ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 3 ສິງຫານີ້ ທ່ານຢັນເສິງຊີ ໂຄສົກທັງເປັນຫົວໜ້າຫ້ອງການຄວບຄຸມລະບົບນຳທາງດ້ວຍດາວທຽມຈີນກ່າວວ່າ, ປັດຈຸບັນ, ຜະລິດຕະພັນທີ່ກ່ຽວພັນກັບລະບົບດາວທຽມເປີຍໂຕໄດ້ສົ່ງອອກໄປສູ່ 120 ກວ່າປະເທດແລະເຂດແຄວ້ນແລ້ວ, ໂທລະສັບມືຖືແບບສະມາດໂຟນສ່ວນຫຼາຍນຳໃຊ້ລະບົບເປີຍໂຕໄດ້.
ມື້ດຽວກັນ, ຫ້ອງການຖະແຫຼງຂ່າວຂອງລັດຖະບານຈີນໄດ້ໄຂກອງປະຊຸມຖະແຫຼງຂ່າວກ່ຽວກັບການເປີດນຳໃຊ້ລະບົບນຳທາງດ້ວຍດາວທຽມເປີຍໂຕເລກ 3 ໂດຍທ່ານຢັນເສິງຊີກ່າວໃນກອງປະຊຸມດັ່ງກ່າວວ່າ, ລະບົບເປີຍໂຕໄດ້ໃຫ້ບໍລິການຮອບດ້ານແກ່ຂະແໜງການຄົມມະນາຄົມຂົນສົ່ງ, ຄວາມປອດໄພສາທາລະນະ, ການກູ້ໄພແລະຫຼຸດຜ່ອນໄພ, ຂະແໜງການກະສິກຳ ປ່າໄມ້ແລະປະມົງ ,ຂະແໜງການຄຸ້ມຄອງບໍລິຫານຕົວເມືອງ, ແລະຍັງລົງເລິກເພື່ອນຳໃຊ້ເຂົ້າໃນການກໍ່ສ້າງພື້ນຖານໂຄງລ່າງສຳຄັນຕ່າງໆເຊັ່ນ: ພະລັງງານໄຟຟ້າ, ການທະນາຄານ ແລະໂທລະຄົມມະນາຄົມ.
ຕາມຂ່າວແຈ້ງໃຫ້ຮູ້ອີກວ່າ, ຕະຫຼອດໄລຍະ 10 ປີມານີ້ ຂະແໜງການນຳທາງແລະກຳນົດທີ່ຕັ້ງດ້ວຍດາວທຽມຂອງຈີນໄດ້ມີມູນຄ່າເພີ່ມຂຶ້ນ 20% ຕໍ່ປີ, ປີ 2019 ບັນລຸໄດ້ 345 ຕື້ຢວນ, ປີ 2020 ອາດຈະຫຼາຍກວ່າ 400 ຕື້ຢວນ.
ລະບົບດາວທຽມເປີຍໂຕໄດ້ກາຍເປັນໜຶ່ງໃນ 4 ລະບົບນຳທາງດ້ວຍດາວທຽມຂະຫນາດໃຫຍ່ຂອງໂລກທີ່ໄດ້ຮັບການຮັບຮອງຈາກອົງການສະຫະປະຊາຊາດ, ແລະຈະສືບຕໍ່ຮ່ວມມືກັບລະບົບນຳທາງດ້ວຍດາວທຽມຂອງອາເມລິກາ, ຣັດເຊຍແລະສະຫະພາບເອີລົບຢ່າງເລິກເຊິ່ງໃນດ້ານການຊົມໃຊ້ຂໍ້ມູນຮ່ວມກັນແລະດ້ານລະບົບປະຕິບັດງານ. ປະຈຸບັນ, ຜະລິດຕະພັນທີ່ກ່ຽວພັນກັບລະບົບເປີຍໂຕໄດ້ຮັບການນຳໃຊ້ຢູ່ອາຊຽນ, ອາຊີໃຕ້, ເອີລົບຕາເວັນອອກ, ອາຊີຕາເວັນຕົກແລະອາຝິຣກາຢ່າງສຳເລັດຜົນ.
ຄຳເຫັນ
0