ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ດິນດຳທີ່ອຸດົມສົມບູນຢູ່ພາກຕາເວັນອອກສຽງເໜືອຂອງຈີນ, ແມ່ນແຫຼ່ງຜະລິດສະບຽງອາຫານເປັນສິນຄ້າທີ່ສຳຄັນຂອງທົ່ວປະເທດຈີນ, ພົວພັນເຖິງ ສະພາບການລວມຂອງຄວາມໝັ້ນຄົງດ້ານສະບຽງອາຫານຂອງຈີນ.
ດິນດຳແມ່ນດິນທີ່ອຸດົມສົມບູນທີ່ຮັບຮູ້ທົ່ວໄປໃນໂລກ. ເຂດດິນດຳໃນໂລກມີແຕ່ 3 ແຫ່ງ, ທົ່ງພຽງຕາເວັນອອກສຽງເໜືອຂອງຈີນກໍແມ່ນໜຶ່ງໃນ 3 ແຫ່ງນັ້ນ, ແລະໄດ້ມີຢູ່ແລ້ວເປັນໝື່ນປີ. ແຕ່ນັບແຕ່ການບຸກເບີກເປັນຕົ້ນມາ, ຍ້ອນການນຳໃຊ້ຫຼາຍເກີນໄປ, ຄວາມໜາຂອງດິນດຳຢູ່ພາກຕາເວັນອອກສຽງເໜືອຂອງຈີນໄດ້ຫຼຸດລົງຈາກ 60 ຊັງຕີແມັດຍັງເຫຼືອ 20-30 ຊັງຕີແມັດ. ເມື່ອຊັ້ນດິນດຳຫາຍໄປໝົດ, ໃຕ້ເງື່ອນໄຂດຽວກັນຜົນຜະລິດສາລີອາດຈະຫຼຸດໜ້ອຍລົງ 60%, ຜົນການຜະລິດຖົ່ວເຫຼືອງຈະຫຼຸດໜ້ອຍລົງ 30%.ຍິ່ງກວ່ານັ້ນຍັງອາດຈະກໍ່ໃຫ້ເກີດບັນຫາຮ້າຍແຮງ ເຊັ່ນ: ນ້ຳເຊາະດິນເຈື່ອນ ໄພພາຍຸຊາຍ ແລະອື່ນໆ.
ວັນທີ 22 ກໍລະກົດປີ 2020, ໃນເວລາໄປສຳຫຼວດກວດກາວຽກງານຢູ່ແຂວງຈີລິນ,ທ່ານສີຈິ້ນຜິງໄດ້ໄປເຂດສາທິດແກນກາງຂອງແຫຼ່ງຜະລິດມາດຕະຖານເພື່ອຜະລິດວັດຖຸດິບສຳລັບເຮັດອາຫານປອດສານພິດ (ສາລີ) ຂະໜາດລ້ານມູ (ປະມານ66.667ເຮັກຕາ) ຂອງຊາດ ຢູ່ເມືອງລີຊູ້ ນະຄອນຊື້ຜິງ.
ການຮັກສາດິນດຳໃຫ້ດີ ກໍຄືການບັນລຸການຫັນເປັນທັນສະໄໝດ້ານກະສິກຳ, ເຮັດໃຫ້ປະຊາຊົນຢູ່ເຢັນເປັນສຸກ, ນີ້ກໍແມ່ນຄວາມມຸ່ງຫວັງ ແລະ ຄວາມປາຖະໜາຂອງທ່ານສີຈິ້ນຜິງ. ປີ 2018, ໃນເວລາໄປສຳຫຼວດກວດກາວຽກງານຢູ່ແຂວງເຫີ່ຍໂລງຈ່ຽງ, ທ່ານສີຈິ້ນຜິງຊີ້ອອກວ່າ, ຕ້ອງເລັ່ງລັດການພັດທະນາກະສິກຳແບບສີຂຽວ, ຍຶດໝັ້ນການປະສົມປະສານການນຳໃຊ້ກັບການປົວແປງ, ໃຊ້ນະໂຍບາຍແບບສັງລວມ, ຕ້ອງຮັບປະກັນວ່າດິນດຳຈະບໍ່ຫຼຸດໜ້ອຍລົງ, ທັງບໍ່ຊຸດໂຊມລົງ. ວັນທີ 22 ກໍລະກົດປີ 2020, ໃນເວລາໄປສຳຫຼວດກວດກາວຽກງານຢູ່ແຂວງຈີລິນ, ທ່ານສີຈິ້ນຜິງໄດ້ກ່າວເນັ້ນວ່າ, ຕ້ອງຮັກສາດິນດຳໃຫ້ດີ, ນີ້ປຽບເໝືອນ “ໝີແພນດ້າໃນດິນປູກຝັງ”.
