ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນເມື່ອບໍ່ດົນມານີ້, ທ່ານໄມ ພົມແພວ ລັດຖະມົນຕີກະຊວງການຕ່າງປະເທດອາເມຣິກາ ຜູ້ມີແຕ່ຄຳຫຼອກລວງ ໄດ້ໃສ່ຮ້າຍປ້າຍສີຈີນອີກວ່າ: ການຊ່ວຍເຫຼືອຂອງຈີນໃຫ້ກັບອາຟຣິກາແມ່ນ “ຄຳໝັ້ນສັນຍາທີ່ຫວ່າງເປົ່າ”, ແລະຕຳໜິຜົນສຳເລັດຂອງກອງປະຊຸມສຸດຍອດສະໄໝພິເສດຈີນ-ອາຟຣິກາເພື່ອສາມັກຄີກັນຕ້ານກັບການແຜ່ລະບາດຂອງພະຍາດໂຄວິດ-19.
ແມ່ນໃຜກັນແທ້ທີ່ເປັນເພື່ອນມິດທີ່ແທ້ຈິງຂອງອາຟຣິກາ, ແມ່ນໃຜກັນແທ້ທີ່ໃຫ້ “ເຊັກເດ້ງ” ໃນການຊ່ວຍເຫຼືອອາຟຣິກາ, ປະຊາຊົນອາຟຣິກາເຂົ້າໃຈເລື້ອງນີ້ໄດ້ເປັນຢ່າງດີ. ພາຍຫຼັງພະຍາດໂຄວິດ-19 ແຜ່ລະບາດຢູ່ອາຟຣິກາແລ້ວ, ຈີນໄດ້ໃຫ້ການຊ່ວຍເຫຼືອຢ່າງວ່ອງໄວ ລວມທັງມອບເຄື່ອງອຸປະກອນປິ່ນປົວຢ່າງຫຼວງຫຼາຍໃຫ້ແກ່ 50 ກວ່າປະເທດອາຟຣິກາ ແລະ ສະຫະພາບອາຟຣິກາ, ສົ່ງໜ່ວຍຊ່ຽວຊານການແພດໄປ 11 ປະເທດ, ຈັດກອງປະຊຸມຜູ້ຊ່ຽວຊານທາງວິດີໂອ 30 ກວ່າເທື່ອ ແລະ ຈັດຊຸດອົບຮົມປະເພດຕ່າງໆເກືອບ 400 ເທື່ອ, ໜ່ວຍຊ່ຽວຊານແລະແພດໝໍຈີນ 46 ໜ່ວຍທີ່ປະຈຳອາຟຣິກາເປັນເວລາຍາວນານກໍໄດ້ເຮັດວຽກຕ້ານກັບການແຜ່ລະບາດຂອງພະຍາດຢ່າງຕັ້ງໜ້າ.
ໃນກອງປະຊຸມສຸດຍອດສະໄໝພິເສດຈີນ-ອາຟຣິກາ ເພື່ອສາມັກຄີກັນຕ້ານກັບການແຜ່ລະບາດຂອງພະຍາດໂຄວິດ-19 ທີ່ຈັດຂຶ້ນໃນເມື່ອບໍ່ດົນມານີ້, ທ່ານສີຈິ້ນຜິງໄດ້ໃຫ້ຄຳໝັ້ນສັນຍາວ່າ: ພາຍຫຼັງວັກແຊງປ້ອງກັນພະຍາດໂຄວິດ-19 ຄົ້ນຄວ້າຜະລິດອອກມາແລະລົງນຳໃຊ້ຕົວຈິງແລ້ວ, ຈະໃຫ້ບຸລິມະສິດແກ່ປະເທດອາຟຣິການຳໃຊ້ກ່ອນໝູ່, ຈະຍົກເວັ້ນເງິນກູ້ທີ່ບໍ່ມີດອກເບັ້ຍຂອງປະເທດອາຟຣິກາທີ່ກູ້ຢືມຈາກຈີນທີ່ຈະໝົດອາຍຸກ່ອນທ້າຍປີ 2020 ພາຍໃຕ້ຂອບເວທີປຶກສາຫາລືການຮ່ວມມືຈີນ-ອາຟຣິກາ ແລະອື່ນໆ. ມາດຕະການທີ່ແທ້ຈິງເຫຼົ່ານີ້, ແມ່ນຄວາມພະຍາຍາມຢ່າງຈິງໃຈຂອງຈີນທີ່ສະໜັບສະໜູນອາຟຣິກາຕ້ານກັບການແຜ່ລະບາດຂອງພະຍາດ ແລະ ເຮັດໃຫ້ເສດຖະກິດສາມາດຟື້ນຕົວຄືນໃໝ່, ເຊິ່ງໄດ້ຮັບຄວາມຍ້ອງຍໍຈາກເພື່ອນມິດອາຟຣິກາແລະອົງການຈັດຕັ້ງສາກົນ.
