ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານເຈິ້ງຢົງໜຽນ ສາສະດາຈານສະຖາບັນຄົ້ນຄວ້າອາຊີຕາເວັນອອກຂອງມະຫາວິທະຍາໄລແຫ່ງຊາດສິງກະໂປ ໄດ້ພິມບົດຄວາມບົດໜຶ່ງໃນຫວ່າງມໍ່ໆມານີ້ ໂດຍໄດ້ລົງເລິກວິເຄາະຄວາມແຕກຕ່າງກັນໃນວຽກງານຕ້ານກັບການແຜ່ລະບາດຂອງພະຍາດໃນປະເທດຕົ້ນຕໍໃນໂລກຕາເວັນອອກແລະໂລກຕາເວັນຕົກ. ທ່ານກ່າວຢ່າງຈະແຈ້ງວ່າ, ຜູ້ກຳອຳນາດໄດ້ “ເອົາການເມືອງໄວ້ຢູ່ເໜືອວິທະຍາສາດ” ເປັນສາຍເຫດຕົ້ນຕໍທີ່ເຮັດໃຫ້ວຽກງານຕ້ານກັບການແຜ່ລະບາດຂອງພະຍາດໃນອາເມຣິກາປະສົບຄວາມຫຼົ້ມເຫຼວ.
ຄືດັ່ງຄຳເວົ້າຂອງທ່ານເຈິ້ງຢົງໜຽນ, ມາຮອດປັດຈຸບັນ, ວຽກງານຕ້ານກັບການແຜ່ລະບາດຂອງພະຍາດຢູ່ອາເມຣິກາຄືວ່າລ້ວນແຕ່ໄດ້ດຳເນີນໂດຍປິ່ນອ້ອມອຳນາດການປົກຄອງ. ນັກການເມືອງອາເມຣິກາໄດ້ເຮັດຫູທວນລົມຕໍ່ຄຳເຕືອນກ່ຽວກັບການແຜ່ລະບາດຂອງພະຍາດ ຈາກອົງການຂ່າວລັບປະເທດຕົນ, ບຸກຄົນສາທາລະນະສຸກ, ອົງການອະນາໄມໂລກ ແລະ ຈີນ, ເຮັດໃຫ້ຄວາມສ່ຽງໃນດ້ານການແຜ່ລະບາດຂອງພະຍາດໄດ້ເພີ່ມຂຶ້ນເລື້ອຍໆ ແລະ ເຮັດໃຫ້ການແຜ່ລະບາດຂອງພະຍາດບໍ່ສາມາດຄວບຄຸມໄດ້ໃນທີ່ສຸດ. ໃນຂະນະດຽວກັນ, ພວກເຂົາເຈົ້າຍັງໄດ້ໃຊ້ຄວາມກົດດັນຕໍ່ນັກວິທະຍາສາດ ບໍ່ໃຫ້ນັກວິທະຍາສາດມີຄຳເຫັນທີ່ແຕກຕ່າງກັບພວກເຂົາ. ທ່ານອັນໂທນີ ຟາວຊີ ນັກວິທະຍາສາດພະຍາດຕິດແປດທີ່ມີຊື່ສຽງຂອງອາເມຣິກາ ເຊິ່ງຖືກປະຊາຊົນອາເມຣິກາຕັ້ງສົມຍານາມວ່າ: “ຫົວໜ້າຕ້ານການແຜ່ລະບາດຂອງພະຍາດ”, ຍ້ອນວ່າທ່ານໄດ້ຍຶດໝັ້ນໃນການຕ້ານກັບການແຜ່ລະບາດຂອງພະຍາດຕາມຫຼັກວິທະຍາສາດ, ທ່ານຖືກການນຳຂັ້ນສູງ ແລະ ນັກການເມືອງປີກຂວາອາເມຣິກາໃຊ້ຄວາມກົດດັນ ແລະ ຂົ່ມຂູ່ຫຼາຍເທື່ອ.
