ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນບ່າຍວັນທີ 13 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ກ່າວຄຳປາໄສຜ່ານທາງວິດີໂອໃນກອງປະຊຸມສຸດຍອດທຸລະກິດແລະການລົງທຶນອາຊຽນວ່າ: ສະພາບການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນ ໄດ້ເປັນໄພຂົ່ມຂູ່ຢ່າງໜັກໜ່ວງຕໍ່ຄວາມປອດໄພດ້ານຊີວິດ ແລະ ສຸຂະພາບຮ່າງກາຍຂອງປະຊາຊົນປະເທດຕ່າງໆ, ເສດຖະກິດໂລກພວມຜະເຊີນກັບຄວາມຊຸດໂຊມ ທີ່ໜັກໜ່ວງທີ່ສຸດ ນັບແຕ່ສົງຄາມໂລກຄັ້ງທີ 2 ເປັນຕົ້ນມາ. ອາຊຽນແລະຈີນມີທີ່ຕັ້ງພູມສາດໃກ້ຄຽງກັນ ແລະ ຕ່າງກໍເປັນຄູ່ຮ່ວມມືສຳຄັນຂອງກັນແລະກັນ, ນັບແຕ່ເດືອນມັງກອນຫາເດືອນຕຸລາປີນີ້, ຍອດມູນຄ່າການຄ້າແລະການລົງທຶນລະຫວ່າງສອງຝ່າຍໄດ້ເພີ່ມຂຶ້ນທ່າມກາງເສດຖະກິດໂລກມີສະພາບຊຸດໂຊມລົງ, ຍອດມູນຄ່າການຄ້າລະຫວ່າງສອງຝ່າຍໄດ້ເພີ່ມຂຶ້ນ 5% ເມື່ອທຽບໃສ່ໄລຍະດຽວກັນຂອງປີຜ່ານມາ, ການລົງທຶນຂອງຈີນຢູ່ບັນດາປະເທດອາຊຽນໄດ້ເພີ່ມຂຶ້ນ 76,6% ເມື່ອທຽບໃສ່ໄລຍະດຽວກັນຂອງປີຜ່ານມາ. ອາຊຽນກາຍເປັນຄູ່ການຄ້າໃຫຍ່ອັນດັບໜຶ່ງຂອງຈີນ, ການພົວພັນທາງດ້ານເສດຖະກິດ ແລະ ອຸດສາຫະກຳລະຫວ່າງສອງຝ່າຍມີຄວາມແໜ້ນແຟ້ນກວ່າເກົ່າ. ຈີນຍິນດີຍຶດຖືທັດສະນະປະຊາຄົມຮ່ວມຊາຕາກຳ, ສືບຕໍ່ຊຸກຍູ້ການຮ່ວມມືກັບບັນດາປະເທດອາຊຽນ, ປົກປ້ອງລັດທິຫຼາຍຝ່າຍ ແລະ ການຄ້າເສລີ, ປົກປັກຮັກສາສັນຕິພາບ ແລະ ການພັດທະນາຂອງໂລກ.
ຈີນໄດ້ຍຶດໝັ້ນໃນການຊຸກຍູ້ການຄ້າເສລີພາຍໃຕ້ຂອບອົງການການຄ້າໂລກ ແລະ ຊຸກຍູ້ຂະບວນການເຊື່ອມໂຍງທາງດ້ານເສດຖະກິດຂອງພາກພື້ນມາໂດຍຕະຫຼອດ. ນັບແຕ່ໄດ້ສ້າງຕັ້ງເຂດການຄ້າເສລີຈີນ-ອາຊຽນເປັນເວລາ 10 ປີມານີ້, ເຂດການຄ້າເສລີມີເນື້ອໃນນັບມື້ນັບອຸດົມສົມບູນຂຶ້ນ ແລະ ມີລະດັບສູງຂຶ້ນເລື້ອຍໆ ເຊິ່ງໄດ້ສົ່ງສັນຍານຢ່າງຕັ້ງໜ້າ ແລະ ຈະແຈ້ງໃຫ້ແກ່ຂະບວນການເຄື່ອນໄຫວທາງດ້ານເສດຖະກິດຂອງພາກພື້ນທີ່ເຊື່ອມໂຍງເຂົ້າກັນ ແລະ ເສດຖະກິດໂລກາພິວັດ. ຈີນຍິນດີເພີ່ມທະວີການເຊື່ອມຕໍ່ຍຸດທະສາດການພັດທະນາ ແລະ ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ບົນພື້ນຖານຕ່າງຝ່າຍຕ່າງມີຜົນປະໂຫຍດ.