ທ່ານສີຈິ້ນຜິງກ່າວວ່າ: ຕ້ອງຮັກສາດິນດຳໃຫ້ດີ, ນີ້ແມ່ນ “ໝີແພນດ້າໃນດິນປູກຝັງ”. ດິນແດນແຫ່ງນີ້ແມ່ນ “ເຂດສາລີຄຳ” ທັງແມ່ນ “ແດນຖົ່ວເຫຼືອງ”, ຕ້ອງໃຊ້ມາດຕະການທີ່ເໝາະສົມຈຳນວນໜຶ່ງ. ປະຈຸບັນ ພວກເຈົ້າເອົາຕົ້ນສາລີແຫ້ງປົກຫຸ້ມໃສ່ເນື້ອທີ່ສວນຄືນໃໝ່, ຄົ້ນຄວ້າຮູບແບບເມືອງລີຊູ້ແບບນີ້, ຄວນສະຫຼຸບເປັນບົດຮຽນຄັກແນ່, ຄວນເຜີຍແຜ່ຕໍ່ເພື່ອເອົາໄປນຳໃຊ້ໃນຂອບເຂດກວ້າງຂວາງກວ່າເກົ່າ.
ວັນທີ 22 ກໍລະກົດປີ2020, ທ່ານສີຈິ້ນຜິງໄດ້ໄປສຳຫຼວດກວດກາຢູ່ແຂວງຈີລິນໂດຍໄດ້ໄປສຳຫຼວດກວດເບິ່ງສະຫະກອນວິຊາການກົນຈັກກະສິກຳ ແລະ ຊາວກະສິກອນລູເວີຍ.
ຮູບແບບເມືອງລີຊູ້ທີ່ທ່ານສີຈິ້ນຜິງເວົ້າເຖິງນັ້ນ, ແມ່ນເຕັກນິກປູກຝັງແບບສີຂຽວທີ່ຮັກສາດິນດຳ, ຄື ໃນຂັ້ນຕອນຂອງການປູກສາລີ, ເອົາຕົ້ນສາລີແຫ້ງປົກຫຸ້ມໃສ່ເນື້ອທີ່ສວນຄືນໃໝ່, ຫຼຸດປະລິມານການໄຖນາ, ໃນຂັ້ນຕອນຕົ້ນຕໍຂອງການຜະລິດໄດ້ນຳໃຊ້ກົນຈັກທັງໝົດ. ຢູ່ແຫຼ່ງຜະລິດ, ທ່ານຫຼີປາວກົວ ສາສະດາຈານຂອງມະຫາວິໄລຍາໄລກະສິກຳຈີນໄດ້ແນະນຳໃຫ້ທ່ານສີຈິ້ນຜິງຮູ້ວ່າ, ຮູບແບບການຜະລິດແບບນີ້ບໍ່ພຽງແຕ່ສາມາດຄວາມຊຸມຂອງດິນ ຍົກສູງທາດບຳລຸງຂອງດິນໄດ້ເທົ່ານັ້ນ, ຍັງໄດ້ແກ້ໄຂບັນຫາເນື້ອທີ່ດິນຊຸດໂຊມລົງຍ້ອນການຈູດເຜົາຕົ້ນສາລີແຫ້ງ ພ້ອມດ້ວຍບັນຫາສິ່ງແວດລ້ອມທີ່ເກີດຂຶ້ນຕາມຫຼັງ, ເຊິ່ງເປັນການຮັບປະກັນການພັດທະນາແບບຍືນຍົງດ້ານກະສິກຳ.
