ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 29 ຕຸລານີ້, ກອງປະຊຸມຄົບຄະນະຄັ້ງທີ 5 ຂອງຄະນະກຳມະການສູນກາງພັກກອມມູນິດຈີນສະໄໝທີ 19 ໄດ້ອັດລົງຢູ່ນະຄອນຫຼວງປັກກິ່ງ. ກອງປະຊຸມຄັ້ງນີ້ໄດ້ກຳນົດແຜນພັດທະນາເສດຖະກິດສັງຄົມແຫ່ງຊາດຈີນ 5 ປີຄັ້ງທີ 14 ໂດຍຊີ້ອອກວ່າ: ຈີນຈະສ້າງສະພາບການໃໝ່ແຫ່ງການພັດທະນາດ້ວຍຄຸນນະພາບສູງ, ໃນນັ້ນໄດ້ເນັ້ນໜັກວ່າຈີນຈະສືບຕໍ່ຍຶດໝັ້ນການລົງເລິກການປະຕິຮູບຢ່າງຮອບດ້ານ ແລະຍົກສູງລະດັບການເປີດປະຕູສູ່ພາຍນອກຢ່າງຮອບດ້ານ. ກອງປະຊຸມໄດ້ວາງວິໄສທັດຄື: ເມື່ອຮອດປີ 2035, ຈີນຈະສ້າງປະເທດໃຫ້ເປັນສັງຄົມນິຍົມທີ່ທັນສະໄໝໂດຍພື້ນຖານ.
ກອງປະຊຸມໄດ້ກຳນົດເປົ້າໝາຍຕົ້ນຕໍຂອງການພັດທະນາເສດຖະກິດສັງຄົມຂອງປະເທດຈີນໃນໄລຍະແຜນການ5ປີຄັ້ງທີ 14 ເຊິ່ງປະກອບມີເປົ້າໝາຍຕ່າງໆເຊັ່ນ: ຕ້ອງບັນລຸໃຫ້ເສດຖະກິດພັດທະນາຢ່າງປອດໃສແລະຕໍ່ເນື່ອງບົນພື້ນຖານທີ່ມີຄຸນນະພາບແລະປະສິດທິຜົນສູງຂຶ້ນຢ່າງພົ້ນເດັ່ນ, ການກໍ່ສ້າງລະບົບເສດຖະກິດທັນສະໄໝໄດ້ຮັບຄວາມຄືບໜ້າສຳຄັນ, ການສ້າງລະບົບຕະຫຼາດມາດຕະຖານສູງຕ້ອງໃຫ້ສຳເລັດໂດຍພື້ນຖານ, ໂຄງປະກອບເສດຖະກິດໃໝ່ແບບເປີດກວ້າງໃນລະດັບສູງກວ່າເກົ່າຕ້ອງໃຫ້ປາກົດເປັນຮູບເປັນຮ່າງຂຶ້ນໂດຍພື້ນຖານ, ການສ້າງສາຄວາມສີວິໄລດ້ານນິເວດຕ້ອງບັນລຸຄວາມກ້າວໜ້າໃໝ່, ຄວາມຜາສຸກດ້ານຊີວິດການເປັນຢູ່ຂອງປະຊາຊົນຕ້ອງຍົກສູງຂຶ້ນສູ່ລະດັບໃໝ່ແລະອື່ນໆ.
ຖະແຫຼການຂອງກອງປະຊຸມໄດ້ລະບຸວ່າ: ຈີນຈະສ້າງໂຄງປະກອບເສດຖະກິດໃໝ່ແບບເປີດກວ້າງທີ່ມີລະດັບສູງກວ່າເກົ່າ, ຍົກສູງລະດັບການເປີດປະຕູສູ່ພາຍນອກຢ່າງຮອບດ້ານ, ຊຸກຍູ້ໃຫ້ການຄ້າແລະການລົງທຶນເປັນເສລີແລະສະດວກກວ່າເກົ່າ, ຊຸກຍູ້ການພັດທະນາແລະການປະດິດສ້າງໃໝ່ດ້ານການຄ້າ, ຊຸກຍູ້ໃຫ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ມີຄຸນນະພາບສູງ, ຕັ້ງໜ້າເຂົ້າຮ່ວມການປະຕິຮູບລະບົບການບໍລິຫານເສດຖະກິດໂລກ.