ໃນຫຼາຍປີມານີ້, ອາຊີຕາເວັນອອກໄດ້ເສີມຂະຫຍາຍບົດບາດນຳພາໃນການພັດທະນາເສດຖະກິດໂລກ. ສະນັ້ນ, ບັນດາປະເທດໃນພາກພື້ນຄວນຮ່ວມແຮງຮ່ວມໃຈກັນ, ຈັບມືກັນກ້າວເດີນໄປໜ້າ, ຊຸກຍູ້ການຟື້ນຟູທາງດ້ານເສດຖະກິນຂອງພາກພື້ນ, ກ້າວໄປສູ່ຄວາມຈະເລີນຮຸ່ງເຮືອງ ເຊິ່ງຈະເປັນການເພີ່ມພະລັງຊຸກດັນທີ່ເຂັ້ມແຂງເຮັດໃຫ້ເສດຖະກິດໂລກສາມາດຟື້ນຄືນໄດ້. ໃນຂະບວນການດັ່ງກ່າວ, ພວກເຮົາບໍ່ພຽງແຕ່ຈະຕ້ອງດຳເນີນການຮ່ວມມືທາງດ້ານເຕັກນິກທີ່ທັນສະໄໝ ແລະ ການຮ່ວມມືລະຫວ່າງວິສາຫະກິດໃຫຍ່ຕ່າງໆເທົ່ານັ້ນ, ຫາກຍັງຕ້ອງຊອກຫາຈຸດພົ້ນເດັ່ນໃນການຮ່ວມມືລະຫວ່າງວິສາຫະກິດຂະໜາດນ້ອຍ ແລະ ຂະໜາດຍ່ອມ ໃນຂົງເຂດປະດິດສ້າງໃໝ່ອີກດ້ວຍ.
ນັກວິເຄາະເຫັນວ່າ: ປີໜ້າແມ່ນປີລະນຶກຈີນແລະອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 30 ປີ. ເຊື່ອວ່າ: ໂດຍຜ່ານການພັດທະນາມາເປັນເວລາ 30 ປີ, ການພົວພັນຈີນ-ອາຊຽນຈະມີຄວາມສົມບູນກວ່າເກົ່າ, ຍ່ອມຈະຂະຫຍາຍໄປສູ່ທິດທາງທີ່ຕ່າງຝ່າຍຕ່າງມີຜົນປະໂຫຍດໄດ້ດີກວ່າເກົ່າ, ຈະເປີດກວ້າງສະພາບການຮ່ວມມືດ້ານທຸລະກິດແລະການລົງທຶນຢ່າງບໍ່ຢຸດຢັ້ງ, ຈະສ້າງຄວາມສຸກໃຫ້ແກ່ປະຊາຊົນຈີນແລະປະຊາຊົນບັນດາປະເທດອາຊຽນຕື່ມອີກ, ທັງຈະມີຜົນດີຕໍ່ການປົກປັກຮັກສາສັນຕິພາບ, ສະຖຽນລະພາບ ແລະ ຄວາມຈະເລີນຮຸຸ່ງເຮືອງຂອງພາກພື້ນ ກໍຄືຂອງໂລກ.
ຄຳເຫັນ
0