ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ5ມິຖຸນານີ້,ທ່ານສີຈິ້ນຜິງ ປະທານປະເທດຈີນໄດ້ສົນະນາກັບທ່າແອມມານູແອນ ມາຄຣົງ ປະທານາທິບໍດີຝລັ່ງຜ່ານທາງໂທລະສັບ.
ທ່ານສີຈິ້ນຜິງກ່າວເນັ້ນວ່າ,ຕັ້ງແຕ່ເກີດການແຜ່ລະບາດຂອງພະຍາດໂຄວິດ19ເປັນຕົ້ນມາ,ຈີນແລະຝລັງໄດ້ຮັກສາການປະສານງານທາງຍຸດທະສາດໃນລະດັບສູງ. ປັດຈຸບັນ, ການແຜ່ລະບາດຂອງພະຍາດໂຄວິດ19ຍັງບໍ່ສາມາດຄວບຄຸມຢ່າງມີປະສິດທິຜົນໄດ້ເທື່ອ. ເມື່ອຜະເຊີນໜ້າກັບການແຜ່ລະບາດຂອງພະຍາດທີ່ຮ້າຍແຮງ,ຄວາມສາມັກຄີແລະຮ່ວມມືກັນຈິ່ງເປັນຊ່ອງທາງທີ່ຖືກຕ້ອງ. ຈີນແລະຝລັ່ງຕ້ອງສືບຕໍ່ພ້ອມກັນສະໜັບສະໜູນປະຊາຄົມໂລກເພື່ອສາມັກຄີກັນຕ້ານກັບພະຍາດດັ່ງກ່າວ, ປະກອບສ່ວນຂອງຈີນແລະຝລັ່ງໃນການເອົາຊະນະກັບການແຜ່ລະບາດຂອງພະຍາດໂຄວິດ19ໃນທົ່ວໂລກໃນທີ່ສຸດ. ຕ້ອງຊຸກຍູ້ອົງການຈັດຕັ້ງຂອງສອງປະເທດດຳເນີນການຄົ້ນຄວ້າຮ່ວມກັນ,ສະໜັບສະໜູນການຮ່ວມມືສາກົນໃນການຄົ້ນຄວ້າຜະລິດວັກແຊນແລະຢາປິ່ນປົວ,ເລັ່ງລັດຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບກັນຂອງກອງປະຊຸມໃຫຍ່ອົງການອະນາໄມໂລກຄັ້ງທີ73,ເພີ່ມທະວີການສະໜັບສະໜູນອົງການອະນາໄມໂລກ,ເພີ່ມທະວີການຮ່ວມມືໃນການຕ້ານກັບພະຍາດໂຄວິດ19ລະຫວ່າງຈີນ ຝລັ່ງແລະອາຟຣີກາ,ສະໜັບສະໜູນປະເທດໃນພາກພື້ນດ້ອຍພັດທະນາເຊັ່ນ ອາຟຣີກາໃນການຕ້ານກັບພະຍາດໂຄວິດ19. ຕ້ອງຍຶດໝັ້ນລັດທິຫຼາຍຝ່າຍ,ຊຸກຍູ້ສັນຕິພາບແລະສະຖຽນລະພາບຂອງໂລກ.
ທ່ານສີຈິ້ນຜິງຊີ້ໃຫ້ເຫັນວ່າ,ຈີນແລະສະຫະພາບເອີລົບແມ່ນຄູ່ຮ່ວມຍຸດທະສາດຮອບດ້ານທີ່ມີຜົນປະໂຫຍດຮ່ວມຢ່າງກວ້າງຂວາງ. ຈີນຮູ້ສຶກປິຕິຊົມຊື່ນຕໍ່ຄວາມຄືບໜ້າຂອງການເຊື່ອມໂຍງສະຫະພາບເອີລົບ,ຍິນດີຮ່ວມກັບສະຫະພາບເອີລົບເພີ່ມທະວີການຮ່ວມມືດ້ານຍຸດທະສາດ,ຊຸກຍູ້ວາລະວຽກທາງການເມືອງທີ່ສຳຄັນຈີນ-ສະຫະພາບເອີລົບ,ສະໜັບສະໜູນລັດທິຫຼາຍຝ່າຍ,ພ້ອມກັນຮັບມືກັບສິ່ງທ້າທາຍທົ່ວໂລກເຊັ່ນສາທາລະນະສຸກ,ການປ່ຽນແປງຂອງດິນຟ້າອາກາດ,ການອະນຸລັກສິ່ງແວດລ້ອມຊີວະນານາພັນແລະອື່ນໆ,ຊຸກຍູ້ການພົວພັນຈີນ-ເອີລົບໃຫ້ຂະຫຍາຍຕົວຖາວອນແລະໝັ້ນທ່ຽງ.
ທ່ານມາຄຣົງກ່າວວ່າ, ຝລັ່ງແລະຈີນໄດ້ສາມັກຄີແລະຮ່ວມມືກັນເປັນຢ່າງດີໃນການຕ້ານກັບພະຍາດໂຄວິດ19.ຝລັ່ງຫວັງຢາກສືບຕໍ່ເພີ່ມທະວີການຮ່ວມມືກັບຈີນບົນຈິດໃຈດັ່ງກ່າວ. ຝລັ່ງຊົມເຊີຍທີ່ທ່ານປະທານສີຈິ້ນຜິງປະກາດວ່າຈີນຈະໃຫ້ວັກແຊງທີ່ຕົນຄົ້ນຄວ້າຜະລິດອອກມານັ້ນເປັນຜະລິດຕະພັນສາທາລະນະສາກົນ, ຍິນດີຮ່ວມກັນກັບຈີນໃນການຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບກັນຂອງກອງປະຊຸມໃຫຍ່ອົງການອະນາໄມໂລກ,ສະໜັບສະໜູນໃຫ້ອົງການອະນາໄມໂລກເສີມຂະຫຍາຍບົດບາດທີ່ສຳຄັນ, ເພີ່ມທະວີການຮ່ວມມືກັບອົງການອະນາໄມໂລກ,ແລະເພີ່ມທະວີການສະໜັບສະໜູນປະເທດອາຟຣີກາໃນການຕ້ານກັບພະຍາດໂຄວິດ19. ຝລັ່ງຍິນດີຮ່ວມກັນກັບຈີນເພື່ອປົກປ້ອງລັດທິຫຼາຍຝ່າຍ,ເພີ່ມທະວີການຮ່ວມມືກັນໃນຂົງເຂດຕ່າງໆເຊັ່ນ ການປ່ຽນແປງຂອງດິນຟ້າອາກາດ,ແລະສິ່ງແວດລ້ອມຊີວະນານາພັນ, ເສີມສ້າງປັດໄຈອັນຕັ້ງໜ້າຫຼາຍກວ່າເກົ່າເພື່ອສັນຕິພາບແລະສະຖຽນລະພາບຂອງໂລກ. ຝລັ່ງເອົາໃຈໃສ່ໃນລະດັບສູງຕໍ່ການໄປມາຫາສູ່ແລກປ່ຽນກັນທີ່ສຳຄັນຕ່າງໆລະຫວ່າງສະຫະພາບເອີລົບກັບຈີນໃນໄລຍະຕໍ່ໜ້າ,ແລະຍິນດີເສີມຂະຫຍາຍບົດບາດອັນຕັ້ງໜ້າຂອງຕົນ.
ຄຳເຫັນ
0