ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 3 ກັນຍານີ້ແມ່ນວັນລະນຶກໄຊຊະນະຂອງສົງຄາມປະຊາຊົນຈີນຕໍ່ຕ້ານຟາຊິດຍີ່ປຸ່ນ ກໍ່ຄື ສົງຄາມຕ້ານຟາຊິດໂລກໄດ້ຮັບໄຊຊະນະຄົບຮອບ 75 ປີ. ຕອນເຊົ້າມື້ດຽວກັນ, ທ່ານສີຈິ້ນຜິງ ພ້ອມກັບຜູ້ນຳພັກແລະລັດທ່ານອື່ນໆໄດ້ເດີນທາງໄປເຖິງຫໍລະນຶກສົງຄາມປະຊາຊົນຈີນຕໍ່ຕ້ານຟາຊິດຍີ່ປຸ່ນທີ່ແຄມຂົວລູໂກ່ວ ທີ່ຕັ້ງຢູ່ຊານເມືອງເບື້ອງຕາເວັນຕົກຂອງນະຄອນຫຼວງປັກກິ່ງ, ໂດຍໄດ້ຮ່ວມກັບຜູ້ຕາງໜ້າວົງການຕ່າງໆຂອງນະຄອນຫຼວງປັກກິ່ງວາງກະຕ່າດອກໄມ້ ເພື່ອສະແດງຄວາມເຄົາລົບນັບຖືແລະຈາລຶກເຖິງຄຸນງາມຄວາມດີຂອງວິລະຊົນຜູ້ເສຍສະຫຼະຊີວິດໃນການຕໍ່ຕ້ານຟາຊິດຍີ່ປຸ່ນ.
ຢູ່ໃນຈຸດເວລາຂອງປະຫວັດສາດນີ້, ລັດຖະບານຈີນໄດ້ຈັດກິດຈະກຳລະນຶກເຖິງເຫດການດັ່ງກ່າວຢ່າງເຄັ່ງຂຶມ ເຊິ່ງໄດ້ສະແດງໃຫ້ເຫັນວ່າ: ຈີນມີຄວາມໝັ້ນໃຈແລະມີຄວາມເດັດດ່ຽວໜຽວແໜ້ນເພື່ອຈື່ຈຳເຫດການປະຫວັດສາດແລະປົກປັກຮັກສາສັນຕິພາບ. ແຕ່ການທີ່ຈື່ຈຳປະຫວັດສາດບໍ່ແມ່ນເພື່ອສືບຕໍ່ສ້າງຄວາມອາຄາດບາດໝາງກັນ ແຕ່ຫາກແມ່ນເປັນການເຕືອນສະຕິໃຫ້ກັບລຸ້ນຫຼັງ ເພື່ອຂຽນປະຫວັດສາດໜ້າໃໝ່ ແລະສືບທອດພາລະກິດສ້າງສັນຕິພາບໃຫ້ກັບທຸກເຊັ່ນຄົນ. ທ່ານສີຈິ້ນຜິງກ່າວວ່າ: “ຊົນຊາດທີ່ມີຄວາມຫວັງຂາດວິລະຊົນບໍ່ໄດ້, ປະເທດທີ່ມີອະນາຄົດຂາດຜູ້ນຳໜ້າພາທາງບໍ່ໄດ້.” ໃນຫຼາຍປີມານີ້, ຈີນໄດ້ກຳນົດວັນສຳຄັນຕ່າງໆໃຫ້ເປັນກົດໝາຍ ເຊັ່ນ: ວັນລະນຶກສົງຄາມປະຊາຊົນຈີນຕໍ່ຕ້ານຟາຊິດຍີ່ປຸ່ນ, ວັນລະນຶກເຖິງວິລະຊົນຂອງຊາດແລະວັນລະນຶກເຖິງຜູ້ປະສົບເຄາະຮ້າຍໃນການສັງຫານໂຫດໝູ່ນານກິ່ງ, ທັງໄດ້ຈັດກິດຈະກຳລະນຶກຂະໜາດໃຫຍ່ ເຊິ່ງໄດ້ສະແດງໃຫ້ເຫັນເຖິງຄວາມອາໄລອາວອນຕໍ່ຜູ້ທີ່ໄດ້ເສຍສະຫຼະຊີວິດ ແລະສະແດງຄວາມເຄົາລົບນັບຖືຕໍ່ວິລະຊົນຂອງປະເທດຊາດ, ທັງເປັນການປຸກລະດົມຂົນຂວາຍປະຊາຊົນທົ່ວປະເທດໃຫ້ຜ່ານຜ່າຟ້າຝົນລົມແດງດ້ວຍຄວາມສາມັກຄີເປັນຈິດໜຶ່ງໃຈດຽວກັນ ແລະເຕົ້າໂຮມກຳລັງແຮງອັນໃຫຍ່ຫຼວງເພື່ອພ້ອມກັນພັດທະນາປະເທດຊາດກ້າວເດີນໄປສູ່ຄວາມຈະເລີນຮຸ່ງເຮືອງ.
ສົງຄາມເໝືອນດັ່ງແວ່ນແຍງອັນໜຶ່ງ ທີ່ສາມາດເຮັດໃຫ້ທຸກຄົນຮັບຮູ້ເຖິງຄຸນຄ່າອັນປະເສີດຂອງສັນຕິພາບຢ່າງຈະແຈ້ງ. ກິດຈະກຳລະນຶກດັ່ງກ່າວກໍໄດ້ສະແດງໃຫ້ເຫັນເຖິງຄວາມໝັ້ນໃຈທີ່ເດັດດ່ຽວຂອງຈີນເພື່ອຮ່ວມກັບປະຊາຄົມໂລກຊຸກຍູ້ພາລະກິດອັນສູງສົ່ງແຫ່ງສັນຕິພາບແລະການພັດທະນາຂອງໂລກ.
ຄຳເຫັນ
0