ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 30 ກໍລະກົດແລ້ວນີ້, ກະຊວງການຄ້າອາເມຣິກາໄດ້ເປີດເຜີຍຂໍ້ມູນຄາດຄະເນຄັ້ງທຳອິດ ໂດຍສະແດງໃຫ້ເຫັນວ່າ, ຍ້ອນໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, GDP ຕົວຈິງຂອງອາເມຣິກາໃນໄຕມາດທີ 2 ປີນີ້ ໄດ້ຫຼຸດລົງ 32.9%, ເຊິ່ງເປັນຈັງຫວະຫຼຸດລົງຫຼາຍທີ່ສຸດນັບຕັ້ງແຕ່ເລີ່ມເກັບກຳສະຖິຕິເມື່ອປີ 1947ເປັນຕົ້ນມາ.
ຕົວເລກຂໍ້ມູນສະແດງໃຫ້ເຫັນວ່າ, ໃນໄຕມາດທີ 2 ປີນີ້, ລາຍຈ່າຍດ້ານການບໍລິໂພກຂອງສ່ວນຕົວບຸກຄົນທີ່ກວມປະມານ 70% ຂອງຍອດປະລິມານເສດຖະກິດອາເມຣິກາໄດ້ຫຼຸດລົງ 34,6%, ເຊິ່ງເປັນການຊຸດໂຊມທີ່ໜັກໜ່ວງທີ່ສຸດນັບຕັ້ງແຕ່ເລີ່ມເກັບກຳສະຖິຕິເປັນຕົ້ນມາ. ໃນນັ້ນ, ລາຍຈ່າຍໃນຂະແໜງການບໍລິການທີ່ໄດ້ຮັບຜົນກະທົບຢ່າງໜັກໜ່ວງທີ່ສຸດຈາກການແຜ່ລະບາດຂອງພະຍາດໄດ້ຫຼຸດລົງ 43,5%; ການລົງທຶນດ້ານຊັບສິນຄົງທີ່ປະເພດບໍ່ແມ່ນເຮືອນຢູ່ ທີ່ສ່ອງແສງເຖິງສະພາບການລົງທຶນຂອງວິສາຫະກິດໄດ້ຫຼຸດລົງ 27%. ຍ້ອນວ່າລັດຖະບານອາເມຣິກາໄດ້ເພີ່ມລາຍຈ່າຍງົບປະມານເພື່ອສະໜັບສະໜູນການພັດທະນາເສດຖະກິດ, ລາຍຈ່າຍຂອງລັດຖະບານສະຫະລັດອາເມຣິກາໄດ້ເພີ່ມຂຶ້ນ 17,4%.
ນັກວິເຄາະເຫັນວ່າ, ຍ້ອນວ່າພະຍາດໂຄວິດ-19ໄດ້ແຜ່ລະບາດຮ້າຍແຮງຂຶ້ນອີກຢູ່ຫຼາຍທ້ອງຖິ່ນຂອງອາເມຣິກາ, ຫຼາຍລັດໄດ້ໃຊ້ມາດຕະການປິດເມືອງອີກ, ເຊິ່ງໄດ້ສ້າງຜົນກະທົບຕໍ່ເສດຖະກິດອາເມຣິກາທີ່ຫາກໍມີວີແວວຟື້ນຕົວຄືນໃໝ່. ກ່ອນການແຜ່ລະບາດຂອງພະຍາດໂຄວິດ-19 ສິ້ນສຸດລົງ ແລະ ການຄ້າສາກົນຟື້ນຕົວຄືນໃໝ່ນັ້ນ, ເສດຖະກິດອາເມຣິກາອາດຈະຍາກທີ່ມີການຟື້ນຕົວຄືນໃໝ່ຢ່າງວ່ອງໄວໄດ້.
ຄຳເຫັນ
0