ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເມື່ອບໍ່ດົນມານີ້, ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດກ່າວວ່າ: ການສັກວັກຊີນເກີດມີສະພາບທີ່ບໍ່ດຸນດ່ຽງແລະບໍ່ຍຸຕິທຳຢ່າງໜັກໜ່ວງຢູ່ໃນພາກພື້ນ, ຈຳນວນການສັກວັກຊີນຂອງ 10 ປະເທດຮັ່ງມີໄດ້ກວມຍອດຈຳນວນການສັກວັກຊີນຂອງທົ່ວໂລກເຖິງ 75%, ປັດຈຸບັນຍັງມີ 130 ກວ່າປະເທດຍັງບໍ່ສາມາດເລີ່ມໂຄງການສັກວັກຊີນໂຄວິດ-19 ໄດ້ເລີຍ. ທ່ານເຕໂດຣສ ອັດຮານົມ ເກເບຣເຢຊູສ ຜູ້ອຳນວຍການໃຫຍ່ອົງການອະນາໄມໂລກ ຫຼື WHO ກໍໄດ້ເຕືອນວ່າ: ການສະໜອງວັກຊີນພະຍາດໂຄວິດ-19 ບໍ່ຍຸຕິທຳໃນຂອບເຂດທົ່ວໂລກຈະສ້າງຜົນສະທ້ອນຢ່າງໜັກໜ່ວງ.
ພາຍໃຕ້ສະພາບການທີ່ຮ້າຍແຮງດັ່ງກ່າວ, ຈີນໄດ້ເສີມຂະຫຍາຍບົດບາດຢ່າງພົ້ນເດັ່ນໃນການຊຸກຍູ້ການສະໜອງວັກຊີນຢ່າງຍຸຕິທຳໃຫ້ກັບໂລກ. ເລີ່ມແຕ່ເດືອນພຶດສະພາປີກາຍນີ້, ຈີນກໍໄດ້ປະກາດວ່າ: ພາຍຫຼັງຈີນສຳເລັດການຄົ້ນຄວ້າຜະລິດວັກຊີນໂຄວິດ-19 ແລະເອົາໄປນຳໃຊ້ແລ້ວ, ວັກຊີນຂອງຈີນຈະກາຍເປັນຜະລິດຕະພັນສາທາລະນະຂອງໂລກ, ນີ້ຄືການປະກອບສ່ວນຂອງຈີນໃນການຊຸກຍູ້ໃຫ້ວັກຊີນກາຍເປັນສິ່ງທີ່ປະເທດພວມພັດທະນາສາມາດເຂົ້າເຖິງແລະສາມາດຊື້ໄດ້, ໃນຕົ້ນເດືອນກຸມພານີ້ວັກຊີນງວດທຳອິດທີ່ຈີນຊ່ວຍເຫຼືອໃຫ້ກັບຕ່າງປະເທດກໍໄດ້ສົ່ງມອບໃຫ້ແກ່ປະເທດພວມພັດທະນາຫຼາຍປະເທດແລ້ວເຊັ່ນ: ປາກີສະຖານ, ລາວ, ຟີລິບບິນ, ມຽນມາ, ກຳປູເຈຍແລະປະເທດອື່ນໆ. ນັບມາຮອດວັນທີ 18 ກຸມພານີ້, ຈີນໄດ້ໃຫ້ການຊ່ວຍເຫຼືອດ້ານວັກຊີນໂຄວິດ-19 ແກ່ 53 ປະເທດພວມພັດທະນາທີ່ສະເໜີຄວາມຕ້ອງການ.
“ວັກຊີນຈີນໄດ້ສົ່ງມາໃນເວລາທີ່ພວກເຮົາຫຍຸ້ງຍາກທີ່ສຸດແລະຕ້ອງການທີ່ສຸດ.” ນີ້ແມ່ນການຕີລາຄາກ່ຽວກັບວັກຊີນໂຄວິດ-19 ຂອງຈີນຈາກປະຊາຄົມໂລກ.
ແຕ່ວ່າໃນປັດຈຸບັນໃນເວລາທີ່ປະຊາຄົມໂລກໄດ້ຕັ້ງໜ້າສະແຫວງຫາການຮ່ວມມືເພື່ອຕ້ານກັບການແຜ່ລະບາດຂອງພະຍາດໂຄວິດ-19, ຕາມບົດລາຍງານການສຳຫຼວດສະບັບໜຶ່ງທີ່ “One Campaign” ເຊິ່ງເປັນອົງການສາກົນເພື່ອຕໍ່ຕ້ານກັບຄວາມທຸກຍາກທີ່ບໍ່ຫວັງຜົນກຳໄລພັດໄດ້ແຈ້ງຂ່າວວ່າ: ໂດຍຜ່ານການສຳຫຼວດສັນຍາສະໜອງວັກຊີນໂຄວິດ-19 ຂອງບໍລິສັດວັກຊີນສຳຄັນ 5 ແຫ່ງຂອງປະເທດຕາເວັນຕົກໄດ້ພົບເຫັນວ່າ, ວັກຊີນໂຄວິດ-19 ທີ່ປະເທດພັດທະນາແລ້ວເຊັ່ນອາເມຣິກາເປັນຕົ້ນທີ່ໄດ້ກວາດຊື້ແລ້ວນັ້ນມີຫຼາຍກວ່າ 3 ຕື້ຫຼອດ, ຖ້າວ່າປະຊາຊົນໝົດທຸກຄົນຂອງປະເທດເຫຼົ່ານີ້ສັກວັກຊີນ 2 ເຂັມ, ຍອດຈຳນວນການສັກວັກຊີນທີ່ປະເທດເຫຼົ່ານີ້ຕ້ອງການນັ້ນກໍພຽງແຕ່ 2,06 ຕື້ຫຼອດເທົ່ານັ້ນ. ສ່ວນວັກຊີນທີ່ເຫຼືອຄວາມຕ້ອງການນັ້ນຖ້າເອົາໄປສັກໃຫ້ປະຊາຊົນຜູ້ໃຫຍ່ຢູ່ທະວີບອາຟຣິກາເຂົາເຈົ້າກໍສາມາດສັກວັກຊີນໄດ້ທັງໝົດ.
