດການໃຫ້ເປັນໂອກາດ, ເສີມຂະຫຍາຍທ່າແຮງບົ່ມຊ້ອນອັນມະຫາສານແລະກຳລັງແຮງຂັບເຄື່ອນອັນເຂັ້ມແຂງຂອງການພັດທະນາຂອງຈີນ ກໍຈະສາມາດເຮັດໃຫ້ເສດຖະກິດສັງຄົມຈີນມີທ່ວງທ່າຂະຫຍາຍຕົວທີ່ດີຢ່າງຕໍ່ເນື່ອງ, ບັນລຸເປົ້າໝາຍໜ້າທີ່ໃນການຍາດເອົາໄຊຊະນະຂັ້ນສຸດທ້າຍໃນການສ້າງສັງຄົມທີ່ອິ່ມໜຳສຳລານໃຫ້ສຳເລັດຮອບດ້ານແລະລຶບລ້າງຄວາມທຸກຍາກໃຫ້ໄດ້ແນ່ນອນ.
ຄຳເຫັນ
0