ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນາງ ລູຊີ ລີ ແພດໝໍເຊື້ອສາຍຈີນຂອງພະແນກວາງຢາສະຫຼົບຂອງໂຮງໝໍລັດມັສຊາຈູເຊັດສ໌ຂອງອາເມຣິກາເວົ້າວ່າ: “ຂ້ອຍພວມຊ່ວຍກອບກູ້ຊີວິດຂອງຄົນອື່ນພາຍໃຕ້ສະພາບການທີ່ມີຄວາມສ່ຽງຕໍ່ສຸຂະພາບຮ່າງກາຍຂອງຕົນ,ແຕ່ພັດໄດ້ຖືກດູຖູກຈາກຜູ້ອື່ນຍ້ອນໜ້າຕາຂອງຕົນ.” ໜັງສືພິມວໍຊິງຕັນໂພສ໌ຂອງອາເມຣິກາລາຍງານວ່າ: ໃນໄລຍະຕົ້ນຂອງການເກີດມີການແຜ່ລະບາດຂອງພະຍາດໂຄວິດ-19, ນາງ ລູຊີ ລີ ກໍໄດ້ຖືກຊາຍຄົນແປກໜ້າຜູ້ໜຶ່ງປ້ອຍດ່າໃນເວລາເດີນທາງກັບບ້ານຫຼັງເລີກການ; ໃນເວລາເຮັດວຽກ, ຄົນເຈັບຈຳນວນໜຶ່ງໄດ້ປະຕິເສດບໍ່ໃຫ້ນາງປິ່ນປົວຕົນຍ້ອນນາງເປັນຄົນເຊື້ອສາຍຈີນ.
ປັດຈຸບັນ, ລັດທິຊາດນິຍົມໃນສັງຄົມອາເມຣິກາໄດ້ປະກົດຂຶ້ນມາອີກ, ເຊິ່ງມີສ່ວນກ່ຽວຂ້ອງກັບ “ການເວົ້າປຸກປັ່ນ” ແລະຍຸແຍ່ຂອງນັກການເມືອງອາເມຣິກາ. ນັບແຕ່ໄດ້ປະສົບກັບການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ນັກການເມືອງຈຳນວນໜຶ່ງຂອງອາເມຣິກາໄດ້ຕັ້ງກຸ່ມແກ້ງຍຸແຍ່ເພື່ອສ້າງຄວາມເປັນປໍລະປັກກັນດ້ານເຊື້ອຊາດແລະສ້າງຄວາມເສື່ອມເສຍຊື່ສຽງດ້ວຍສະພາບຂອງການແຜ່ລະບາດຂອງພະຍາດໂຄວິດ-19 ເພື່ອບີດບັງຄວາມຫຼົ້ມເຫຼວຂອງປະເທດຕົນໃນການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19, ຖືເອົາການໃສ່ຮ້າຍປ້າຍສີຈີນເປັນຊ່ອງທາງໃນການເກັບຄະແນນໃນທາງການເມືອງ. ໃນຂະນະດຽວກັນ, ກໍມີສື່ມວນຊົນບາງຄົນຂອງອາເມຣິກາໄດ້ສົມຮູ້ຮ່ວມຄິດກັບພວກນັກການເມືອງ, ຂະຫຍາຍຄວາມຄຽດຊັງທາງເຊື້ອຊາດຢ່າງບໍ່ຢຸດຢັ້ງ,ເຮັດໃຫ້ຄວາມແຕກແຍກແລະຄວາມເປັນປໍລະປັກກັນຢູ່ສັງຄົມອາເມຣິກາມີຄວາມຮ້າຍແຮງຂຶ້ນຕື່ມ.
ພາຍໃຕ້ສະພາບການແຜ່ລະບາດຂອງພະຍາດໂຄວິດ-19, ຄົນອາເມຣິກາເຊື້ອສາຍອາຊີຖືກປະຕິບັດຢ່າງບໍ່ສະເໝີພາບກັນເຊິ່ງເປັນການລົບກວນແລະສະກັດກັ້ນໂດຍກົງຕໍ່ການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19. ປັດຈຸບັນ, ຄົນອາເມຣິກາເຊື້ອສາຍອາຊີທີ່ກວມ 6% ຂອງປະຊາກອນທັງໝົດຂອງອາເມຣິກາໄດ້ເຂົ້າຮ່ວມໃນການກໍ່ສ້າງແລະການພັດທະນາໃນຂົງເຂດເສດຖະກິດ,ການສຶກສາ,ສາທາລະນະສຸກ,ວິທະຍາສາດເຕັກໂນໂລຊີ,ວັດທະນະທຳແລະຂົງເຂດອື່ນໆຢູ່ອາເມຣິກາຢ່າງຮອບດ້ານ. ປັດຈຸບັນ, ນັກການເມືອງອາເມຣິກາພວມສຸມໃສ່ການຟື້ນຟູເສດຖະກິດຄືນໃໝ່ຢ່າງເຄັ່ງຮ້ອນ,ຖ້າຄົນອາເມຣິກາເຊື້ອສາຍອາຊີຖືກທຳລາຍຍ້ອນການຈຳແນກເຊື້ອຊາດ,ຍ່ອມຈະທຳລາຍການພັດທະນາເສດຖະກິດສັງຄົມຂອງອາເມຣິກາໃນທີ່ສຸດ.
ການແຜ່ລະບາດຂອງພະຍາດໂຄວິດ-19 ບໍ່ມີພົມແດນແລະບໍ່ຈຳແນກເຊື້ອຊາດ, ຄວາມສາມັກຄີແລະຮ່ວມແຮງຮ່ວມໃຈກັນ,ປະຕິບັດຕໍ່ກັນດ້ວຍຄວາມຈິງໃຈຈຶ່ງຈະສາມາດເອົາຊະນະເຊື້ອພະຍາດໄດ້. ຄຳເວົ້າກ່ຽວກັບລັດທິຊາດນິຍົມຈາກທຳນຽບຂາວແລະລັດຖະສະພາຂອງອາເມຣິກາພວມເຮັດໃຫ້ຄວາມຂັດແຍ້ງກັນແລະຄວາມແຕກແຍກກັນທາງສັງຄົມອາເມຣິກາມີຄວາມຮ້າຍແຮງຂຶ້ນຕື່ມ,ເຮັດໃຫ້ປະຊາຊົນອາເມຣິກາຕົກຢູ່ໃນສະພາບຄວາມຄຽດຊັງແລະການເປັນປໍລະປັກກັນ.
ຄຳເຫັນ
0