ນີ້ກໍເປັນການຢັ້ງຢືນຄຳເຕືອນຂອງທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໃນເມື່ອກ່ອນໄດ້ດີທີ່ສຸດ.
ການກະທຳ “ລັດທິຊາດນິຍົມດ້ານວັກຊີນ” ຂອງປະເທດຈຳນວນໜຶ່ງໄດ້ສົ່ງຜົນເຮັດໃຫ້ຫຼາຍປະເທດພວມພັດທະນາຮູ້ສຶກບໍ່ພໍໃຈ. ໃນກອງປະຊຸມສະພາຄວາມໝັ້ນຄົງອົງການສະຫະປະຊາຊາດຜ່ານທາງວິດີໂອ, ທ່ານ ມາເຊໂລ ໄອບຣັດ ລັດຖະມົນຕີກະຊວງການຕ່າງປະເທດແມັກຊິກໄດ້ຮຽກຮ້ອງໃຫ້ປະເທດຮັ່ງມີຈົ່ງຢຸດຕິການກັກຕຸນວັກຊີນອີກ, ຂໍໃຫ້ປະເທດເຫຼົ່ານີ້ໃຫ້ໂອກາດດ້ານວັກຊີນແດ່ໜ້ອຍໜຶ່ງແກ່ປະເທດທຸກຍາກ.
ວັນທີ 17 ກຸມພານີ້, ທ່ານຫວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນກ່າວວ່າ: ຈີນໄດ້ດຳເນີນການຮ່ວມມືສາກົນດ້ານວັກຊີນໂຄວິດ-19, ບໍ່ສະແຫວງຫາຈຸດປະສົງທາງການເມືອງພູມີພາກໃດໆ, ບໍ່ສະແຫວງຫາຜົນປະໂຫຍດດ້ານເສດຖະກິດໃດໆ, ທັງບໍ່ມີເງື່ອນໄຂດ້ານການເມືອງໃດໆແອບແຟງ. ສິ່ງທີ່ຈີນຄຳນຶງເຖິງຫຼາຍທີ່ສຸດກໍຄືວ່າຈະເຮັດໃຫ້ວັກຊີນໂຄວິດ-19 ກາຍເປັນຜະລິດຕະພັນສາທາລະນະປະໂຫຍດທີ່ປະຊາຊົນຂອງປະເທດຕ່າງໆສາມາດເຂົ້າເຖິງແລະສາມາດຊື້ໄດ້, ກາຍເປັນ “ວັກຊີນຂອງປະຊາຊົນ” ຢ່າງແທ້ຈິງ. ຈີນຈະສືບຕໍ່ສຸມຄວາມພະຍາຍາມຮ່ວມກັນກັບຝ່າຍຕ່າງໆ, ເພີ່ມທະວີການຮ່ວມມືໃນຂົງເຂດຕ່າງໆເຊັ່ນ: ວັກຊີນ, ປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19ແລະອື່ນໆ.
ຈີນໄດ້ຊຸກຍູ້ການສະໜອງວັກຊີນຢ່າງຍຸຕິທຳດ້ວຍການກະທຳທີ່ແທ້ຈິງ, ແຕ່ເມື່ອຜະເຊີນກັບບັນຫາຄືກັນ, ລັດຖະບານອາເມຣິກາຍັງສືບຕໍ່ປະຕິບັດຕາມແນວຄິດ “ອາເມຣິກາຕ້ອງມາກ່ອນ”. ພວກເຮົາຄວນຖືການແບ່ງປັນວັກຊີນເປັນບູລິມະສິດ, ຍ້ອນວ່າສິ່ງນີ້ບໍ່ພຽງແຕ່ແມ່ນເຮັດເພື່ອປະເທດອື່ນໆເທົ່ານັ້ນ, ທັງແມ່ນການເຮັດເພື່ອພວກເຮົາເອງເຊັ່ນກັນ. ກໍຍ້ອນວ່າ, ເຊື້ອພະຍາດບໍ່ມີພົມແດນນັ້ນເອງ.
ຄຳເຫັນ
0