ຈີນຕ້ອງປະສານສົມທົບການພັດທະນາ ກັບ ຄວາມໝັ້ນຄົງ, ຈັດເອົາຄວາມໝັ້ນຄົງໃຫ້ເປັນເອກະພາບກັນ ແລະ ການພັດທະນາເຊື່ອມໂຍງເຂົ້າໃນທຸກຂົງເຂດ ແລະ ທົ່ວຂະບວນການຂອງການພັດທະນາແຫ່ງຊາດ.
ກອງປະຊຸມໄດ້ກຳນົດວ່າ, ຈີນຈະຖືເອົາການສ້າງຄວາມເຂັ້ມແຂງດ້ວຍຕົນເອງໃນດ້ານວິທະຍາສາດເຕັກນິກເປັນສິ່ງຄ້ຳຊູທາງຍຸດທະສາດໃຫ້ກັບການພັດທະນາປະເທດຊາດ, ເລັ່ງລັດສ້າງປະເທດໃຫ້ເຂັ້ມແຂງດ້ານວິທະຍາສາດເຕັກນິກ.
ກອງປະຊຸມຍັງໄດ້ລະບຸເຖິງການບັນລຸເປົ້າໝາຍໄລຍະຍາວທີ່ສ້າງປະເທດໃຫ້ເປັນປະເທດສັງຄົມນິຍົມທັນສະໄໝໂດຍພື້ນຖານເມື່ອຮອດປີ 2035, ເມື່ອຮອດໄລຍະນັ້ນ, ກຳລັງຕົວຈິງດ້ານເສດຖະກິດ, ວິທະຍາສາດເຕັກນິກ ແລະກຳລັງແຮງສັງລວມຂອງຊາດກໍຈະເພີ່ມຂຶ້ນຢ່າງຫຼວງຫຼາຍ, ຍອດປະລິມານເສດຖະກິດແລະລາຍຮັບສະເລ່ຍຕໍ່ຫົວຄົນຂອງປະຊາຊົນຢູ່ໃນຕົວເມືອງແລະຊົນນະບົດ ຈະຖືກຍົກສູງຂຶ້ນສູ່ລະດັບໃໝ່ຕື່ມອີກ ທັງຈະຢືນຢູ່ແຖວໜ້າຂອງປະເທດທີ່ມີການປະດິດສ້າງໃໝ່; ມີລະບົບເສດຖະກິດທັນສະໄໝ; ທ່າແຮງໃໝ່ໃນການຮ່ວມມື ແລະການແຂ່ງຂັນດ້ານເສດຖະກິດສາກົນກໍຈະຖືກຍົກສູງຂຶ້ນຢ່າງຫຼວງຫຼາຍ; ລວມຍອດຜະລິດຕະພັນພາຍໃນຫຼື GDP ຕໍ່ຫົວຄົນກໍຈະບັນລຸລະດັບປານກາງຂອງປະເທດທີ່ພັດທະນາແລ້ວ.
ລັດຖະບານຈີນຈະອີງຕາມ “ຂໍ້ສະເໜີ” ສະບັບນີ້, “ຮ່າງແຜນພັດທະນາເສດຖະກິດສັງຄົມ 5 ປີຄັ້ງທີ 14” ຫຼັງຈາກໄດ້ຮັບການຮັບຮອງໃນກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນ ເຊິ່ງເປັນອົງການອຳນາດສູງສຸດຂອງຈີນໃນປີ 2021 ແລ້ວ, ແຜນການສະບັບນີ້ຈະເປັນເອກະສານໂຄງການທີ່ມີຜົນສັກສິດທີ່ສຸດໃນການນຳພາການພັດທະນາຂອງຈີນໃນ 5 ປີຕໍ່ໜ້າ.
ຄຳເຫັນ
0