ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆນີ້ ກອງປະຊຸມສົນທະນາຄັ້ງທີ 4 ລະຫວ່າງຈີນ-ຄະນະກຳມະການແມ່ນ້ຳຂອງໄດ້ຈັດຂຶ້ນຜ່ານທາງວິດີໂອ. ໂດຍມີຜູ້ຕາງໜ້າຂອງປະເທດສະມາຊິກຄະນະກຳມະການແມ່ນ້ຳຂອງຄື: ສປປ ລາວ, ກຳປູເຈຍ, ໄທ, ສສ ຫວຽດນາມ ແລະປະເທດຄູ່ເຈລະຈາ ຄື: ສປ ຈີນ ແລະມຽນມາ ໄດ້ເຂົ້າຮ່ວມກອງປະຊຸມ. ກອງປະຊຸມຄັ້ງນີ້ໄດ້ທົບທວນຄືນແລະໃຫ້ຄຳຢືນຢັນຕໍ່ຄວາມຄືບໜ້າຂອງຈີນແລະຄະນະກຳມະການດັ່ງກ່າວໃນການດຳເນີນການສົນທະນາແລະການຮ່ວມມືນັບແຕ່ກອງປະຊຸມສົນທະນາຄັ້ງທີ່ຜ່ານມາ, ແລະໄດ້ຫາລືກ່ຽວກັບຈຸດສຸມແລະທິດທາງການຮ່ວມມືໃນທຸກຂົງເຂດໃນປີນີ້. ໃນກອງປະຊຸມຄັ້ງນີ້ ກະຊວງຊົນລະປະທານຈີນ ແລະຄະນະກຳມະການແມ່ນ້ຳຂອງໄດ້ເຊັນ “ ສັນຍາກ່ຽວກັບການແຈ້ງຂໍ້ມູນດ້ານອຸທະກະສາດຂອງແມ່ນ້ຳລ້ານຊ້າງໃນຕະຫຼອດປີ”.
ໃນກອງປະຊຸມດັ່ງກ່າວ, ທ່ານເຄີໂຢເສິ່ງ ຜູ້ຕາງໜ້າຖາວອນຈີນປະຈຳກຳມມາທິການເສດຖະກິດສັງຄົມອາຊີປາຊິຟິກອົງການສະຫະປະຊາຊາດໄດ້ປະກອບຄຳເຫັນໂດຍເນັ້ນໜັກວ່າ, ຈີນຖະໜຸຖະໜອມມິດຕະພາບອັນເປັນມູນເຊືອກັບບັນດາປະເທດຢູ່ລ້ອງແມ່ນ້ຳຂອງ, ຈະຍຶດຖືທັດສະນະການຕ່າງປະເທດທີ່ “ສະໜິດສະໜົມ, ຈິງໃຈ, ໃຫ້ປະໂຫຍດ ແລະກວມລວມ ” ລົງເລິກການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດກັບບັນດາປະເທດຢູ່ລ້ອງແມ່ນ້ຳຂອງຢ່າງບໍ່ຢຸດຢັ້ງ, ຮ່ວມກັນຊຸກຍູ້ການສ້າງ “ໜຶ່ງແລວໜຶ່ງເສັ້ນທາງ”ຮ່ວມກັນ, ຊ່ວຍປະເທດທີ່ກ່ຽວຂ້ອງຈັດຕັ້ງປະຕິບັດວາລະການພັດທະນາແບບຍືນຍົງປີ 2030 ຂອງອົງການສະຫະປະຊາຊາດ, ເພີ່ມທະວີຄວາມສາມາດໃນການພັດທະນາດ້ວຍຕົນເອງ.
