ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໂຮງງານຜະລິດຢາພື້ນເມືອງຈີນຂອງນະຄອນນານຢາງ
ນະຄອນນານຢາງ ແຂວງເຮີນານ ຕັ້ງຢູ່ທາງພາກກາງຂອງຈີນເປັນເມືອງວັດທະນະທຳແລະປະຫວັດສາດທີ່ມີຊື່ສຽງຂອງຈີນ ທີ່ມີປະຫວັດສາດ 2.700 ກວ່າປີ, ເປັນບ້ານເກີດເມືອງນອນຂອງທ່ານຈ່າງຈົ້ງຈິງ ນັກວິທະຍາສາດການແພດທີ່ມີຊື່ສຽງໃນສະໄໝບູຮານຈີນ ຈົນໄດ້ສົມຍານາມວ່າ“ປະລະມາຈານແພດ”. ວັນທີ 12 ພຶດສະພາປີ2021, ທ່ານສີຈິ້ນຜິງ ປະທານປະເທດຈີນທີ່ກຳລັງສຳຫຼວດກວດກາວຽກງານຢູ່ແຂວງເຮີນານ ໄດ້ເດີນທາງໄປເຖິງນະຄອນນານຢາງ ເພື່ອສະແດງຄວາມເຄົາລົບຕໍ່ “ປະລະມາຈານແພດ”ຂອງຈີນ ທັງໄດ້ສຳຫຼວດກວດເບິ່ງສະພາບການພັດທະນາອຸດສາຫະກຳການຢາແລະແພດແຜນຈີນເພື່ອຊຸກຍູ້ການປະກອບອາຊີບແລະລຶບລ້າງຄວາມທຸກຍາກຂອງທ້ອງຖິ່ນແຫ່ງນີ້.
ຮູບປັ້ນຈ່າງຈົ້ງຈິງ
ທ່ານ ຈ່າງຈົ້ງຈິງ ເກີດເມື່ອປະມານ ຄສ 150 ປີ, ເປັນຜູ້ທີ່ປະສົບຜົນສຳເລັດສູງແລະເປັນບຸກຄົນທີ່ເປັນຕົວແທນດ້ານການຢາແລະແພດແຜນຈີນໃນສະໄໝບູຮານຈີນ, ເພິ່ນຍັງເປັນຜູ້ຂຽນປຶ້ມຕຳລາທີ່ມີຊື່ວ່າ “ນິພົນວ່າດ້ວຍໄຂ້ຫວັດແລະຊັບພະໂລຄາ” ເຊິ່ງເປັນປຶ້ມຕຳລາແພດສາດບູຮານທີ່ມີອິດທິພົນສູງໃນປະຫວັດແພດສາດຈີນ ທັງເປັນປຶ້ມຕຳລາກ່ຽວກັບວິທະຍາການປິ່ນປົວຕົວຈິງສະບັບທຳອິດຂອງຈີນ.
ປຶ້ມຕຳລາທີ່ມີຊື່ວ່າ “ນິພົນວ່າດ້ວຍໄຂ້ຫວັດແລະຊັບພະໂລຄາ”
ພາຍຫຼັງເກີດມີສະພາບການແຜ່ລະບາດຂອງພະຍາດໂຄວິດ-19 ແລ້ວ, ພາຍໃຕ້ສະພາບການທີ່ບໍ່ມີຢາປິ່ນປົວວິເສດ, ຈີນໄດ້ຄັດເລືອກເອົາ “ຢາ ແຜນຈີນ 6 ຊະນິດ”ສະເພາະປິ່ນປົວພະຍາດໂຄວິດ-19, ສ່ວນ“ຢາ ແຜນຈີນ 6 ຊະນິດ”ນີ້ກໍແມ່ນໄດ້ມາຈາກສູດຢາປິ່ນປົວທີ່ໄດ້ບັນທຶກໄວ້ໃນຕຳລາແພດສາດບູຣານຈີນຕ່າງໆເຊັ່ນ “ນິພົນວ່າດ້ວຍໄຂ້ຫວັດແລະຊັບພະໂລຄາ” ເປັນຕົ້ນ. ຕາມສະຖິຕິສະແດງໃຫ້ເຫັນວ່າ, ໃນຂະບວນການຕ້ານກັບພະຍາດໂຄວິດ-19ຢູ່ຈີນ, ການຢາແລະແພດແຜນຈີນໄດ້ມີສ່ວນໃນການຊ່ວຍປິ່ນປົວຄົນເຈັບທີ່ຖືກບົ່ງມະຕິເປັນພະຍາດໂຄວິດ-19 ຫຼາຍກວ່າ 90%, ໄດ້ເສີມຂະຫຍາຍບົດບາດອັນສຳຄັນໃນການສະກັດກັ້ນບໍ່ໃຫ້ຄົນເຈັບທຳມະດາແລະຄົນເຈັບອາການເບົາກາຍເປັນອາການໜັກແລະອາການສາຫັດເຖິງຂັ້ນເສຍຊີວິດ.
ໃນງານສຳມະນາກັບຜູ້ຊ່ຽວຊານນັກວິຊາການທີ່ຈັດຂຶ້ນໃນເດືອນມິຖຸນາປີ2020, ທ່ານສີຈິ້ນຜິງເຄີຍຊີ້ໃຫ້ເຫັນວ່າ: ການປິ່ນປົວໂດຍປະສົມປະສານແພດແຜນຈີນແລະແພດຫຼວງ,ໃຊ້ຢາພື້ນເມືອງຈີນແລະຢາຫຼວງໄປພ້ອມໆກັນ ເຊິ່ງເປັນຈຸດພິເສດອັນພົ້ນເດັ່ນໃນການປ້ອງກັນແລະຄວບຄຸມພະຍາດຄັ້ງນີ້ ທັງເປັນພຶດຕິກຳຕົວຈິງທີ່ມີຊີວິດຊີວາຄັ້ງໜຶ່ງໃນການສືບທອດສິ່ງຍອດຍິ່ງທາງດ້ານການຢາແລະແພດແຜນຈີນ, ເປັນການຮັກສາມູນເຊື້ອແລະມີການປະດິດສ້າງໃໝ່. ທ່ານຍັງໄດ້ກ່າວມາຫຼາຍເທື່ອແລ້ວວ່າ, ການຢາແລະແພດແຜນຈີນເປັນສິ່ງປະເສີດຂອງປະຊາຊາດຈີນ, ຕ້ອງອະນຸລັກໃຫ້ດີ, ຂຸດຄົ້ນໃຫ້ດີ,ພັດທະນາໃຫ້ດີແລະສືບທອດໃຫ້ດີ. ປັດຈຸບັນ, ການພັດທະນາການຢາແລະແພດແຜນຈີນໃຫ້ຈະເລີນຂຶ້ນກຳລັງພົບກາລະໂອກາດທີ່ເອື້ອອຳນວຍຫຼາຍດ້ານ,ຕ້ອງຊຸກຍູ້ການຢາແລະແພດແຜນຈີນໃຫ້ຫັນເປັນອຸດສາຫະກຳ, ຫັນເປັນທັນສະໄໝ ແລະພັດທະນາກ້າວໄປສູ່ໂລກ.
ຄຳເຫັນ
0