ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, CNN ຂອງອາເມຣິກາໄດ້ພິມບົດຄວາມລົງໃນເວັບໄຊຂອງຕົນ ໂດຍກ່າວວ່າ, ຫວ່າງມໍ່ໆມານີ້, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ທີ່ເພີ່ມໃໝ່ໃນມື້ດຽວຢູ່ອາເມຣິກາໄດ້ສ້າງສະຖິຕິໃໝ່ມາຫຼາຍມື້ລຽນຕິດແລ້ວ, ຈຳນວນຜູ້ເສຍຊີວິດກໍໄດ້ເພີ່ມຂຶ້ນ. ນີ້ໝາຍຄວາມວ່າ ອາເມຣິກາໄດ້ຕົກເຂົ້າສູ່ສະພາບຫຍຸ້ງຍາກໃນການຮັບມືກັບພະຍາດໂຄວິດ-19 ນັບມື້ນັບໜັກໜ່ວງກວ່າເກົ່າ, ໃນຫຼາຍເດືອນຕໍ່ໜ້າກໍບໍ່ສາມາດຄາດຫວັງຝັນຮ້າຍດັ່ງກ່າວຈະສິ້ນສຸດລົງ.
ໃນບົດຄວາມຍັງຂຽນວ່າ, ລັດຖະບານສະຫະລັດອາເມຣິກາເຕັມໄປດ້ວຍຄວາມເພີ້ຝັນ, ດື້ດ້ານໂດຍເຫັນວ່າວຽກງານຕ້ານກັບພະຍາດຂອງອາເມຣິກາຢູ່ໃນລະດັບນຳໜ້າຂອງໂລກ, ພວກເຈົ້າໜ້າກໍມີຄວາມຂັດແຍ່ງກັນເອງ, ບໍ່ໄດ້ແຈ້ງຄວາມຈິງ ທັງມີຄວາມວຸ້ນວາຍເອງ, ໃນຄວາມເປັນຈິງແລ້ວ, ເຂົາເຈົ້າຄວນຊີ້ແຈງທິດທາງໃນການຕ້ານກັບພະຍາດໃຫ້ແກ່ຊາວອາເມຣິກາ.
ໃນບົດຄວາມໄດ້ເປີດເຜີຍວ່າ, ປະຈຸບັນ ອາເມຣິກາບໍ່ມີຄວາມສາມາດສັງລວມໃນການກວດກາເຊື້ອແລະ ຕິດຕາມຜູ້ມີເຊື້ອພະຍາດຈຳນວນຫຼາຍ, ບໍ່ສາມາດຄົ້ນຫາ ແລະ ກັກບໍລິເວນຢູ່ເຂດທີ່ເກີດມີການແຜ່ລະບາດຂອງພະຍາດ, ໃນຂະນະດຽວກັນ, ລັດຖະບານສະຫະລັດອາເມຣິກາຍັງອະນຸມັດໃຫ້ເປີດໂຮງຮຽນຄືນໃໝ່, ແຕ່ຍ້ອນໄດ້ເຜີຍແຜ່ຂໍ້ມູນທີ່ຂາດຄວາມເປັນເອກະພາບກັນຕໍ່ພາຍນອກ, ມາດຕະການເຫຼົ່ານີ້ໄດ້ກາຍເປັນເລື່ອງຕະຫຼົກ.
ບົດຄວາມຍັງຊີ້ອອກວ່າ, ການແຜ່ລະບາດຂອງພະຍາດໂຄວິດ-19 ແມ່ນວິກິດການທີ່ຮ້າຍແຮງທີ່ສຸດທີ່ເກີດຂຶ້ນຢູ່ດິນແດນອາເມຣິການັບແຕ່ສົງຄາມໂລກຄັ້ງທີ 2 ເປັນຕົ້ນມາ, ໄດ້ແກ່ຍາວມາຫຼາຍເດືອນແລ້ວ, ແຕ່ຄົນທັງຫຼາຍຍັງຖຽງກັນວ່າຈະໃສ່ຜ້າປິດປາກຫຼືບໍ່. ທ່ານອານໂທນີ ໂຟຊີ ຫົວໜ້າສະຖາບັນຄົ້ນຄວ້າ ພະຍາດຕິດແປດ ແລະ ພູມແພ້ແຫ່ງຊາດອາເມຣິກາຄືຊິເປັນເຈົ້າໜ້າທີ່ພຽງຜູ້ດຽວທີ່ມີຄຳຕອບ, ແຕ່ຫາກຖືກຫ້າມບໍ່ໃຫ້ສຳພາດຕໍ່ສື່ສຳຄັນ. ສຳລັບຜູ້ນຳອາເມຣິການັ້ນພັດມັກເວົ້າແຕ່ເລື່ອງການເມືອງ ແລະ ການເລືອກຕັ້ງຫຼາຍກວ່າໃນເວລາທີ່ທ່ານອອກໜ້າຈໍໂທລະພາບໃນນາທີຄຳ.
ຄຳເຫັນ
0