ໃນສາງມີສະບຽງອາຫານພຽງພໍ ປະເທດຈຶ່ງມີສະຖຽນລະພາບ. ເວົ້າສຳລັບປະຊາຊົນສາມັນແລ້ວ, “ທຸກສິ່ງທຸກຢ່າງ, ເລື່ອງກິນເຂົ້າແມ່ນສິ່ງສຳຄັນກວ່າໝູ່”; ເວົ້າສຳລັບປະເທດໃຫຍ່ດ້ານປະຊາກອນແລ້ວ, ບັນຫາສະບຽງອາຫານຂອງປະຊາຊົນ 1,4 ຕື້ຄົນສາມາດຮັບປະກັນໄດ້ເປັນຢ່າງດີຫຼືບໍ່, ໄດ້ພົວພັນເຖິງການພັດທະນາຂອງປະເທດ ແລະ ຄວາມສຸກຂອງປະຊາຊົນ, ແມ່ນວຽກງານສຳຄັນອັນດັບໜຶ່ງໃນການປົກຄອງປະເທດ.
ການປະຕິບັດວຽກງານສຳຄັນອັນດັບໜຶ່ງນີ້ໃຫ້ດີ, ການຫັນເປັນທັນສະໄໝດ້ານກະສິກຳແມ່ນທິດທາງຂອງການຂະຫຍາຍຕົວ, ວິທະຍາສາດເຕັກໂນໂລຊີ ແລະ ຜູ້ມີຄວາມຮູ້ຄວາມສາມາດແມ່ນປັດໄຈສຳຄັນ. ໃນຫົກເດືອນຕົ້ນປີ 2020, ການແຜ່ລະບາດຂອງພະຍາດໂຄວິດ-19 ໄດ້ເກີດຂຶ້ນຢ່າງກະທັນຫັນ, ໄດ້ສົ່ງຜົນກະທົບຕໍ່ການຜະລິດສະບຽງອາຫານ ການປຸງແຕ່ງ ແລະ ການຈໍລະຈອນສິນຄ້າ, ປັດໄຈພາຍນອກ ເຊິ່ງລວມທັງການປ່ຽນແປງຂອງຕະຫຼາດສະບຽງອາຫານສາກົນ ແລະອື່ນໆກໍພາໃຫ້ເກີດຄວາມເປັນຫ່ວງຕໍ່ຄວາມໝັ້ນຄົງດ້ານສະບຽງອາຫານ. ໂດຍຜ່ານຄວາມພະຍາຍາມຂອງຝ່າຍຕ່າງໆ, ຈີນໄດ້ຮັບຜົນເກັບກ່ຽວລະດູຮ້ອນຢ່າງອຸດົມສົມບູນເປັນ 17 ປີຕິດຕໍ່ກັນ, ເຊິ່ງໄດ້ເພີ່ມຄວາມໝັ້ນໃຈໃຫ້ກັບຄວາມໝັ້ນຄົງດ້ານສະບຽງອາຫານຂອງຊາດ ແລະ ປະຊາຊົນ. ຢູ່ເບື້ອງຫຼັງຂອງຜົນເກັບກ່ຽວນີ້, ກໍແມ່ນການຄ້ຳຊູທີ່ເຂັ້ມແຂງຂອງວິທະຍາສາດເຕັກໂນໂລຊີກະສິກຳ.
