ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 21 ມັງກອນນີ້,ສະຫາຍສີຈິ້ນຜິງ ເລຂາທິການໃຫຍ່ຄະນະ ກຳມະການສູນກາງພັກກອມມູນິດຈີນ,ປະທານປະເທດຈີນ ໄດ້ສົນທະນາ ກັບສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນ ກາງພັກ ປະຊາຊົນ ປະຕິວັດລາວທາງໂທລະສັບ.
ສະຫາຍສີຈິ້ນຜິງໄດ້ຕາງໜ້າພັກ ລັດຖະບານ ແລະ ປະຊາຊົນຈີນສະແດງຄວາມຊົມເຊີຍຕໍ່ສະຫາຍທອງລຸນ ສີສຸລິດທີ່ໄດ້ຮັບເລືອກຕັ້ງເປັນເລຂາທິການ ໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ. ສະຫາຍສີຈິ້ນຜິງກ່າວວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວໄດ້ໄຂຂຶ້ນຢ່າງມີໄຊ, ກອງປະຊຸມໄດ້ສະເໜີແນວຄິດໃໝ່ ແລະ ມາດຕະການໃໝ່ຕ່າງໆໃນການຄຸ້ມຄອງພັກ ແລະ ການບໍລິຫານປະເທດ, ນີ້ມີຄວາມໝາຍສຳຄັນຢ່າງຍິ່ງຕໍ່ການຊຸກຍູ້ພາລະກິດສັງຄົມນິຍົມຂອງລາວໃຫ້ພັດທະນາກ້າວໄປໜ້າຢ່າງບໍ່ຢຸດຢັ້ງ. ເຊື່ອໝັ້ນວ່າພາຍໃຕ້ການນຳພາຂອງຄະນະບໍລິຫານງານສູນກາງພັກປະຊາຊົນປະຕິວັດລາວຊຸດໃໝ່ທີ່ມີສະຫາຍທອງລຸນ ສີສຸລິດເປັນແກນນຳ, ທົ່ວພັກ ແລະ ປະຊາຊົນທົ່ວປະເທດລາວຈະສາມັກຄີເປັນຈິດໜຶ່ງໃຈດຽວກັນ, ພະຍາຍາມສູ້ຊົນເຮັດສຳເລັດໜ້າທີ່ ແລະເປົ້າໝາຍທີ່ໄດ້ກຳນົດໄວ້ໃນກອງປະຊຸມໃຫຍ່ຄັ້ງທີ 11 ຂອງພັກປະຊາຊົນປະຕິວັດລາວ.
ສະຫາຍສີຈິ້ນຜິງຊີ້ອອກວ່າ, ຈີນ ແລະ ລາວແມ່ນປະເທດບ້ານໃກ້ເຮືອນຄຽງທີ່ດີຕໍ່ກັນ ແລະ ມີພູຜາແມ່ນ້ຳຕິດຈອດກັນ, ການຍຶດໝັ້ນການນຳພາຂອງພັກ, ຍຶດໝັ້ນທິດທາງສັງຄົມນິຍົມ, ແມ່ນຈຸດພິເສດ ແລະ ທາດແທ້ຂອງສາຍພົວພັນຈີນ-ລາວ. ປະຈຸບັນ, ສາຍພົວພັນຈີນ-ລາວພວມຢູ່ໃນໄລຍະທີ່ດີທີ່ສຸດໃນປະຫວັດສາດ, ເມື່ອຜະເຊີນໜ້າກັບການປ່ຽນແປງອັນໃຫຍ່ຫຼວງຂອງໂລກໃນຮອບຮ້ອຍປີຜ່ານມາ ແລະ ຜົນກະທົບຈາກການແຜ່ລະບາດຂອງພະຍາດໂຄວິດ-19, ຈີນຍິນດີຮ່ວມກັບລາວ, ເພີ່ມທະວີການໄປມາຫາສູ່ກັນລະຫວ່າງການນຳຂັ້ນສູງຕື່ມອີກ, ເພີ່ມທະວີການແລກປ່ຽນທາງຍຸດທະສາດ, ລົງເລິກການແລກປ່ຽນບົດຮຽນດ້ານການຄຸ້ມຄອງພັກ ແລະ ການບໍລິຫານປະເທດ. ສອງຝ່າຍຄວນຊຸກຍູ້ການສ້າງສາໂຄງການສຳຄັນຂະໜາດໃຫຍ່ຕ່າງໆ, ເຊັ່ນ: ແລວເສດຖະກິດຈີນ-ລາວ, ທາງລົດໄຟຈີນ-ລາວ ແລະອື່ນໆ, ຊຸກຍູ້ໃຫ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ຂອງຈີນ ແລະລາວໄດ້ຮັບໝາກຜົນຫຼາຍກວ່າເກົ່າ. ພ້ອມກັນນັ້ນ, ສອງຝ່າຍຄວນລົງເລິກການແລກປ່ຽນ ແລະ ການຮ່ວມມືໃນຂົງເຂດວັດທະນະທຳ, ວຽກງານຊາວໜຸ່ມ, ການທ່ອງທ່ຽວ ແລະ ອື່ນໆ, ພ້ອມກັນເພີ່ມເນື້ອໃນດ້ານວັດທະນະທຳຂອງຄູ່ຮ່ວມຊາຕາກຳຈີນ-ລາວໃຫ້ອຸດົມສົມບູນຂຶ້ນຢ່າງບໍ່ຢຸດຢັ້ງ. ຈີນຈະສືບຕໍ່ສະໜັບສະໜູນຄວາມພະຍາຍາມຂອງລາວໃນການຕ້ານກັບພະຍາດໂຄວິດ-19, ຈີນຍິນດີພິຈາລະນາການຊ່ວຍເຫຼືອວັກຊີນຕ້ານເຊື້ອພະຍາດໂຄວິດ-19 ຊຸດໜຶ່ງໃຫ້ແກ່ລາວ. ຈີນຍິນດີເພີ່ມທະວີການປະສານງານ ແລະ ປະສານສົມທົບກັບລາວໃນວຽກງານສາກົນ ກໍຄືພາກພື້ນ, ຊຸກຍູ້ການພັດທະນາ ແລະ ຄວາມຈະເລີນຮຸ່ງເຮືອງຮ່ວມກັນ. ສະຫາຍສີຈິ້ນຜິງຍັງໄດ້ອວຍພອນໃຫ້ສະຫາຍທອງລຸນ ສີສຸລິດຈົ່ງປະສົບຜົນສຳເລັດໃໝ່ໃຫຍ່ຫຼວງກວ່າເກົ່າໃນໜ້າທີ່ຕຳແໜ່ງໃໝ່ທີ່ສຳຄັນນີ້.
