ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ອົງການການຄ້າໂລກຫຼື WTOໄດ້ຈັດກອງປະຊຸມສົນທະນາລະດັບສູງທາງອ໋ອນລາຍໃນວັນທີ 19 ພະຈິກນີ້ ເພື່ອລະນຶກອົງການ WTO ໄດ້ສ້າງຕັ້ງຂຶ້ນຄົບຮອບ 25 ປີ. ໃນໂອກາດດັ່ງກ່າວ, ຜູ້ຕາງໜ້າຂອງອົງການຈັດຕັ້ງສາກົນ, ລັດຖະບານແລະວິສາຫະກິດຫຼາຍແຫ່ງໄດ້ເນັ້ນໜັກວ່າ ລະບົບການຄ້າສາກົນທີ່ຖືກົດລະບຽບເປັນພື້ນຖານນັ້ນຍັງຄົງມີຄວາມໝາຍທີ່ຕິດແທດຕົວຈິງໃນທຸກມື້ນີ້, ແຕ່ອົງການການຄ້າໂລກກໍຕ້ອງປັບປຸງກົດລະບຽບເພື່ອໃຫ້ສອດຄ່ອງກັບການປ່ຽນແປງຂອງສະພາບແວດລ້ອມການຄ້າ.
ທ່ານຫວາງໂຊ້ເວີນ ຮອງລັດຖະມົນຕີກະຊວງການຄ້າຈີນຢືນຢັນວ່າ: ອົງການການຄ້າໂລກໄດ້ປະກອບສ່ວນທາງປະຫວັດສາດເພື່ອຍົກສູງລະດັບຊີວິດການເປັນຢູ່ຂອງປະຊາຊົນແລະເຮັດໃຫ້ຫຼາຍຮ້ອຍລ້ານຄົນໄດ້ຫຼຸດພົ້ນອອກຈາກຄວາມທຸກຍາກ. ເຖິງຈະໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ກໍຕາມ, ບັນດາປະເທດສະມາຊິກກໍໄດ້ເຄົາລົບປະຕິບັດຕາມຫຼັກການອົງການການຄ້າໂລກໂດຍພື້ນຖານ, ໄດ້ໃຊ້ມາດຕະການເພື່ອຊຸກຍູ້ການຄ້າໃຫ້ຫຼາຍກວ່າເກົ່າແຕ່ບໍ່ແມ່ນຂັດຂວາງການຄ້າ. ປະເທດສະມາຊິກທັງຫຼາຍໄດ້ເຂົ້າຮ່ວມການປຶກສາຫາລືບັນຫາກ່ຽວກັບກົດລະບຽບສາກົນໃນຂົງເຂດການສ້າງຄວາມສະດວກໃຫ້ແກ່ການລົງທຶນ, ການຄ້າເອເລັກໂຕຣນິກແລະອື່ນໆ ເຊິ່ງສະແດງໃຫ້ເຫັນວ່າ ອົງການການຄ້າໂລກຍັງຈະສາມາດສ້າງຜົນງານໄດ້.
ທ່ານເດວິດ ວອນເຄີ ປະທານສະພາມົນຕີອົງການການຄ້າໂລກກ່າວວ່າ: ໂລກໃນປັດຈຸບັນແມ່ນຕ່າງກັນກັບເມື່ອ 25 ປີກ່ອນຢ່າງຫຼວງຫຼາຍ, ອົງການການຄ້າໂລກຕ້ອງການປັບປຸງກົດລະບຽບເພື່ອໃຫ້ສອດຄ່ອງກັບສະພາບແວດລ້ອມການຄ້າທີ່ມີການປ່ຽນແປງຢ່າງບໍ່ຢຸດຢັ້ງ.
ຄຳເຫັນ
0