ວິທະຍາສາດເຕັກໂນໂລຊີເຮັດໃຫ້ຈີນມີຄວາມໝັ້ນຄົງດ້ານສະບຽງອາຫານທີ່ໜັກແໜ້ນກວ່າເກົ່າ. ການຮັບປະກັນຄວາມໝັ້ນຄົງດ້ານສະບຽງອາຫານ ສິ່ງສຳຄັນແມ່ນຮັບປະກັນຄວາມສາມາດການຜະລິດສະບຽງອາຫານ, ຕ້ອງຮັບປະກັນຄວາມສາມາດໃນການຜະລິດໃຫ້ໄດ້ ແລະ ສະໜອງໃຫ້ພຽງພໍໃນເວລາທີ່ມີຄວາມຕ້ອງການ. ໃນອະດີດ ປະຊາຊົນປູກຝັງແມ່ນອາໄສທຳມະຊາດເປັນຫຼັກ, ຄວາມສາມາດປ້ອງກັນຄວາມສ່ຽງດ້ານກະສິກຳບໍ່ສູງປານໃດ, ປະຈຸບັນມີການຄ້ຳຊູຈາກວິທະຍາສາດເຕັກໂນໂລຊີ, ຄວາມສາມາດປ້ອງກັນຄວາມສ່ຽງດ້ານກະສິກຳໄດ້ເພີ່ມຂຶ້ນຢ່າງຫຼວງຫຼາຍ.
ໃນກາງເດືອນພຶດສະພາປີ2020, ຢູ່ບ້ານນານລິງໂພ່ຕາແສງຈ່າງຈ່ວງເມືອງຊ່າງສຸຍແຂວງເຫີນານ, ເຂົ້າເບຼໃນເນື້ອທີ່ 5 ໝື່ນມູ(ປະມານ3333ເຮັກຕາ)ສຸກເຫຼືອງແລ້ວ. ທ່ານລິວທ່ຽນຮວາ ຫົວໜ້າສະຫະກອນທີ່ຮັບຜິດຊອບຄຸ້ມຄອງນາເຂົ້າເບຼຜືນນີ້ໃຫ້ຮູ້ວ່າ, ເວົ້າສຳລັບການປູກເຂົ້າເບຼແລ້ວ, ປີນີ້ບໍ່ສົມເປັນປີທີ່ມີເງື່ອນໄຂທຳມະຊາດທີ່ເອື້ອອຳນວຍ. ກ່ອນອື່ນແມ່ນການແຜ່ລະບາດຂອງພະຍາດໂຄວິດ-19ທີ່ເກີດຂຶ້ນຢ່າງກະທັນຫັນໄດ້ກະທົບເຖິງການປູກຝັງໃນລະດູໃບໄມ້ປົ່ງ, ຫຼັງຈາກນັ້ນໄດ້ຜະເຊີນໜ້າກັບໄພສັດຕູພືດ, ໃນຕົ້ນເດືອນພຶດສະພາຍັງໄດ້ເກີດໄພແຫ້ງແລ້ງເປັນໄລຍະສັ້ນ. ແຕ່ວິທະຍາສາດເຕັກໂນໂລຊີດ້ານກະສິກຳໄດ້ມີສ່ວນຊ່ວຍຫຼາຍ, ໃນໄລຍະທີ່ເກີດການແຜ່ລະບາດຂອງພະຍາດ, ສະຫະກອນໄດ້ນຳໃຊ້ເຄື່ອງຈັກພົ່ນຢາອັດຕະໂນມັດທີ່ຄວບຄຸມດ້ວຍໂທລະສັບມືຖື, ໃຊ້ເວລາ 10 ມື້ກໍສາມາດພົ່ນຢາຂ້າສັດຕູພືດໄດ້ສຳເລັດ; ໃນເວລາເກີດໄພແຫ້ງແລ້ງ, ພຽງແຕ່ຄວບຄຸມຜ່ານໂທລະສັບມືຖື, ລະບົບຫົດນ້ຳກໍສາມາດເລືອກໃຊ້ຮູບແບບຫົດນ້ຳທີ່ແຕກຕ່າງກັນອີງຕາມເງື່ອນໄຂຕ່າງໆຂອງເນື້ອທີ່ດິນ, ສາມາດຫົດນ້ຳຢ່າງມີປະສິດທິພາບສູງ ທັງສາມາດປະຢັດນ້ຳ. ທ່ານລິວທ່ຽນຮວາກ່າວວ່າ: “ຄາດວ່າ ຜົນຜະລິດເຂົ້າເບຼຢູ່ແຫ່ງນີ້ຈະຫຼາຍກວ່າ 9000 ກິໂລຕໍ່ເຮັກຕາ, ຈະເປັນອີກປີໜຶ່ງທີ່ມີຜົນເກັບກ່ຽວຢ່າງອຸດົມສົມບູນ.”