ປັດຈຸບັນ ສະພາບພະຍາດໂຄວິດ-19 ພວມແຜ່ລະບາດຢູ່ໃນທົ່ວໂລກ, ລັດທິຝ່າຍດຽວ ແລະ ລັດທິປົກປ້ອງມີການຟື້ນຕົວຄືນມາ, ເສດຖະກິດໂລກປະສົບກັບແຮງກົດດັນຈາກການຊຸດໂຊມລົງ, ສິ່ງທ້າທາຍດ້ານສິ່ງແວດລ້ອມຈາກການປ່ຽນແປງຂອງດິນຟ້າອາກາດແລະຄວາມສ່ຽງໃນການເກີດໄພທຳມະຊາດໄດ້ສູງຂຶ້ນຢ່າງຕໍ່ເນື່ອງ. ທ່ານເຄີໂຢເສິ່ງກ່າວວ່າ, ໂດຍຜະເຊີນກັບຄວາມຫຍຸ້ງຍາກແລະສິ່ງທ້າທາຍ, ປະເທດຢູ່ອະນຸພາກພື້ນແມ່ນ້ຳຂອງຄວນສາມັກຄີຊ່ວຍເຫຼືອເຊິ່ງກັນແລະກັນ, ຮ່ວມແຮງຮ່ວມໃຈກັນຕ້ານພະຍາດ, ພະຍາຍາມຟື້ນຟູເສດຖະກິດຄືນໃໝ່.
ທ່ານເຄີ່ໂຢເສິ່ງຊີ້ໃຫ້ເຫັນວ່າ, ບັນດາປະເທດຢູ່ອະນຸພາກພື້ນແມ່ນ້ຳຂອງມີພູຜາສຍານ້ຳຕິດຈອດກັນ, ມີຜົນປະໂຫຍດທີ່ເຊື່ອມໂຍງເຂົ້າກັນ, ແລະມີໂຊກຊາຕາຕິດພັນກັນ, ສະນັ້ນ ຄວນເປັນຈິດໜຶ່ງໃຈດຽວກັນ, ໃຊ້ການເຄື່ອນໄຫວຕົວຈິງ, ເສີມຂະຫຍາຍບົດບາດຂອງຄະນະກຳມະການແມ່ນ້ຳຂອງ, ກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງແລະເວທີອື່ນໆຢ່າງເຕັມສ່ວນ, ອອກແຮງຊຸກຍູ້ໃຫ້ການຮ່ວມມືໃນອະນຸພາກພື້ນປກົດມີສະພາບການໃໝ່. ຕ້ອງຍຶດໝັ້ນການຮ່ວມມືຫຼາຍຝ່າຍ, ຍຶດໝັ້ນຫຼັກການປຶກສາຮ່ວມກັນ, ສ້າງສາຮ່ວມກັນແລະຊົມໃຊ້ຮ່ວມກັນ; ຍຶດໝັ້ນແກ້ໄຂຄວາມຂັດແຍ້ງກັນຢ່າງເໝາະສົມໂດຍຜ່ານການສົນທະນາແລະເຈລະຈາກັນ, ສ້າງປະຊາຄົມຮ່ວມຊາຕາກຳຂອງບັນດາປະເທດແມ່ນ້ຳລ້ານຊ້າງແມ່ນ້ຳຂອງທີ່ມຸ້ງໝັ້ນໄປສູ່ສັນຕິພາບແລະຄວາມຈະເລີນຮຸ່ງເຮືອງ; ຕ້ອງຍຶດໝັ້ນໃຫ້ປະເທດໃນພາກພື້ນເປັນຜູ້ນຳພາ, ຮັບປະກັນປະເທດຕ່າງໆໃນພາກພື້ນມີຖານະໃຈກາງໃນການຮ່ວມມືໃນອະນຸພາກພື້ນ, ຕ້ອງປະຕິເສດການປັ້ນແຕ່ງບັນຫາກ່ຽວກັບຊັບພະຍາກອນນ້ຳຂອງແມ່ນ້ຳຂອງ, ແລະການກະທຳທີ່ທຳລາຍຄວາມສາມັກຄີແລະການຮ່ວມມືລະຫວ່າງອະນຸພາກພື້ນຢ່າງເດັດດ່ຽວ.
ຄຳເຫັນ
0