ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 15 ຕຸລານີ້, ຜ່ານການສູ້ຊົນຢ່າງລຳບາກເປັນເວລາ 1500 ກວ່າມື້, ອຸມົງ ພູນານລຽນຂອງທາງລົດໄຟຈີນ-ລາວໄດ້ເຈາະຊອດຢ່າງສຳເລັດຜົນ, ນີ້ແມ່ນອຸມົງທີ່ມີລາງລົດໄຟເສັ້ນດຽວທີ່ຍາວທີ່ສຸດຕາມເສັ້ນທາງລົດໄຟຈີນ-ລາວໃນປະຈຸບັນ, ເຊິ່ງໄດ້ສ້າງເງື່ອນໄຂໃຫ້ແກ່ການຕິດຕັ້ງຄານຂົວ ແລະ ປູລາງລົດໄຟຕາມຫຼັງ. ມາຮອດປະຈຸບັນ, ອຸມົງ 93 ແຫ່ງຂອງທາງລົດໄຟຈີນ-ລາວຢູ່ໃນແດນຈີນໄດ້ເຈາະຊອດແລ້ວ 82 ແຫ່ງ, ເຊິ່ງໄດ້ສ້າງຄວາມຄືບໜ້າໃຫ້ກັບການກໍ່ສ້າງ ແລະ ເປີດບໍລິການໃນປີໜ້າ.
ປະຈຸບັນ, ການສ້າງພື້ນທາງຂອງທາງລົດໄຟຈີນ-ລາວຢູ່ຕອນປະເທດຈີນໄດ້ສຳເລັດໂດຍພື້ນຖານ, ໂຄງການສ້າງຂົວ ອຸມົງ ປູລາງ ແລະ ສະຖານີລົດໄຟພວມເລັ່ງລັດກໍ່ສ້າງຕາມແຜນການ, ຄາດວ່າພາຍໃນປີນີ້ຈະໃຫ້ສຳເລັດການກໍ່ສ້າງຂົວ ອຸມົງ ແລະສະຖານີລົດໄຟທັງໝົດ.
ທາງລົດໄຟຈີນ-ລາວຍາວທັງໝົດ 1000 ກວ່າກິໂລແມັດ, ຫຼັງຈາກສ້າງສຳເລັດ ແລະ ເປີດບໍລິການແລ້ວ, ຈາກນະຄອນຄຸນມິງ ໄປຮອດເມືອງຊຽງຮຸ່ງກິ່ງແຂວງປົກຄອງຕົນເອງເຜົ່າລື້ສິບສອງພັ່ນນາ ແຂວງຢຸນນານຈະໃຊ້ເວລາພຽງແຕ່ 3 ຊົ່ວໂມງເທົ່ານັ້ນ, ເມື່ອອອກເດີນທາງຈາກນະຄອນຄຸນມິງໃນຕອນຄ່ຳກໍສາມາດໄປຮອດນະຄອນຫຼວງວຽງຈັນໃນຕອນເຊົ້າຂອງມື້ຕໍ່ໄປ.
ຄຳເຫັນ
0