ເມື່ອທຽບໃສ່ການກະທຳຂອງຈີນແລ້ວ, ພາຍຫຼັງເກີດການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ທ່ານ ໄມ ພົມແພວໄດ້ກ່າວມາຫຼາຍເທື່ອແລ້ວວ່າຈະໃຫ້ການຊ່ວຍເຫຼືອແກ່ປະຊາຄົມໂລກໃນການຕ້ານກັບການແຜ່ລະບາດຂອງພະຍາດ. ແຕ່ຂ່າວສານ AP ອາເມຣິກາໄດ້ລາຍງານຂ່າວເມື່ອບໍ່ດົນມານີ້ວ່າ, ອົງການຊ່ວຍເຫຼືອສາກົນ 20 ກວ່າແຫ່ງໄດ້ສົ່ງຈົດໝາຍເຖິງລັດຖະບານອາເມຣິກາ, ເນື້ອໃນຈົດໝາຍລະບຸວ່າ: “ການຊ່ວຍເຫຼືອທາງມະສຸດສະທຳຈາກອາເມຣິກາເພື່ອໃຊ້ໃນການຕ້ານກັບພະຍາດແມ່ນມີໜ້ອຍທີ່ສຸດ ຫຼືວ່າ ເກືອບບໍ່ມີເລີຍ.” ຫຼາຍປະເທດໃນອາຟຣິກາກໍ່ໄດ້ກ່າວວ່າ ບໍ່ເຄີຍໄດ້ຮັບການຊ່ວຍເຫຼືອເຄື່ອງອຸປະກອນປິ່ນປົວທີ່ອາເມຣິກາກ່າວວ່າຈະມອບໃຫ້ເປັນຈຳນວນຫຼວງຫຼາຍ.
“ອາຟຣິກາແລະຈີນທັງເປັນເພື່ອນມິດ, ທັງເປັນເພື່ອນຮ່ວມຮົບໃນການຕ້ານກັບພະຍາດ, ບໍ່ມີເລື່ອງໃດທີ່ສາມາດປ່ຽນແປງ ຫຼື ທຳລາຍການພົວພັນມິດຕະພາບລະຫວ່າງອາຟຣິກາກັບຈີນໄດ້.”ຖ້ອຍຄວາມທີ່ເດັດດ່ຽວຂອງທ່ານມູຊາ ຟະກິ ມະຮະມັດ ປະທານຄະນະກຳມະການສະຫະພາບອາຟຣິກາ ກໍຄືສຽງສະທ້ອນຈາກດວງໃຈຂອງປະຊາຊົນອາຟຣິກາ. ສຳລັບທ່ານໄມ ພົມແພວຄວນເອົາໃຈໃສ່ໃນການຮັບມືກັບພະຍາດໂຄວິດ-19 ທີ່ແຜ່ລະບາດຢູ່ອາເມຣິກາຈະດີກວ່າ, ຖ້າບໍ່ດັ່ງນັ້ນ, ຄຳເວົ້າຂອງນັກວິເຄາະທີ່ວ່າ “ລັດຖະມົນຕີກະຊວງການຕ່າງປະເທດອາເມຣິກາທີ່ຂີ້ຮ້າຍທີ່ສຸດໃນປະຫວັດສາດ” ຈະບໍ່ມີວັນສາມາດປ່ຽນແປງໄດ້ຈົນຕາບເທົ່າໃດໆ.
ຄຳເຫັນ
0