ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 24 ກັນຍານີ້, ທ່ານຈ່າງຈຸ່ນ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ປະກອບຄຳເຫັນໃນກອງປະຊຸມສະພາຄວາມໝັ້ນຄົງອົງການສະຫະປະຊາຊາດທາງວີດີໂອກ່ຽວກັບການບໍລິຫານໂລກຫຼັງຈາກເກີດມີການແຜ່ລະບາດຂອງພະຍາດໂຄວິດ-19ໃນ, ໂດຍທ່ານໄດ້ຕອບໂຕ້ຢ່າງເຄັ່ງຂຶມຕໍ່ການຕຳໜິທີ່ມີເຈດຕະນາຮ້າຍຂອງຜູ້ຕາງໜ້າຖາວອນຂອງອາເມຣິກາປະຈຳອົງການສະຫະປະຊາຊາດທີ່ມີຕໍ່ສປຊ ແລະ ປະເທດຈີນ.
ທ່ານຈ່າງຈຸ່ນກ່າວວ່າ, ສະມາຊິກສະພາຄວາມໝັ້ນຄົງອົງການສະຫະປະຊາຊາດສ່ວນຫຼາຍໄດ້ຮຽກຮ້ອງໃຫ້ຍຶດໝັ້ນໃນລັດທິຫຼາຍຝ່າຍ, ເພີ່ມທະວີຄວາມສາມັກຄີແລະ ການຮ່ວມມືກັນ, ນີ້ໄດ້ສະແດງໃຫ້ເຫັນເຖິງຄວາມຮັບຮູ້ຮ່ວມກັນໂດຍທົ່ວໄປຂອງປະຊາຄົມໂລກ. ແຕ່ສິ່ງທີ່ໜ້າເສຍດາຍ ຄື ມີຜູ້ຕາງໜ້າອາເມຣິກາໄດ້ປະກອບຄຳເຫັນທີ່ບໍ່ສ້າງສັນເຊິ່ງຂັດກັບບັນຍາກາດຂອງກອງປະຊຸມອີກເທື່ອໜຶ່ງ. ຈີນເດັດດ່ຽວຄັດຄ້ານ ແລະບໍ່ຍອມຮັບຕໍ່ການຕຳໜິທີ່ໄຮ້ເຫດຜົນຂອງອາເມຣິກາ.
ທ່ານຈ່າງຈຸ່ນກ່າວວ່າ, ໃນໄລຍະມໍ່ໆມານີ້, ນັກການເມືອງຈຳນວນໜຶ່ງຂອງອາເມຣິກາຄືຊິມີອາການທາງຈິດທີ່ນິຍົມກ່າວໂຈມຕີປະເທດອື່ນ ແລະ ອົງການສະຫະປະຊາຊາດ, ການກະທຳແບບນີ້ ບໍ່ພຽງແຕ່ບໍ່ສາມາດກຳຈັດເຊື້ອພະຍາດໄດ້ເທົ່ານັ້ນ, ແຕ່ຍັງຈະກີດຂວາງຄວາມພະຍາຍາມຂອງທົ່ວໂລກທີ່ສາມັກຄີກັນຕ້ານກັບພະຍາດທີ່ຮ້າຍແຮງນີ້.
ທ່ານກ່າວຕື່ມວ່າ, ອາເມຣິກາຄວນຮັບຮູ້ວ່າ, ການປະລາໄຊຂອງອາເມຣິກາໃນການຮັບມືກັບພະຍາດໂຄວິດ-19ເປັນຍ້ອນຕົວເອງ. ນັບມາຮອດປະຈຸບັນ, ຢູ່ອາເມຣິກາໄດ້ມີເກືອບ 7 ລ້ານຄົນຖືກບົ່ງມະຕິເປັນພະຍາດໂຄວິດ-19, 2 ແສນກວ່າຄົນເສຍຊີວິດຈາກພະຍາດດັ່ງກ່າວ. ອາເມຣິກາມີເຕັກນິກການແພດທີ່ທັນສະໄໝທີ່ສຸດໃນໂລກ ແລະ ລະບົບການປິ່ນປົວທີ່ຄົບຖ້ວນທີ່ສຸດ, ແຕ່ເປັນຫຍັງໄດ້ກາຍເປັນປະເທດທີ່ມີຜູ້ເປັນພະຍາດ ແລະ ຜູ້ເສຍຊີວິດຈາກພະຍາດໂຄວິດ-19 ຫຼາຍທີ່ສຸດໃນໂລກ. ຕົວເລກສະຖິຕິທີ່ອາເມຣິກາເອງເຜີຍແຜ່ນັ້ນສະແດງໃຫ້ເຫັນວ່າ, ກຸ່ມຄົນເຊື້ອຊາດສ່ວນໜ້ອຍຢູ່ອາເມຣິກາມີອັດຕາຕິດພະຍາດ ແລະ ອັດຕາເສຍຊີວິດສູງກວ່າປົກກະຕິ, ເຊິ່ງບໍ່ສົມດຸນກັບອັດຕາປະຊາກອນ. ນັກການເມືອງບາງຄົນຄວນໃຫ້ຄຳຕອບຕາມຄວາມຈິງຕໍ່ກັບບັນຫາເຫຼົ່ານີ້ກ່ອນຈະໄປຕຳໜິຜູ້ອື່ນ. ຖ້າວ່າຕ້ອງມີຄົນຮັບຜິດຊອບຕໍ່ບັນຫາເຫຼົ່ານີ້, ກໍຕ້ອງແມ່ນນັກການເມືອງບາງຄົນຂອງອາເມຣິການັ້ນແຫຼະບໍ່ແມ່ນຜູ້ອື່ນດອກ.
ຄຳເຫັນ
0