ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ພະຈິກນີ້, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ສົ່ງສານຊົມເຊີຍເຖິງທ່ານນາງ ອອງຊານ ຊູຈີ ປະທານພັກສັນນິບາດແຫ່ງຊາດເພື່ອປະຊາທິປະໄຕມຽນມາຫຼື NLD ເພື່ອສະແດງຄວາມຊົມເຊີຍຕໍ່ພັກ NLD ພາຍໃຕ້ການນຳພາຂອງນາງໃນການເລືອກຕັ້ງແລະເປັນພັກຈັດຕັ້ງລັດຖະບານທີ່ຈັດຂຶ້ນໃນຫວ່າງມໍ່ໆມານີ້.
ໃນສານຊົມເຊີຍ ທ່ານ ສີຈິ້ນຜິງ ກ່າວວ່າ: ປີນີ້ແມ່ນປີສະເຫຼີມສະຫຼອງການສ້າງຕັ້ງສາຍພົວພັນການທູດລະຫວ່າງສອງປະເທດຄົບຮອບ 70 ປີ. ໃນຕົ້ນປີນີ້, ຂ້າພະເຈົ້າໄດ້ເດີນທາງໄປຢ້ຽມຢາມມຽນມາທາງລັດຖະກິດຢ່າງສຳເລັດຜົນ, ຂ້າພະເຈົ້າໄດ້ເຫັນດີເປັນເອກະພາບກັນກັບທ່ານໃນການສ້າງປະຊາຄົມຮ່ວມຊາຕາກຳຈີນ-ມຽນມາ,ເປັນການເປີດຍຸກໃໝ່ແຫ່ງການພົວພັນລະຫວ່າງສອງປະເທດ. ຫຼັງຈາກເກີດມີສະພາບການແຜ່ລະບາດຂອງພະຍາດໂຄວິດ-19 ແລ້ວ, ສອງພັກກໍຄືສອງປະເທດໄດ້ສະໜັບສະໜູນກັນ,ຊ່ວຍເຫຼືອເຊິ່ງກັນແລະກັນ,ໄດ້ສະແດງໃຫ້ເຫັນເຖິງຈິດໃຈປະຊາຄົມຮ່ວມຊາຕາກຳທີ່ຮ່ວມທຸກຮ່ວມສຸກດ້ວຍການກະທຳຕົວຈິງ.
ທ່ານ ສີຈິ້ນຜິງ ກ່າວເນັ້ນວ່າ: ຈີນໄດ້ໃຫ້ຄວາມສຳຄັນໃນລະດັບສູງຕໍ່ການຂະຫຍາຍການພົວພັນລະຫວ່າງພັກ-ລັດຂອງສອງປະເທດ. ຂ້າພະເຈົ້າຍິນດີຮ່ວມກັບປະທານອອງຊານ ຊູຈີ ສຸມຄວາມພະຍາຍາມຮ່ວມກັນ,ເພື່ອຊຸກຍູ້ໃຫ້ການສ້າງປະຊາຄົມຮ່ວມຊາຕາກຳລະຫວ່າງສອງປະເທດແຕກດອກອອກຜົນທີ່ອຸດົມສົມບູນ,ສ້າງຄວາມຜາສຸກໃຫ້ແກ່ສອງປະເທດກໍຄືປະຊາຊົນສອງຊາດໃຫ້ໄດ້ດີກວ່າເກົ່າ.
ຄຳເຫັນ
0