ນັກວິເຄາະຊີ້ອອກວ່າ, ການກະທຳດັ່ງກ່າວຂອງນັກການເມືອງອາເມຣິກາແມ່ນເປັນຍ້ອນເຂົາເຈົ້າຢ້ານວ່າ, ການໃຊ້ມາດຕະການປ້ອງກັນແລະຄວບຄຸມພະຍາດຢ່າງຂະໜາດໃຫຍ່ ອາດຈະກະທົບຕໍ່ການພັດທະນາເສດຖະກິດ ແລະ ມີຜົນກະທົບຕໍ່ການກະກຽມເລືອກຕັ້ງທົ່ວໄປ. ເພື່ອບັດເລືອກຕັ້ງ, ເຂົາເຈົ້າຍັງໄດ້ເສີຍເມີຍຕໍ່ຄູ່ມືວິທະຍາສາດສະບັບໜຶ່ງຂອງສູນປ້ອງກັນແລະຄວບຄຸມພະຍາດຂອງອາເມຣິກາ ກ່ຽວກັບວ່າຈະເຮັດແນວໃດ ຈິ່ງຈະສາມາດເປີດສະຖານທີ່ສາທາລະນະຄືນໃໝ່, ເຂົາເຈົ້າໄດ້ໝິ່ນປະໝາດຄວາມປອດໄພດ້ານຊີວິດຂອງປະຊາຊົນ ໂດຍໄດ້ເລີ່ມເຄື່ອນໄຫວເສດຖະກິດຄືນໃໝ່ຢ່າງບັງອາດ. ກ່ຽວກັບເລື່ອງນີ້, ທ່ານອັນໂທນີ ຟາວຊີ ໄດ້ກ່າວເຕືອນໃນກອງປະຊຸມຟັງຄຳໃຫ້ການຂອງລັດຖະສະພາ ທີ່ຈັດຂຶ້ນໃນວັນທີ 12 ພຶດສະພານີ້ວ່າ: “ຖ້າບັນດາລັດບໍ່ເອົາຫົວຊາຕໍ່ທິດຊີ້ນຳຂອງສູນປ້ອງກັນແລະຄວບຄຸມພະຍາດອາເມຣິກາ ແລະ ຜ່ອນຜັນມາດຕະການປ້ອງກັນພະຍາດໄວເກີນໄປ ຈະເປັນການກະທຳທີ່ຜິດພາດໜັກໜ່ວງທີ່ບໍ່ອາດກູ້ຄືນໄດ້.”
ທ່ານເຈິ້ງຢົງໜຽນເຫັນວ່າ, “ຖ້າເອົາການເມືອງໄວ້ຢູ່ເໜືອວິທະຍາສາດ, ຈະຊອກຫາວິທີທີ່ບັງເກີດຜົນເພື່ອມາກອບກູ້ຊີວິດຂອງປະຊາຊົນນັ້ນແມ່ນເປັນໄປໄດ້ຍາກ.” ການກະທຳຂອງນັກການເມືອງອາເມຣິກາ ເຮັດໃຫ້ການປ້ອງກັນແລະຄວບຄຸມການແຜ່ລະບາດຂອງພະຍາດຢູ່ອາເມຣິກາຕົກເຂົ້າສູ່ສະພາບຄວາມຫຍຸ້ງຍາກ, ໃນສັງຄົມອາເມຣິກາ ທີ່ນິຍົມແຕ່ອັນທີ່ວ່າ “ເສລີ ແລະ ປະຊາທິປະໄຕ”, ຄວາມປອດໄພດ້ານຊີວິດຂອງປະຊາຊົນຈິ່ງກາຍເປັນຂອງຫຼິ້ນຂອງຜູ້ມີສິດອຳນາດ, ນີ້ຈິ່ງກາຍເປັນໂສກນາດຕະກຳອີ່ຫຼີ.
ຄຳເຫັນ
0