ກໍເປັນແບບນີ້ແຫຼະ, ການເຜີຍແຜ່ ແລະນຳໃຊ້ວິທະຍາສາດເຕັກໂນໂລຊີ, ເຮັດໃຫ້ຊາວກະສິກອນພຽງແຕ່ມີໂທລະສັບມືຖື ໜ່ວຍໜຶ່ງ, ເຖິງຈະຢູ່ບ່ອນໄກແສນໄກ, ກໍສາມາດກວດເບິ່ງສະພາບການເຕີບໃຫຍ່ຂອງສິ່ງປູກຝັງໄດ້, ທັງສາມາດຄວບຄຸມການຫົດນ້ຳ ໃສ່ປຸຍແລະອື່ນໆ, ເຮັດໃຫ້ທີ່ດິນກາຍເປັນ “ຖ້ວຍຄຳ”ທີ່ຮັບປະກັນຜົນເກັບກ່ຽວຂອງຊາວກະສິກອນໄດ້ຢ່າງແທ້ຈິງ.
ນອກຈາກນີ້ແລ້ວ, ວິທະຍາສາດເຕັກໂນໂລຊີຍັງເຮັດໃຫ້ “ຖ້ວຍເຂົ້າຂອງຈີນ” ເຕັມໄປດ້ວຍສະບຽງອາຫານທີ່ມີຄຸນນະພາບສູງ. ໃນຊຸມປີມໍ່ໆມານີ້, ແຫ່ງຕ່າງໆຂອງຈີນໄດ້ຖືເອົາການເພີ່ມການສະໜອງຜະລິດຕະພັນກະສິກຳປອດສານພິດ ແລະ ຄຸນນະພາບສູງໄວ້ຢູ່ຖານະພົ້ນເດັ່ນ, ສະບຽງອາຫານໃນ “ຖ້ວຍເຂົ້າຂອງຈີນ” ພວມບັນລຸການຫັນປ່ຽນຈາກ “ປະລິມານຫຼາຍ” ໄປສູ່ “ຄຸນນະພາບສູງ”.
“ການຫັນເປັນທັນສະໄໝດ້ານກະສິກຳ, ສິ່ງສຳຄັນຂຶ້ນຢູ່ກັບວິທະຍາສາດເຕັກໂນໂລຊີດ້ານກະສິກຳຫັນເປັນທັນສະໄໝ. ຕ້ອງເພີ່ມທະວີການເຊື່ອມໂຍງລະຫວ່າງກະສິກຳກັບວິທະຍາສາດເຕັກໂນໂລຊີ, ເພີ່ມທະວີການປະດິດສ້າງໃໝ່ດ້ານວິທະຍາສາດເຕັກໂນໂລຊີກະສິກຳ, ນັກຄົ້ນຄວ້າວິທະຍາສາດຕ້ອງຂຽນບົດນິພົນຕາມພື້ນທີ່, ເຮັດໃຫ້ຊາວກະສິກອນໃຊ້ເຕັກນິກທີ່ດີສຸດເພື່ອຜະລິດສະບຽງອາຫານທີ່ດີທີ່ສຸດ.” ນີ້ຄືຄວາມເຫັນຂອງທ່ານສີຈິ້ນຜິງໃນເວລາທີ່ໄປສຳຫຼວດກວດກາວຽກງານຢູ່ແຂວງຈີລິນ, ເປັນທິດທາງພື້ນຖານທີ່ຈີນພັດທະນາກະສິກຳແບບທັນສະໄໝ ແລະ ການຮັບປະກັນຄວາມໝັ້ນຄົງດ້ານສະບຽງອາຫານ, ທັງແມ່ນທິດທາງທີ່ເປັນຮູບປະທຳໃນການ “ຈັດຕັ້ງປະຕິບັດຍຸດທະສາດກ່ຽວກັບການຮັກສາສະບຽງອາຫານໄວ້ໂດຍອາໄສທີ່ດິນ ແລະ ເຕັກໂນໂລຊີ ຢ່າງແທ້ຈິງ”.
ຄຳເຫັນ
0