ສະຫາຍທອງລຸນ ສີສຸລິດກ່າວວ່າ: ຂ້າພະເຈົ້າຂໍສະແດງຄວາມຂອບໃຈຕໍ່ສະຫາຍເລຂາທິການໃຫຍ່ສີຈິ້ນຜິງທີ່ໄດ້ສົນທະນາທາງໂທລະສັບກັບຂ້າພະເຈົ້າຫຼັງຈາກກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວອັດລົງດ້ວຍຜົນສຳເລັດໄດ້ບໍ່ດົນ, ນີ້ໄດ້ສະແດງໃຫ້ເຫັນວ່າສະຫາຍເລຂາທິການໃຫຍ່ໄດ້ໃຫ້ຄວາມສຳຄັນຢ່າງສູງຕໍ່ສາຍພົວພັນລາວ-ຈີນ, ສາຍສຳພັນທີ່ເລິກເຊິ່ງ ແລະ ມິດຕະພາບອັນເປັນມູນເຊື້ອລະຫວ່າງສອງພັກ ສອງລັດ ແລະ ປະຊາຊົນສອງຊາດລາວ-ຈີນ. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວໄດ້ຮັບໝາກຜົນຫຼາຍດ້ານ, ພັກປະຊາຊົນປະຕິວັດລາວຈະຍຶດໝັ້ນແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ນຳພາປະຊາຊົນລາວຍາດເອົາໄຊຊະນະໃໝ່ຕ່າງໆ, ສ້າງພື້ນຖານທີ່ໜັກແໜ້ນໃຫ້ແກ່ການຊຸກຍູ້ພາລະກິດສ້າງສັງຄົມນິຍົມຂອງລາວ. ລາວສະແດງຄວາມຂອບໃຈຢ່າງສຸດໃຈຕໍ່ຈີນທີ່ໃຫ້ການສະໜັບສະໜູນ ແລະ ການຊ່ວຍເຫຼືອທີ່ລ້ຳຄ່າແກ່ລາວໃນແຕ່ລະໄລຍະການພັດທະນາຂອງລາວ ເຊິ່ງລວມທັງການຮັບມືກັບການແຜ່ລະບາດຂອງພະຍາດໂຄວິດ-19, ລາວຈະສືບຕໍ່ຊຸກຍູ້ການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ເພີ່ມທະວີການຮ່ວມມືກັບຈີນໃນການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນ ແລະຂົງເຂດອື່ນໆ, ຊຸກຍູ້ການແລກປ່ຽນໄມຕີຈິດມິດຕະພາບໃນລະດັບຕ່າງໆ. ລາວເຊື່ອໝັ້ນວ່າພາຍໃຕ້ການນຳພາຂອງຄະນະກຳມະການສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນແກນນຳ, ປະຊາຊົນຈີນຈະໄດ້ຮັບຜົນສຳເລັດໃໝ່ໃນການສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ, ບັນລຸເປົ້າໝາຍສູ້ຊົນຕາມເວລາກຳນົດ.
ໃນເວລາສົນທະນາ, ສະຫາຍສີຈິ້ນຜິງ ແລະ ສະຫາຍທອງລຸນ ສີສຸດລິດໄດ້ຮ່ວມກັນປະກາດໂດຍກຳນົດໃຫ້ປີ 2021 ເປັນປີມິດຕະພາບ ຈີນ-ລາວ, ສອງຝ່າຍຈະຈັດກິດຈະກຳສະເຫຼີມສະຫຼອງຕ່າງໆ, ຊຸກຍູ້ໃຫ້ມິດຕະພາບຈີນ-ລາວເຂົ້າສູ່ຈິດໃຈຂອງປະຊາຊົນໃຫ້ເລິກເຊິ່ງກວ່າເກົ່າ.
ຄຳເຫັນ
0